• Gaur (astelehena) hasiko da epea establezimenduek bat egiteko MERKATARITZARI eta BIZIKLETEI zuzendutako Bilbao Bonuen kanpainarekin, www.bonobilbao.eus web-plataformaren bitartez.

• BIZIKLETA BONUEN kasuan, lehenengo aldia da Udalak modalitate hori aktibatuko duena, urian garraiobide hori sustatzeko helburuarekin.

Gaurtik hasita (apirilak 4, astelehena), Bilbao Bonuen programa aktibatuko du Udalak, eta epea zabalduko du merkataritza- eta bizikleta-establezimenduek ekimenarekin bat egiteko, www.bonobilbao.eus plataforman.

Sartzeko eta erosteko mekanismo bera dute programa biek, eta filosofia berdina ere bai: kontsumo zuzena sustatzea pandemiak gehien eragindako sektoreetan, eta, aldi berean, uriaren ekonomia berraktibatzea. Ordea, lerro desberdinei jarraitzen diete.

MERKATARITZAKO BONUEN

MERKATARITZAKO BONUEN kasuan, 63.000 ale baino gehiago aterako dira, 1 milioi euroko aurrekontuarekin; eta, aurreko aldietan bezala, www.bonobilbao.eus plataforman eta sarrerak saltzeko aukera eskaintzen duten Kutxabankeko kutxazainetan erosi beharko dira.

Gaur (apirilak 4, astelehena) izango da lehen data: egun horretatik aurrera, establezimenduek sistemara atxiki beharko dute, eta horretarako epea zabalik egongo da ekainaren 30era arte (kanpaina amaitu arte). Aldi horretan zehar, lineako informazio-hitzaldiak eskainiko dira, merkatariek edozein motatako kontsultak egiteko aukera izan dezaten.

UDALAK ERDIA DIRUZ LAGUNDUKO DU

Bonuak salgai egongo dira maiatzaren 4tik ekainaren 30era arte, edo ale guztiak agortu arte. Eta lehen egunetik bertatik erabili ahalko dira. Berriz ere, bonu bakoitzak 30 euroko balioa izango du, eta Udalak erdia jarriko du (15 € Udalak, eta 15 € herritarrek). Arrakala digitala saihesteko, bonu horietako batzuk establezimenduetan bertan eskuratzeko gordeko dira, 65 urtetik gorako pertsonentzat.

Aurreko urteetan bezala, bonuak modu ekitatiboan banatuko dira uriko barruti guztietan. Txikizkako beste merkataritza-establezimendu guztiek egin ahalko dute bat kanpainarekin. NAN bakoitzarekin 5 bonu eskuratu ahalko dira; eta 4 erabili ahalko dira, kopuru bera edo altuagoa duen tiket bakoitzeko.

BIZIKLETA BONUA

Nobedade moduan, Bilbao Bonuak programaren barruan, Udalak kanpaina paralelo bat jarri du martxan, plataforma berean, urian bizikleta erabiltzea eta sektore horretako establezimenduetan erostea sustatzeko.

Mugikortasun eta Jasangarritasun Sailaren bitartez, eta 2019-2023 Agintaldiko Planean ezarritakoaren ildotik, kutsadura akustikoa murriztu, eta irisgarritasun eta hiri-berroneratze handiagoa lortu nahi dira, bai eta ekonomia eta enplegua suspertu ere.

Lehen aldiz aktibatuko da kanpaina hori Bilbon, eta hura ere gaur (astelehena) hasiko da, establezimenduek www.bonobilbao.eus plataforman atxikitzeko epea zabalduta (apirilaren 30era arte egongo da zabalik). Herritarrek, bestalde, maiatzaren 11tik urriaren 31ra arteko (edo bonuak agortu arteko) epea izango dute txartelak eskuratu eta trukatzeko.

Beste batzuetan ez bezala, eta kanpainaren funtsezko helburuari jarraituta, kanpaina bilbotarrentzat bakarrik izango da. Gainera, bonuak establezimenduetan bertan eskuratu eta trukatu beharko dituzte herritarrek —ez webgunean—, NANa aurkeztuta.

Mota bi egongo dira:

• BIZIKLETA ELEKTRIKOAK erosteko: 400 euroko bonuak (erdia Udalak jarriko du). (200 € erosleak/200 € Udalak).
• Edozein motatako bizikletetan MANTENTZE- eta KONPONTZE-LANAK egiteko: 50 euroko balioa duten bonuak (erdia Udalak jarriko du). (25 € erosleak/25 € Udalak).

Aurrekontua, guztira, 80.000 eurokoa da. Kontsumitzaile bakoitzeko, muga izango da NAN eta tiket bakoitzeko 1 bonu, erosketen kasuan, eta 2 bonu, mantentze- eta konponketa-lanen kasuan. Establezimenduei dagokienez, bakoitzari 30 bonu emango zaizkio bizikleta elektrikoak erostera datozen bezeroentzat, eta mantentze- eta konponketa-lanetan ez da mugarik egongo.

► ESTABLEZIMENDUEI ETA HERRITARREI ARRETA EMATEKO ETA KONTSULTEI ERANTZUTEKO:
Helbide eletronikoa: bonobilbao@bilbaoekintza.bilbao.eus /

Telefonoa: 94  420 53 95

• Laguntzen pakete berria Covid-19aren aurkako aurtengo neurrien planaren barruan dago, eta eremuetako 15 talderi eta Bizkaiko Ostalaritza Elkarteari emango diete dirua, 180.000 euro, hain zuzen ere.

• Hamabost elkarteen kasuan, 145.000 euroko beste dirulaguntza bat jasoko dute, aldez aurretik onetsitako 290.000 euroez gain, eta Bizkaiko ostalaritzak, aldiz, 35.000 euro jasoko ditu.

Bilboko Udalak %50ean handituko ditu hiriko ostalaritzari eta merkataritzari ematen dizkion laguntzak, eta, horrela, 145.000 euroko dirulaguntza bat emango die, zeina 15 merkataritza-talderen bitartez bideratuko den. Zenbateko hori udalak udal-aurrekontuan emandako 290.000 euroei gehituko zaie; hortaz, 435.000 euroko dirulaguntza izango da guztira.

Bestalde, Bizkaiko Ostalaritza Elkartearentzako 35.000 euroko dirulaguntza bat emango da, tokiko kontsumoa sustatzeko asmoz. Udalbatzak gaur bertan onetsi dituen bi neurri berrien bitartez, guztira, 180.000 euroko dirulaguntza emango da.

Merkataritza eta ostalaritzaren sektoreei Covid-19aren kalteei aurre egiten laguntzeko Bilbao Aurrera 2020 eta 2021 planak abian jarri ondoren, Udalak neurrien beste plan bat aktibatu du aurten, udal-ordezkaritza duten talde politikoek adostuta.

Gaurko osoko bilkuran onetsi diren ostalaritza eta merkataritzako laguntzak azken plan horren barruan daude, hau da, elkarteei laguntzen eta babesten jarraitzeko eta auzoak suspertzen eta dinamizatzen jarraitzeko planean.

Hiriko jarduera ekonomikoa bultzatzeko programek gora egin dute urterik urte. 2020. urtean 350.000 euro izan ziren, eta 2021. urtean 180.000 euroko dirulaguntza eman zen, hau da, 530.000 euro guztira. Orain, beste 180.000 euro gehituko zaizkio.

15 elkarteetan proposatutako partida, GUZTIRA:

• BILBAO CENTRO MERKATARITZA ELKARTEA: 123.000€.
• ALDE ZAHARREKO MERKATARIEN ELKARTEA: 88.500€.
• DEUSTO BIZIRIK MERKATARITZA ELKARTEA: 27.000€.
• HIRU AUZO MERKATARIEN ELKARTEA: 21.000€.
• REKALDE BIHOTZEAN MERKATARIEN ELKARTEA: 21.000€.
• LAGUNTASUNA (ZORROTZAKO MERKATARIEN ELKARTEA): 21.000€.
• AUZOA BERRITZEN 2. BARRUTIKO MERKATARIEN ELKARTEA: 21.000€.
• TXURDINAGAKO MERKATARIEN ELKARTEA: 21.000€.
• SANTUTXUKO MERKATARIEN ELKARTEA: 16.500€.
• OTXARKOAGAKO MERKATARIEN ELKARTEA: 16.500€.
• SAN FRANTZISKO, BILBO ZAHARRA ETA ZABALAKO MERKATARI ETA ENPRESEN ELKARTEA: 16.500€.
• BASURTO BERRI BASURTUKO MERKATARIEN ELKARTEA: 10.500€.
• ERRIBERAKO MERKATUKO MERKATARIEN ELKARTEA: 10.500€.
• REKALDE BIHOTZEAN MERKATARIEN ELKARTEA: 10.500 €
• OTXARKOAGAKO MERKATARIEN ELKARTEA: 10.500 €.

• Udalak berriz atera ditu Bilbao Bonuak, uriko merkataritza eta kulturaren sektorera bideratuak, Covidaren Ondorioen Aurkako Neurrien Bilbao 2022 Planaren barruan. Lehenengo fasean, apiriletik aurrera, merkataritzara zuzendutakoak aktibatuko dira. 63.000 bonu baino gehiago aterako dira eta bonu bakoitzak 30 euroko balioa izango du, erdia Udalak jarrita.

• Aldi berean, Udalak beste bonu-programa bat jarriko du martxan, bizikletaren erabilera sustatzeko.

Udalak abian jarri du Bilbao Bonuen programa, Covidaren Ondorioen Aurkako Neurrien Bilbao 2022 Planaren barruan dauden neurrietako bat betez; plan hori udal-ordezkaritza duten talde guztiekin adostu zen (EAJ-PNV, PSE-EE, EH Bildu, Elkarrekin Podemos eta PP). Gogoratuko duzuenez, programa horren helburu nagusia da sustatzea herritarrek kontsumi dezatela pandemiaren eragin handiena izan duten sektoreetan. Koronabirusak eragindako krisiari aurre egiteko Udalak abiarazitako ekintzarik berritzaileenetako bat da honako hau eta 2020ko, 2021eko eta 2022ko Planen barruan egin da.

Oraingo honetan, 1,5 milioi euroko balioarekin, Udalak MERKATARITZAKO bonuak aterako ditu. Bonu horiek apirilean jarriko dira salgai, eta ondoren, KULTURA sektorekoak etorriko dira, bigarren etapa batean, udazkenean.

Merkataritzako bonuen kasuan, 63.000 bonu baino gehiago dira, eta, aurreko aldietan bezala, www.bonobilbao.eus plataforman eta sarrerak saltzeko aukera eskaintzen duten Kutxabankeko kutxazainetan erosi beharko dira. Berriz ere, bonu bakoitzak 30 euroko balioa izango du, eta Udalak erdia jarriko du (15 € udalak eta 15 € herritarrek). Bonu horietako batzuk establezimenduetan bertan eskuratzeko gordeko dira, 65 urtetik gorako pertsonentzat, arrakala digitala saihesteko helburuarekin.

MERKATARITZAKO BONUEN DATA NAGUSIAK

Programaren data garrantzitsuei dagokienez, datorren astelehenean, apirilak 4, saltokiak kanpainari atxikitzeko webgunea aktibatuko da (www.bonobilbao.eus).

Herritarrek bonuak erosteko epea maiatzaren 4an hasi eta ekainaren 30ean amaituko da.

BILBAO BIZIKLETA BONUAK

Aldi berean, berrikuntza gisa, Udalak beste bonu-pakete bat jarriko du martxan, urian bizikletaren erabilera sustatzeko eta, aldi berean, Bilboko bizikleta-dendetan erosketak egiteko.

Mugikortasun eta Jasangarritasun Sailaren bitartez, eta 2019-2023 Agintaldiko Planean ezarritakoaren ildotik, gainera, kutsadura akustikoa murriztu eta irisgarritasun eta berroneratze urbano handiagoa lortu nahi dira, bai eta ekonomia eta enplegua suspertu ere.

Bonu horiek bi motatakoak izango dira:

• BIZIKLETA ELEKTRIKOAK erosteko: 400 euroko bonuak (erdia Udalak jarriko du: 200 € erosleak/200 € Udalak).
• Era guztietako Bizikleten mantentze-lanak eta konponketak egiteko: 50 euroko balioa duten bonuak (erdia Udalak jarriko du: 25 € erosleak/25 € Udalak).

80.000 euroko aurrekontuarekin, modalitate hau Bilboko herritarrei eta saltokiei zuzenduta dago. Datei dagokienez, establezimenduak atxikitzeko eguna, merkataritza bonuak bezala, apirilaren 4an hasiko da eta hau ere plataforma honetan egin beharko da: www.bonobilbao.eus.

Bonuak maiatzaren 11tik urriaren 31ra bitartean egongo dira salgai.

• Proposamen berria alkatearen eta udal-ordezkaritza duten taldeen arteko bileran adostu da gaur, Covidaren ondorioei aurre egiteko Bilbao 2022 Planeko neurrien barruan.

• Laguntzak enplegatutako pertsonen kopuruaren arabera banatuko dira, eta Eusko Jaurlaritzak eskaintzen dituenekin batu ahal izango dira.

Bilboko Udalak 2,1 milioi euro bideratuko ditu uriko ostalaritzaren eta gaueko aisiaren sektorerako zuzeneko laguntzetara, pandemiaren eragin handiena jasaten ari diren kolektiboak indartzen jarraitzeko helburuarekin. Bizkaiko Ostalaritza Elkartearekin aztertu ondoren, ekimena gaur adostu dute bilera batean Alkateak eta udal ordezkaritza duten talde politikoek (EAJ-PNV, PSE-EE, EH Bildu, Elkarrekin Podemos eta PP), Covidaren ondorioei aurre egiteko Bilbao 2022 Planean aurtengo ekitaldirako onartu diren neurrien harira.

Laguntzak Eusko Jaurlaritzak emandakoekin metatu ahal izango dira eta establezimendu motaren eta langile kopuruaren arabera banatuko dira:

II. TALDEA (*):

• 1-3 langile: 1.000 €.
• 4-10 langile: 1.250 €
• 11 langiletik gora: 1.500€

III. TALDEA (**):

• 1-4 langile: 1.500 €.
• 5-10 langile: 2.000€
• 11 langiletik gora: 4.000 €

IV. TALDEA (**):

• 1-4 langile: 2.500€
• 5-10 langile: 4.500 €
• 11 langiletik gora: 6.000 €

(*) II. taldea: tabernak, jatetxeak… Itxiera-ordua 01:00etan.
(**) III. eta IV. taldeak: pubak, diskotekak, dantza-aretoak eta kafe-antzokiak. III. taldekoen itxiera-ordua 4:00etan eta IV. taldekoena 06:00etan.

Laguntzak apirilaren amaieratik aurrera eskatu ahal izango dira, BAOan argitaratu eta biharamunean hasita. Epea 15 egun naturaletan irekita egongo daeta tramitazioa modu telematikoan egingo da bilbaoaurrera.eus estekaren bitartez.

• Bilboko berrogeita hamar saltoki inguru batu dira ospakizunera, eta horretarako, erakusleihoak apaindu dituzte kartelekin eta irudiekin arlo horretan erreferente diren hamabi emakumeren lana balioesteko.

• Ekimenaren helburua zientzian eta teknologian emakumeek duten garrantzia nabarmentzea da. Ekimena Bizilabe Bilbao proiektuaren barruan dago: Bilboko udalak eta Elhuyarrek bultzatuta gazteei zuzendutako ikerketa zentroa da.

Bilboko Udalak eta Elhuyarrek, hiriko merkatarien elkarteen laguntzarekin, #O11Erakusleihoak proiektuaren hirugarren edizioa abiarazi dute. Ekimena Bizilabe Bilbao proiektuaren barruan dago, hamar eta hemeretzi urte bitarteko gazteei zuzendutako jarduera zientifikoak eta teknologikoak egiteko ikerketa zentroa da, Bilboko Udalak eta Elhuyarrek bultzatuta. Deustuko udal zentroan dago.

Emakume eta Neska Zientzialarien Nazioarteko Eguna otsailaren 11an da, eta saltoki bakoitzak emakume zientzialari bat omenduko du, irudiak eta informazioa biltzen dituzten hamabi kartel jarrita. Gainera, erakusleiho bakoitza zientzialari bakoitzaren ikerketa gaiari lotutako elementuekin apainduko da, eta bere aurkikuntzen irudiak eta laburpenak dituzten liburuxkak banatuko dira. Horrela, saltokiak emakume zientzialarien bizitzaren eta lanaren dibulgatzaile izango dira, eta emakume horiek zientziari egindako ekarpena ikusarazten lagunduko dute.

Ekimenaren helburua da STEM* esparruko emakumeen garrantzia nabarmentzea eta nesken eta gazteen artean bokazio hori sentsibilizatzen eta sustatzen laguntzea.

WEBGUNEA: “#O11ERAKUSLEIHOAK”

Bizilaberen webgunean eskuragarri egongo da ekimenari buruz dagoen eduki guztia eta saltoki partehartzaileen zerrenda eskuragarri dago esteka honetan.

Klik eginda erakusleihoaren argazkia eta omendutako emakumea ikusi ahal izango dira. Gainera, ikertzaile horien irudiak deskargatu ahal izango dira, baita bere istorioak irakurri ere. Istorioak Elhuyar Aldizkariak idatziko ditu.

EMAKUME ETA NESKA ZIENTZIALARIEN NAZIOARTEKO EGUNA

Nazio Batuetako Batzar Orokorrak 2016an erabaki zuen otsailaren 11a izango zela Emakume eta Neska Zientzialarien Nazioarteko Eguna, emakumeek eta neskek esparru horretan erabateko partaidetza eta parte-hartze parekidea izan dezaten lortzeko.

Bizilabe urte osoan zehar jarduten du neskek gai zientifiko-teknikoetan parte har dezaten lortzeko eta horretarako, nabarmendu eta ikusgarri egiten du emakume zientzialarien lana, erreferenteak sortzea sustatuta. Egun horri lotutako hainbat jarduera prestatu ditugu eta horiek Bizilaberen webguneko atal honetan jaso ditugu.

* STEM: Science, Technology, Engineering and Mathematics (ingeleseko laburdura).

• Gabonart artisautza azokaren inaugurazio ekitaldiaren buru izan dira Juan Mari Aburto, Bilboko Alkatea, eta ekitaldia antolatu duen Arbaso elkarteko lehendakaria, Bernat Vidal. Abenduaren 17tik urtarrilaren 5era bitartean, 53 artisauk ehungintzako, bitxigintzako edo zeramikako produktuak eskainiko dituzte, besteak beste.

• Gabonarten inaugurazio ekitaldiaren ostean, alkateak izotz ekologikoko patinaje pista eta txirrista handia bisitatu ditu, baita Gabonetako Azoka ere. Bertan gastronomiako produktuak, opariak eta abar biltzen zituzten hogei bat denda daude.

• Areatzako Kaiko Gabonart azokak Bilboko Udalaren proiektua den #BilbaoGabonak ekimenaren egitaraua osatzen du. Ekimena Gabonetako aisialdi, merkataritza eta kultura jarduerez osatuta dago.

• Bilboko alkate Juan Mari Aburtok eskultura bat inauguratu du, mende erdi honetan Mercabilbaoko “familiaren” kide izan diren pertsona guztiak eskertzeko.

• Gainera, Fruta eta Barazkien eta Arrain eta Itsaskien handizkarien eta txikizkarien elkarteei diplomak eman zaizkie, osasun krisian egindako lana aitortzeko.

• Mercabilbaok liburu solidario bat aurkeztu du, “50 años, 50 recetas” Bizkaiko Elikagaien Bankuaren alde.

Aurtengo maiatzaren 3an 50 urte bete ziren Arrain eta Fruta eta Barazkien Merkatu Nagusia egungo tokian abian jarri zenetik, hau da, Basauriko Artunduaga zelaietan. Urte berezi hau amaitzeko, Mercabilbaok gaur goizean ekitaldi bat egin du elikagaien hornikuntza zentroko ‘familiako’ kide izan diren langile guztiak aitortzeko.

Hasi handizkari edo xehekarietatik eta Mercabilbaoko langileetara arte pertsona horiei guztiei esker, Elikagaien Unitate hau Penintsularen iparraldeko elikagaien arloko erreferentea da, nahiz produktu fresko eta kalitatezkoengatik nahiz punta puntako zerbitzu berritzaileengatik. Pertsona horien guztien omenez Mercabilbaoren 50. urtemuga oroitzeko eskultura bat aurkeztu da; egiazko konpromisoa duen kolektiboaren ikur da eskultura hori, egunero milaka familia elikatzen dituen “despentsan” ibilbide luzea duen kolektiboaren ikur.

Ekitaldiaren buruak izan dira Mercabilbaoko Administrazio Kontseiluko presidente eta Bilboko alkate Juan Mari Aburto, Bilboko Udaleko Ekonomiaren Garapena, Merkataritza eta Enplegu Saileko zinegotzi Xabier Ochandianorekin, Udaleko eta Kontseiluko gainerako kideekin eta Mercasa Sozietate Estataleko presidente José Ramón Sempere Verarekin batera. Ekitaldian izan dira Fruta eta Barazkien eta Arrainen eta Itsaskien handizkarien eta txikizkarien elkarteetako ordezkariak, Basauriko instalazioetan dauden enpresetakoak eta Bizkaiko Elikagaien Bankuko presidentea, Miguel Ángel Fernandino.

Bilboko alkateak azaldu du “hemen historia asko idatzi eta bizi izan dira. Baina bada historia nagusi bat, XIV. mendeko merkatu haren historia, Bilbon Erriberako Merkatua sortu zuen harena eta 1971z geroztik Mercabilbao dena. Gaur egun merkataritza gune handia da, handizkako ehun enpresa baino gehiago eta mila langile baino gehiago ditu. Zalantzarik gabe garrantzi handiko motor ekonomikoa da eta enpleguaren motorra ere bai Bilborentzat, Bizkaiarentzat eta Euskadirentzat”.

HANDIZKARIEN ETA TXIKIZKARIEN ELKARTEEN AITORPENA

Mundu mailako pandemiak markatutako urte honetan, Mercabilbaok elikadura zentroa osatzen duten handizkakoen kolektibo osoa omendu nahi izan du, 2020 eta 2021ean zehar egindako lanagatik eta ahaleginagatik inguruko ehundaka dendak eta milaka familiak egunez egun produktu fresko eta kalitatezkoak izaten jarrai dezaten.

Aitorpenean diploma bat eman zaie Fruta eta Barazkien Handizkarien Elkarteko presidente Gorka Morenori, Arraina eta Itsaskien Handizkarien Elkarteko presidente Alma Crespori, Fruta eta Barazkien Txikizkarien Elkarteko presidente Aitor Martínezi eta Arraina eta Itsaskien Txikizkarien Elkarteko presidente José Feijoóri. Orain inoiz baino gehiago Mercabilbaok oinarrizko eragile gisa kokatu ditu Bilboko eta bere metropoli barrutiko elikagai banaketa katean eta ekonomia eta gizarte sustatzaile gisa.

Juan Mari Aburtoren arabera, “modu berezian elikagaien hiri handi honetan lan egin dutenak eta egiten ari direnak saritu nahi izan ditugu. Handizkarien eta Txikizkarien Elkarteak ere urte hauetan egindako lanagatik, eta batez ere, pandemian zehar egindakoagatik. Denei esker konfinamendu, musukoen… hilabete gogorretan gure saltokietara, auzoko dendetara, gure etxe eta familietara elikagaiak helarazi dituzue”.

Alkateak honako hau gogorarazi du: “ekintza honek amaiera bikaina eman dio pandemiak markatuta egon den 50. urteurrenari, baina egoerak eskatzen zuen neurrian egoten jakin izanaren harrotasunarekin egin dugu, laguntzen eta beti pertsonengandik, gure dendetatik eta auzoko ostalaritzatik hurbil, zeina denbora honetan zehar berreskuratzen, baloratzen eta maitatzen ikasi dugun”.

LIBURU SOLIDARIOA “50 AÑOS, 50 RECETAS”

Mercabilbaoren ezaugarria pertsonarik behartsuenekin solidaritatea izatea da eta 50. urteurren honetan urrats bat gehiago egin dute. Goiz honetako ekitaldian “50 años, 50 recetas” liburu solidarioa aurkeztu dute, Bilbo eta Bizkaiko jatetxeetako sukaldaritzako proposamenen aukeratuak dira, non hasierakoak, arrain, itsaski eta haragiz egindako plater nagusiak eta azkenburukoak dauden. Errezeta liburua Bilbao Dendak eta Bizkaia Dendak programari atxikitako dendetan banatuko da, asoziazio sareen bidez salmentan laguntzen duten elkarteak baitira.

Liburuaren salmentarekin biltzen den guztia Bizkaiko Elikagaien bankura bideratuko da, Mercabilbaok 25 urte baino gehiago baitarama erakunde honekin lankidetzan, egunez egun handizkarien enpresek egiten dituzten elikagai donazioen bidez.

ARGAZKI ERAKUSKETA 50. URTEURRENA

Maiatzaren 3an hasi zen argazki eta informazio erakusketa ibiltaria Metro Bilbaoko Zazpikaleak/Casco Viejo geltokian, Mercabilbaoren 50. urteurrenaren ospakizunak hasteko. Orain, azkenengo geldialdia elikagaien instalazioen pabiloi nagusian egingo du eta abenduaren 31ra arte egongo da.

Hornikuntza zentroaren une garrantzitsu eta estrategikoak ikus daitezke, zeina urteetan zehar erakunde solidarioekin gizarte konpromisoa indartzen joan den, esaterako Bizkaiko Elikagaien Bankuarekin 25 urte baino gehiago daramatza lankidetzan, eta elikagaien jasangarritasunarekin duen konpromisoa ere hazi egin da urte hauetan. Gainera, penintsularen iparraldean erreferentzia bihurtu da elikagaiak banatzeko duen gaitasunagatik eta bere kokapen estrategikoagatik, ondorioz nazioarteko estrategia eraginkor eta kalitatezkoa aurrera eramateko toki aproposean dago

• 2022ko urtarrilaren 5a arte, hogei bat dendek euren elikagaiak, Gabonetako produktuak, moda edo jostailuak eskainiko dituzte Erripako kaian.

• Gune horretan kokatzen da, halaber, “Factoría de los sueños / Gabonetako ametsen faktoria” haurren aisialdirako eremua; bertan 0 eta 12 urte bitarteko haurrentzako jarduerak antolatuko dira, eta sei erreiko izotz-txirrista handia ezarri da.

• Itsasadarraren beste ertzean, Areatzako kaian, izotz gaineko patinaje ekologikorako 800 metro karratuko pista ezarri da. Jarduera horiek guztiak datorren urteko urtarrilaren 5era arte egongo dira martxan.

• Bertaratutako guztiek nahitaez erabili beharko dute maskara eta jarduera bakoitzean ezarritako segurtasun-neurriak bete beharko dituzte.

Gabonetako Merkatuak gaur irekiko ditu ateak Erripako kaian, eta 20 postu izango ditu. Tokiko saltokiak bertan egongo dira 2022ko urtarrilaren 5era arte, eta honako hauek eskainiko dituzte: elikagaiak, moda, opariak, Gabonetako produktuak eta jostailuak. Gabonetako merkatuaren ordutegia honako hau izango da: 11:30etik 14:00etara eta 17:30etik 21:00etara.

Honako hauek dira Gabonetako Merkatuaren aurtengo edizioan parte hartuko duten tokiko saltokiak: Bilbao Dulce y Salado gozo-denda, Gelati Gelati izozki-denda, Ekoizan produktu ekologikoak, Magora Bakery okindegi-gozotegia, Garrarte Confiteros Artesanos artisau-gozokiak, Polvorones Solokoetxe, La Flor de la Canela okindegi-gozotegia, Bizkorna artisau-okindegia, Koloreak Juguetes jostailu-denda, Kiliken Euritakoak euritako-denda, Viento Norte etxerako ehunak, Insphyria moda eta osagarriak, Union Recycling moda, Princess Courts ehunak eta osagarriak, The Su Life Eco & Chic etxeko tresneria eta osagarri ekologikoak, Revoluciona Taller y Xaboi Punpuila larru- eta xaboi-tailerra, Kai Denda moda eta osagarriak, Vollet emakumeentzako moda, Tu bola de Navidad opariak, eta Ositos con Alcohol gominolak.

Ekimen honen helburua da Bilboko tokiko merkataritzaren jarduera sustatzea; horretarako, Gabonetako kontsumoko produktuen eskaintza egingo zaie egun hauetan Erripako kairaino gerturatzen direnei.

Derrigorrezkoa izango da eremu osoan maskara erabiltzea, eta indarrean dauden osasun-neurriak bete beharko dira.

GABONETAKO JARDUERA ITSASADARRAREN BI ERTZETAN

Erripako kaian “Factoría de los Sueños Navideños – Gabonetako Ametsen Faktoria” haurrentzako karpa ere dago. 0-12 urte bitarteko haurrei zuzendutako gune hau jardueraz beteta dago.

Trebetasuna eta punteria praktikatzeko “Orga misteriotsua” ludoteka (0-4 urte); “Sorgindutako Basoa” haurrentzako laser-zirkuitu berritzailea (+6 urte); “Kermesse Gabonetako azoka”, trebetasun ezberdinak (punteria, memoria, estrategia…) garatzeko jarduerak dituen postu-sorta bat (0-12 urte); Horrez gain, photocall bat antolatu da eta postontzi bat jarri da Olentzerori (euskaraz), Santa Clausi (ingelesez) edo Hiru Erregeei (gaztelaniaz) gutuna bidaltzeko; gainera, LED argiz apaindutako “Desioen Zuhaitza” jarri da eta Gabonetako mezuak utzi ahal izango dira bertan. Era berean, 4 urtetik gorako haurrentzako tailer ugari egingo dira.

Jarduera hau azaroaren 25ean hasi zen eta 2022ko urtarrilaren 5era arte egongo da martxan. Irekiera ordua honakoa izango da: astelehenetik ostiralera 16:30etik 20:30era, eta asteburuetan eta jaiegunetan 11:00etatik 14:00etara eta 16:30etik 20:30era.

“Factoría de los Sueños Navideños – Gabonetako Ametsen Faktoria” karpako doako jardueretan parte hartzeko, beharrezkoa da aldez aurretik erreserba egitea 688 603 737 telefonora deituta, karparen jardueraren ordutegi berean. Adingabe bakoitza heldu batekin joan daiteke, eta bertaratutako pertsona guztiek nahitaez erabili behar dute maskara.

Haurrentzako karparen ondoan, izotz ekologikoko txirrista handia dago, eta irristatzeko sei errei ditu. Itsasadarraren beste aldean, Areatzako kaian, izotz ekologikoaren gaineko patinaje-pista dago; pistak 800 metro karratu ditu baina azaleraren erdia estalita dago, eguraldi txarra espero baita. Bi jarduerak azaroaren 25etik urtarrilaren 5era arte egongo dira martxan.

Izotz-pistaren kasuan, 30 minutuko irristaketaren prezioa (patinak barne) 3 eurokoa izango da, eta 2 eurokoa familia ugarientzat; txirrista, berriz, 2 eurokoa izango da pertsonako, eta erreietatik hiru aldiz jaisteko aukera egongo da.

Hauxe izango da bi instalazioen ordutegia: 11:00etatik 14:00etara eta 16:30etik 20:30era, eta asteburu, jaiegun eta eskolarik gabeko egunetan ordutegia luzatuko da 16:00etatik 21:00etara.

Sarrerak leihatiletan nahiz online eskuratu ahalko dira, webgune honetan: www.bilbaopistadehielo.com. Talde-erreserbak (20 pertsona baino gehiago) egiteko, mezu elektroniko bat bidali behar da honako helbide honetara: reservasgabonak@proasur.com edo bezeroaren arretarako telefonora deitu (610 124 552). Maskara une oro erabili beharko da derrigorrean.

#BILBAOGABONAK PROIEKTUA

Jarduera horiek guztiak #BilbaoGabonak proiektuaren parte dira; proiektu horrek jarudera-programa zabala du eta Gabonetan Bilbon egiten diren aisialdiko, merkataritzako eta kulturako jarduerak jasotzen ditu.

• Hogeita hamar bat modako proposamenek desfilea egingo dute Euskalduna Jauregian, parte hartuko duten establezimenduak kalitate handikoak izango dira

Bilbao Fashion City moda lehiaketa larunbat honetan hasiko da, arratsaldeko 8etan, Bilboko Pasarelaren XII. Edizioarekin. Bilboko Pasarela moda-merkataritzarentzat une garrantzitsuan iritsiko da, sektorearen eraldaketa betean eta kontsumitzailearen aldaketa sakonetan. Bilboko hainbat kaletako dendek, 30 proposamen, Euskalduna Jauregia hartuko dute larunbat honetan, 20: 00etan, udazken-negu denboraldiko moda aurkezteko.

Bilboko Hiri Pasarela 2010. urtean sortu zen, eta urtero ikuskizun bat izateko asmoa betetzen du, hiriko erdiguneko saltokietan aurki daitekeen diseinua eta kalitatea herritarrei helarazteko.

Bilboko Pasarela zuzenean jarraitu ahal izango da jauregian bertan, baina streaming bidez ere emango da Bilboko moda-ekitaldi handira joan ezin diren moda-zaleentzat. Ekimen koloretsua da bibrazio onez betea, eta ekitaldi honetarako jarduera-programa oso bat proposatzen da.

Bilbao Fashion Cityk moda-ekitaldiak eta erakusketak garatzen jarraituko du egun horietan, eta prentsaurrekoan zirriborratuko dira. Programa hau guztia Bilboko Udalaren, Bizkaiko Foru Aldundiaren, Laboral Kutxaren eta Metro Bilbaoren lankidetzari esker garatzen da.

• Eusko Jaurlaritzak abian jarritako ekimena da, merkataritza-sektorean lehen hitza euskaraz egitea sustatzeko.-

“Betikoa. Gertukoa. Eskatu euskaraz, eskaini euskaraz” eremu sozioekonomikoan euskara sustatzeko planaren helburuei erantzunez, Eusko Jaurlaritzako Kultura eta Hizkuntza Politika sailak merkataritzan euskara sustatzeko abiatu duen kanpaina da.

Iaz egin zen lehenengo edizioak irekitako bidetik jarraituz, Euskal Autonomia Erkidegoko udal guztietara ireki da, eta elkarlanean oinarritu den kanpaina bat eraiki da. Guztira 60 udal baino gehiagok parte hartu dute kanpainan. Bilbo da kanpainarekin bat egin duen hirietako bat eta bertako udaletxean egin da gaur aurkezpen ekitaldia. Kultura eta Hizkuntza Politikako sailburu eta Eusko Jaurlaritzaren bozeramaile Bingen Zupiriak, Bilboko alkate Juan Mari Aburtok eta BilbaoDendak elkarteko presidente Rafa Gardeazabalek aurkeztu dute kanpaina.

Merkataritzaren testuinguruan euskararen erabilera konfiantzarekin lotzen du kanpainak. Tokiko merkataritzak berezko duen gertutasunak eta betikotasunak konfiantzazko harremana sortzen du. Era berean, harreman horrek kalitatearekin lotura dauka, bai produktuarena eta baita harremanarena ere.

Bingen Zupiria Kultura eta Hizkuntza Politikako sailburuak aipatu duenez “Eusko Jaurlaritzak martxan jarritako Eremu sozioekonomikoaren planak agintzen digu garrantzitsua dela merkataritza eta kontsumo eremuetan zerbitzu hizkuntza euskara izan dadin sustatzea. Eta eskakizun horri erantzunez egin da kanpaina hau. Herritarrak, kontsumitzaileak, aktibatu nahi ditu euskara erosketa unean erabiltzera animatuz. Eta alderantziz, jarduera ekonomikoa herrian dutenak gonbidatu nahi ditu euskaraz gerturatzen zaion herritarrari euskaraz keinu egitera. Bi erpin ukitzen ditu. Erosterakoan eta saltzerakoan ere egin dezagun lehenengo hitza euskaraz”. Zupiriak gaineratu duenez “kanpainak gainera gure hizkuntza, euskara, eguneroko erosketarekin, hurbiltasunarekin, herriko harremanekin lotzen du. Gertukoa eta bertakoa lotzen du euskararekin”.

Bestalde, Bilboko alkateak nabarmendu du “kanpaina honekin bat egin duten 60 euskal udalerriok helburu bera dugula, sinplea bezain funtsezkoa: herritarrak euskaraz erostera animatzea, euskaraz eskatzera eta gure saltokiak euskaraz eskaintzera eta arreta ematera animatzea”. Aburtok azpimarratu du “erronka bat dugula: Bilbo gero eta euskaldunagoa izatea. Euskarak Bilboko kaleak bete ditzan nahi dugu, gure hizkuntza gure egunerokotasunaren parte izan dadin, euskarari egunerokotasuna eman diezaion eta, horrela, euskararen erabilera normalizatu dadin, eta helburu handi horretan guztion konpromisoa behar dugu: instituzioak, erakunde publikoak eta pribatuak eta, batez ere, herritarrenak. Horrela bakarrik lortuko dugu”, gaineratu du.

Bilboko merkataritza- eta turismo-sektorea sustatzeko plataforma den bilbaoDendak elkarteko presidente Rafael Gardeazabalek babes osoa eman dio gure inguruan euskararen erabilera biziberritu eta sustatu nahi duen ekimen honi. “Merkataritza bizi batean hizkuntza bizi baten aldeko apustua egiten dugu, eta iruditzen zaigu merkatarien eta bezeroen artean sarritan sortzen den ingurune ia familiar hori oso egokia dela gure hizkuntzaren erabilera sustatzeko. Eta, alde horretatik, uste dut merkataritzatik ere nabarmendu behar dugula gure bezeroek euskaraz arreta jasotzeko aukera dutela, gero eta saltoki gehiagotan. Izan ere, hori erosketa-esperientziaren kalitate horren parte ere bada. Izan ere, bilbaoDendak-ek gure jardueran funtsezko faktore bereizgarritzat hartzen du esperientzia hori”.

KAANPAINAREN EZAUGARRI NAGUSIAK

Kanpainaren lelo orokorra salerosketan ematen den harremanarekin lotu da. Izan ere, “Jarri betikoa” da denda edo taberna batean konfiantza handiena ematen duen esaldia. Hala, euskara egunerokotasunean erabiltzeko hizkuntza gisa eta konfiantza sortzeko bide gisa aurkezten du kanpainak eta euskararen erabileraren inguruan hausnartzea eta sentsibilizatzea du helburu.

Mezu horri spot baten forma eman zaio eta hori da kanpainaren ardatza. Spotak biloba eta amona bat irudikatzen ditu egunerokoan. Amonak bilobari erosketak egitera ateratzeko eskatzen dio eta erosi beharrekoen zerrenda bat aipatzen dio. Hainbeste dira amonak emandako jarraipenak, bilobak zer erosi behar duen ahazten duela okindegira iristean. Okinak baina, amona ezagutzen du eta bilobak ezer eskatu gabe “betikoa” eskaintzen dio. Spotak islatzen duen egoera hau bezeroaren eta merkatariaren arteko eguneroko harremanetik sortzen den konfiantzaren isla da. Eta horrekin batera, norbera bere hizkuntzan artatua izatea konfiantza hori eraikitzeko bidea dela.

Spotaren zabalkundearekin batera, udalen elkarlanak garrantzi berezia dauka aurtengo edizioan. Merkataritzan euskara sustatzeko kanpaina autonomo edo isolatuak egin beharrean, modu bateratuan egitearen aldeko izan dira EAEko udal ordezkariak (EUDEL, UEMA, hiru Aldundiak eta bat egin duten udal, koadrila nahiz mankomunitateak), eta azken bi urtetan egindako koordinazio lana oso modu positiboan baloratu da. Hala, datozen urteei begira, kanpaina denboran iraunkorra eta bateratua izan dadin adostu da denen artean.

Eusko Jaurlaritzan eskainitako euskarrien zerrenda batetik abiatuta, udal bakoitzak norberaren errealitatera egokitutako estrategia bat jarraituko du datozen asteetan zehar spotaren mezua gizarteratzeko helburuarekin.

Gaur bertan eman zaio hasiera kanpainari eta abenduaren 31ra bitartean luzatuko da modu ofizialean, nahiz eta eremu batzuetan urtarrilean ere mantenduko den merkealdiei keinu eginez.