Apirilak 16
-
Bilboko Alkatea, Juan Mari Aburto, arratsalde honetan Azkuna Zentroan egingo den inaugurazio-ekitaldian izango da, non 19:00etatik aurrera Sensei Music Ensemble taldearen inaugurazio-kontzertuaz gozatzeko aukera egongo den.
-
Bilboko Udalak antolatutako Bilbao Basque Fest jaialdia apirilaren 19ra arte egingo da, eta bilbotar zein bisitariei aukera eskainiko die musikaren, gastronomiaren, zinemaren eta kirolaren bidez euskal kulturaren aberastasunaz bost zentzumenekin gozatzeko.
-
Gaur gauean, 22:00etatik aurrera, Kafe Antzokiak Basque Fest Rock City-ren lehenengo kontzertuak hartuko ditu.
Bilbao Basque Fest 2025 arratsalde honetan hasiko da, Azkuna Zentroan egingo den inaugurazio-ekitaldiarekin batera, eta Bilboko Alkatea, Juan Mari Aburto, bertan izango da. Alkatearen esku-hartzearen ondoren, Sensei Music Ensemble taldeak jaialdia inauguratuko du. Alex Lopez buru duen proiektuak jazza, popa eta folka modu esperimentalean eta oso emozionalean uztartzen ditu. Baxu eta kontrabaxu jotzaile beteranoa hogei urte baino gehiagoko ibilbidean agertokia partekatu duen musikarien talde batez inguratuko da.
Bilboko Udalak antolatutako jaialdiaren abiapuntua izango da, apirilaren 19ra arte ehundik gora jarduera eskainiko dituena, gehienak doakoak, Aste Santuan hiriaren berezko kultur jarduerarekin bat egiteko, eta Areatza erdigune izango dute.
Arratsaldeko 20:30ean amaituko den inaugurazio-ekitaldiaren ostean, Kafe Antzokiak Basque Fest Rock City hartuko du 22:00etatik aurrera, Arnau & The Honky Tonk Losers eta Moonshine Wagon taldeen kontzertuekin.
AZKUNA ZENTROA, FOLKLOREA ETA ABANGOARDIA
Bihar, osteguna, 18:30etik aurrera Bilboko udal txistulari-bandaren txanda izango da, zeinak Dizdira interpretatuko baitu. Musika eta dantza tradizionala uztartzen dituen proposamen hori doinu herrikoietatik eta, besteak beste, Kepa Junkera, Aitor Furundarena eta Xabier Zabala artisten kantu berriagoetatik abiatzen da. Ikuskizun honek, gainera, lagun izango ditu Garazi Navas soinujolea, Oinkari taldeko dantzariak eta Bilboko Gaztedi dantza-taldeko lau erraldoi.
Apirilaren 18an, ostirala, 19:00etan, trikitixaren, txalapartaren eta albokaren soinuen bidez musika-tradizioa eta -berrikuntza uztartzen dituen Iñaki Plaza Band igoko da Azkuna Zentroko oholtzara, aparteko soinu-esperientzia sortzeko.
Azkenik, Iñaki Palacios txistulariak emango dio amaiera emanaldien zikloari, larunbatean, 19:00etatik aurrera akorde elektronikoak eta euskal folklorearen soinu ezagunenak nahastuko dituen kontzertu batekin.
JAIA AREATZAN
Era berean, bihartik aurrera, Juan Mari Aburto alkatearekin batera, Areatzan dagoen “Txoko Gourmet” karpa enblematikoa inauguratuko da. Karpa horretan gastronomia eta dastatzeak egongo dira, baita Herri Kirolak, antzerkia, arratsalde-gaueko berbenak, haurrentzako tailerrak Zabalgune eraikinean, eta abar luze baten artean.
PROGRAMAZIO OSOA 15.000 TXAPATAN
Eguneroko programaren xehetasun guztiak ezagutzera emateko asmoz, programa hori zabaltzeko euskarri berri bat estreinatu zen iaz, jasangarriagoa eta egungo joera digitalekin bat datorrena, eta edizio honetan ere mantenduko da: QR kode bat duten 15.000 txapa banatuko dira, eguneratutako informazio guztia eta jaialdiaren eguneroko agenda zuzenean eskuratu ahal izateko.
Bilbao Bizkaiaren bi turismo-bulegoek programa inprimatuta ere izango dute.
Bilbao Basque Festek euskal kulturaren erakusleihorik onena ezagutzeko, sentitzeko eta bost zentzumenekin gozatzeko aukera eskaintzen die bilbotarrei eta bisitariei.
Ikusi Bilbao Basque Fest 2025en programazio osoa
SARE SOZIALAK:
