• Bederatzi ekitaldi berezi aurkeztu dituzte gaur, bost berriak izanik, 2026. urte osoan ospatuko den urteurrenari hasiera emateko.

• Bereziak ekimenari dagokionez, José González artistak kontzertu berezia egingo du Guggenheim Bilbao Museoan uztailaren 8an, hiriko ospakizunen barruan.

• Zinema, kirola, musika klasikoa, mendia eta kultura-aniztasuna uztartzen dira jaialdiaren dimentsio soziala eta lurralde-dimentsioa hedatzen dituen egitarauan.

2026an, Bilbao BBK Live jaialdiak musikaz, komunitatez eta kulturaz beteriko bi hamarkada beteko ditu, eta Kobetamenditik haratago hedatu eta urte osora zabalduko den ospakizuna antolatu dugu. Urteurrena otsoaren hilean hasi zen, otsailean, eta orain, ospakizunekin jarraitzeko, edizio berezi honen pultsua markatuko duten bederatzi ekitaldiren aurkezpena dator.

Urteurreneko programazioaren lehen aurrerapen honetan zinema, kirola, natura, kultura-aniztasuna eta hiri-espazioa konektatzen dira, jaialdiaren hedadura areagotuta bai hirian, bai lurraldean. Iragarpen horren barruan, ikus-entzunezko pieza bat estreinatu da, hogei urteko historia artxiboko irudien eta une ikonikoen bitartez errepasatzeko. Bideoa Uniko estudioko Iván Miñambresek egin du: bi hamarkadatako agertoki, artista eta ikus-entzuleen bidaia bisual bat da, iragana eta oraina sekuentzia berean lotuta. Aipatu behar dugu Iván Miñambresek Animazio Film Onenaren Goya saria jaso berri duela Decorado lanarekin.

Bidaia horretan, Bilbao BBK Live jaialdiak urtez urte izan duen bilakaera ere laburbiltzen da: 2006. urtean hasi zenetik 1,8 milioi lagun baino gehiago jaso ditugu, jaialdiaren eskala, irismena eta proiekzioa areagotu duen hazkunde iraunkorrean. Hasieran, publikoa gehienbat bertakoa zen (% 65 Euskadikoak); urteak joan, urteak etorri, jaialdia nazioarteko topagune bihurtu da eta, gaur egun, ikus-entzuleen % 40 dira bertakoak, % 44 naziokoak eta % 16 nazioartekoak. Hazkunde hori jaialdiaren dimentsioan ere sumatzen da: lehenengo edizioetan 3 agertoki eta 40 artista izatetik 7 agertoki eta 100 artista baino gehiago izatera iritsi da, esparrua bikoiztu egin da, eta inpaktua biderkatu; azken batean, Europa osoko erreferentziako topagune musikal bihurtu da.

Bilakaera horretan oinarrituta eratu da orain urteurrenari forma emango dioten hitzordu eta topaketen mapa, hiriko eta lurraldeko hainbat espaziotan.

ORKRESTA: JAIALDIAREN ERESERKIAK BERRIDAZTEKO GAUA

Datorren apirilaren 10ean, 20. urteurreneko hitzordu berezienetako bat izango da Bilboko Euskalduna Jauregian: Orkresta, Bilbao Orkestra Sinfonikoaren kontzertu sinfonikoa, Kobetamendiko historia markatu duten kantuen berrinterpretazioan. Proposamen honetan, jaialdiaren soinuzko memoriaren zati bat orkestra-formatura ekarriko dugu.

Errepertorioan, Bilbo BBK Live jaialdiko publikoaren imajinario kolektiboaren parte diren artisten irakurketa berriak entzungo ditugu: The Cure, Depeche Mode, Arcade Fire, Pulp, Radiohead, The Strokes, Florence + The Machine, Muse, R.E.M., Guns N’ Roses, Coldplay edo Rosalía, besteak beste. Jaialdiak utzitako ondareari egindako soinuzko omenaldia, ikus-entzuleen, denboren eta emozioen arteko zubiak eraikitzen jarraitzeko pentsatua. Sarrerak 18 eurotik 30 eurora bitarteko prezioa dute eta salgai daude jada jaialdiaren webgunean.

HERRIAN, HIRIAN ETA MENDIAN: MUSIKA, LURRALDEA ETA KOMUNITATEA OSPATZEKO HIRU EGUN

Ohiturari jarraikiz, Bilbao BBK Live jaialdia Bizkaian barrena ibiliko da ostera ere, Kobetamendiko edizioaren aurretik. 2026an ere, Herrian eta Hirian jaialdiaren atariko perfektuak izango dira, inpaktua dakarren funtsezko ondasun den aldetik, proiektuak kulturarekin duen konpromisoa areagotuta. Herrian BBK Banku Fundazioaren, Kreatibo Industriak Fundazioaren eta Bilbao BBK Live jaialdiaren arteko elkarlanaren fruitu da, eta maiatzaren 30ean Durangon egingo da aurtengo edizioa; zuzeneko musika Durangoko kaleetara iritsiko da, sarrera libre izanik, hamar bat talderen eskutik. Astebete geroago, ekainaren 6an, Hirian ekimenaren barruan, Bilboko San Inazio auzoko kaleak kulturaz eta aniztasunez beteko dira, doan, hiru agertokitan eta 20 artista ingururekin. Oinarrizko kultura eta auzo-nortasuna aldarrikatzen dituen ekitaldia da.

Ekainaren 7an, 20. urteurrenaren programazio berezia Kobetamendiko gailurrera igoko da Mendian ekimenerako, aurtengo berrikuntza nagusietako bat izanik. Musikaren eta gozamenaren sinonimotzat jotzen den leku batean, eguneko eta sarrera libreko ekitaldi honetan natura auditorio bihurtuko den eguna proposatzen da. Ekitaldia Kobetamendi Irteerarekin hasiko da, pasealdien eta entzutearen bitartez ingurunearekin berriz konektatzeko gonbidapena, bi proposamen paregaberi esker: aire zabaleko kontzertu sinfoniko bat, non publikoak denbora errealean ezagutu ahal izango duen, aplikazio interaktibo baten bidez, Barrokotik XX. mendera bitarteko musika-ibilbidea; eta duela hamarkada bat baino gehiago Paraguain sortutako Cateurako Birziklatuen Orkestra talde mitikoaren emanaldia; birziklatutako instrumentuekin sortzen dute musika, zaurgarritasunaren eta gizarte-bazterketaren aurkako bitarteko izanik, eta mundu osoan barrena mugitzen dira beren mezua ezagutzera emanez. Musika klasikoa, askotariko komikoak, eta instrumentu atipikoekin eta birziklatutako materialekin egindako musika-sorkuntzaren proposamenak uztartuta, Mendian programazioan kultura bizitzeko beste modu bat aldarrikatzen da: irekiagoa, partekatuagoa eta ingurunearekin sintonian.

BILBO JOKOAN: HIRIA JOKALEKU

Ekainean, hiria agertoki bihurtuko da berriro Bilbo Jokoan barruko FIBA 3×3 txapelketa ofizialarekin; hilaren 12an, 13an eta 14an izango da Bilboko erdigunean. Bizkaiko Foru Aldundiarekin eta Bilboko Udalarekin batera antolatutako nazioarteko txapelketa hori erreferente izateko bokazioarekin sortu da, kirol-arlotik haratago doan aldetik: musika eta arte urbanoa ere biltzen ditu. Hiru egunez, saskibaloiak espazio publikoa hartuko du, kultur erakustaldiekin eta sormenezko proposamenekin batera; izan ere, kirola, musika lez, komunitatea eratzen duen hizkuntza kolektiboa baita. Ekimen horrekin, Bilbao BBK Live jaialdiak presentzia handiagoa izango du hirian, kulturaren, gazteen eta espazio urbanoaren arteko zubi-lanak eginez.

20. URTEURRENAREN KLIMAXA: BEREZIAK ETA BILBAO BBK LIVE

20. urteurrenaren ospakizun gorena uztailaren 9an, 10ean eta 11n izango da, Bilbao BBK Live jaialdiarekin: hiriaren bihotza eta Kobetamendi gailurra besarkatuko dituen hitzordu bikoitza.

Horren atariko, uztailaren 8an, asteazkena, José González musikariak kontzertu oso berezia eskainiko du Guggenheim Bilbao Museoan, Museoarekin berarekin elkarlanean antolatuta, Bereziak programazioaren barruan; aurtengo edizioari hasiera emango dion kontzertu esklusibo bat, hiriko gune enblematikoenetako batean. Folk garaikidearen erreferente den suediar-argentinar artistak estilo intimo eta soila du, eta bere soinu-unibertsoa ingurune horretarako bereziki pentsatutako formatu batera ekarriko du, urteurrenaren bereizgarri den lotura eginez musikaren, arkitekturaren eta hiriaren artean. Sarrerak salgai daude jada bilbaobbklive.com webgunean, eta edukiera mugatua izango da. Hurrengo egunean, Bereziak programazioa Bilboko hainbat tokitara zabalduko da berriro; doako kontzertuak izango dira, jaialdiaren espiritua hiriaren pultsuarekin konektatuta eta herritarren, musikaren eta ondarearen arteko topagune berriak sortuta.

Bestalde, Bilbao BBK Live jaialdiaren orain arteko ediziorik bereziena izango da: hiru egun ahaztezin, Kobetamendi ospakizun partekatu baten epizentro bihurtuko dutenak. Musikaren, naturaren eta komunitatearen bitartez, aurtengo edizioa azken bi hamarkadetan bizi izandako guztiaren omenaldi izango da, eta ate berriak irekiko dizkio etortzeko dagoenari. Lehendik baieztatutako artista handiak ez ezik, hala nola Robbie Williams, David Byrne, FKA twigs, Lily Allen, Dani Fernández, IDLES edo Interpol, oraindik jakinarazi ez diren sorpresa ugari ere izango ditugu 20. urteurreneko esperientzia errepikaezin honetan.

CALLE LATINA: ERRITMOAK, ZAPOREAK ETA KOMUNITATEA BILBOREN BIHOTZEAN

20. urteurreneko programazio bereziaren lehen aurrerapen hau amaitzeko, beste ekitaldi berri bat txertatuko dugu urteurrenaren egutegian: Calle Latina 2026ko urriaren 24 eta 25ean ospatuko da, eta Bilboko Alde Zaharreko kaleak Latinoamerikaren eta Europaren arteko topagune bihurtuko dira. Latinoamerikako auzoetan nagusi izaten den jai-giroko espiritu komunitarioa izanik inspirazio-iturri, ekitaldiak musikaz, zaporez eta herri-kulturaz beteko du hiriaren erdigunea. Asocolvas elkartearen eta Mulisol GKEaren laguntzarekin, Calle Latina ekimena eszena alternatibo latinoaren aberastasunaren ospakizun izango da: reggaeton, dembow, afrobeat, saltsa, cumbia, hip hop, trap eta guaracha erritmoak, diasporako artisten eskutik, baita jada bertakotuta daudenen eskutik ere. Proposamena osatzeko, askotariko eskaintza gastronomikoa eta jarduera irekiak izango ditugu, bi egunez bizikidetzaren, identitate partekatuaren eta kultur ospakizunaren esperientzia bizi ahal izateko. Sarrera doan izango da.

ZINEMA MUNDUA ALDATZEKO

20. urteurrenari lotutako programazioaren barruan, joan den otsailean BBK Aretoan 2030 BAI! zinema-zikloa antolatu genuen BBK Banku Fundazioarekin, Eusko Jaurlaritzako Berrikuntza Sozialaren eta 2030 Agendaren Zuzendaritzarekin eta Donostia Zinemaldiarekin batera. Lau proiekzioetan —Maspalomas, La voz de Hind Rajab, Yo, Capitán eta Belén— sarrerak agortu ziren, eta giza eskubideei, jasangarritasunari eta erronka sozial garaikideei buruz solasean aritzeko guneak sortu ziren. Ekimen horrekin, Bilbao BBK Live jaialdiaren dimentsio kulturala indartu zen hirian, bere konpromisoa musikatik haratago zabalduta.

Bilbao BBK Live jaialdiaren antolatzaileok gure esker ona adierazi nahi diegu, bereziki, Bilboko Udalari, BBK Banku Fundazioari eta Repsol, San Miguel eta Jhonnie Walker etxeei, proiektu hau gauzatzeko ezinbestekoa baita haien guztien laguntza, gainerako babesle eta laguntzaileekin batera. Gainera, ez dugu ahaztu behar, jaialdiaren 20. urteurrenaren esparruan, Espainiako Gobernuak Aparteko Interes Publikoko Gertaera izendatu duela jaialdia, eta izendapen hori kultura-arloan garrantzi berezia eta nazioarteko proiekzioa duten ekimenek jasotzen dute, kulturan eta turismoan duten eragina eta egindako ibilbidea aintzat hartuta.

SARE SOZIALAK:

• BILBAO UDALA: YOUTUBE | FACEBOOK | X | INSTAGRAM | TIK TOK
• BILBAO EKINTZA: YOUTUBE I FACEBOOK | X | INSTAGRAM

• Bilboko Udalak bertoko Aste Santuan antolatzen duen Bilbao Basque FEST jaialdiak edizio berri bat aurkeztu du, nobedade azpimarragarriekin: horien artean, aipatzekoa da aurtengo jardunaren zati handi bat “Euskal Kulturaren Plaza” deitu zaion gunean zentralizatuko dela, hau da, Areatzako Kaian kokatutako eremu berri batean; bertan, publikoak hainbat ekitaldiz gozatzeko aukera izango du, hala nola showcookingekin egingo diren jarduera gastronomikoez, Neomak, Korrontzi eta Anne Etchegoyenen kontzertuez, Herri Kirolez, eta lehenengo “Bilbao Basque Fest sariaz”, hots, bikote mistoekin egingo den pentatloi-erronka handi batez.

• Orobat, Plaza Berria berreskuratuko da folklorearen bihotz bezala, bertan erromeriak egingo baitira, Aiko Taldearen eta Patxi eta Konpainaren eskutik; horrez gain, Itsasadarreko kirolari helduko zaio berriZ, familiei zuzendutako batel-arraunketarekin.

• Emakumezkoen ahotsek ekitaldien zati handi bat protagonizatuko dute Azkuna Zentroan eta Areatzako Kaian, “Euskal Kulturaren Plazaren” barruan.

• Gar, Mugan eta Bisai taldeek Bilborocken eskainiko dituzten emanaldiek indartu egingo dute jaialdiak publiko gazteekin duen konexioa, eta Kafe Antzokia bor-bor egongo da berriro “Bilbao Basque FEST Rock City” zikloarekin.

Bilbao basque FESTek, Bilboko Udalak Aste Santuko egunetan antolatzen duen euskal kulturaren erakusleiho handiak, edizio honen programazioa aurkeztu du gaur; berau apirilaren 1etik 4ra bitartean garatuko da, eta berriz ere doakoa izango da, publiko guztientzat diseinatutako jarduerekin.

Erreferentziazko hiri-jaialditzat hartuta, oraingoan bere “funts benetakoenera” itzultzeko helburuarekin dator berriro, nobedade azpimarragarriekin eta hiriko hainbat gunetan gauzatuko diren jarduerekin, betiko sei ardatz tematikoetan sailkatuta: Musika, Kultura, Zinema, Market, Gourmet eta Sport.

Bilboko Udalaren Garapen Ekonomiko, Merkataritza, Turismo eta Enplegu Saileko Zinegotzia Kontxi Claverrek azaldu duenez, jaialdiaren nobedade garrantzitsuenetako bat da bere eskaintzaren zati handi bat “Euskal Kulturaren Plaza” deritzan gunean kontzentratuko dela; berau eszenatokia duen espazio berri bat da, Areatzako Kaian kokatuko dena eta edizio honetako epizentro nagusia izango dena, musika askorekin, Herri Kirolekin eta showcookingak barne hartuko dituzten jarduera gastronomikoekin.

 “Gaur hiri-jaialdi bat baino zerbait gehiago aurkezten dugu –esan du-: Bilbao Basque FEST kultura, musika, tradizioa eta sormena biltzen ditu. Edizio honetan, identitate eta funtsa berreskuratuko ditugu, benetako begirada bat, basque peto-petoa, nor garen eta hori nola kontatu nahi dugun erreibindikatzen duena. Eta programazio musikal oso erakargarri batez egiten dugu, kalitatezko proposamenekin, izen handiekin, gorantz doan talentuarekin, eta emakumeek eszenatokietan presentzia izatearen aldeko apustu batekin. Lau egun izango dira, eta aldi horretan musikak topaguneak beteko ditu, hiri bizidun, aktibo eta sutsu bat sortuz, bai herritarrentzat eta bai bisitarientzat”.

EMAKUMEZKOEN AHOTSAK, MITO HANDIAK ETA TALENTU BERRIAK

Edizio honetako kartel musikalaren protagonista nagusiak emakumezko artistak, euskal musikaren klasikoak eta talentu berriak izango dira. Azkuna Zentroak jaialdiaren hasiera hartuko du, apirilaren 1ean, 19:00etan, Anje Duhalderen inaugurazio-kontzertuarekin; euskarazko rockaren eszenaren funtseko figura horrekin batera, Niko Etxart egongo da. Ostegun eta ostiralean, oraingo panorama iraultzen ari diren ahotsak gehituko zaizkie: Olaia Inziarte, musika elektronikoa eta popa nahasten dituen “Zura” proiektuarekin, eta Maren bilbotarra. Bilboko Udal Txistulari Bandak -Garazi Navas akordeoian arituz- eta Oinkari Dantza Taldeak ‘Zertzeladak’ protagonizatuko dute.

Jaialdiaren epizentro berria, Areatzako Kaian kokatutako “Euskal Kulturaren Plaza”, nazioarteko proiekzioa duen Anne Etchegoyen artistaren saioaren eszenatokia izango da (apirilaren 4an, larunbata), eta hor arituko dira, halaber, Korrontzi taldea, bere folk berrituarekin, eta baita Neomak ere, bere fusio elektronikoarekin.  (apirilak 2, osteguna)

Bilborock-ek Gar, Mugan eta Bisairen soinu freskoagoen alde egingo du. Erritmo elektrikoak maite dituztenentzat, Kafe Antzokia bor-bor egongo da “Bilbao Basque FEST Rock City” zikloarekin, Txarly Usherren punk undergroundetik The Cherry Boppersen jazz-funkera bidaiatuz.

GASTRONOMIA, ESPERIENTZIA FORMATUAN

Euskal gastronomia sukaldaritza konbentzionaletik urruntzen da, publikoarengana modu dinamikoan hurbiltzeko. Jaialdiaren barruan “Euskal Kulturaren Plaza” deitu zaion eremuan, Areatzako Kaian, “showcooking bus” bat sukaldaritzako laborategi bihurtuko da. Jaialdiaren egun zentraletan, zuzeneko erakustaldiak egingo dira (showcookings), bertaratzen diren pertsonek sasoiko produktu batzuei buruz ikasi ahal izan dezaten.

KALE BIZIAK, BERE HISTORIA KONTATZEN DUEN HIRI BATEAN

Edizio honetako bloke kulturala diseinatuta dago publikoak euskal identitatea ezagutu dezan askotariko ikuspegi parte-hartzaileetatik. Zazpikaleak antzoki ibiltari bihurtuko dira Hortzmuga Teatroaren “Anfitrioiak” obrarekin; hala, umore eta musikaren bitartez, taldea bertaratzen diren pertsonak gidatuko ditu Hiribilduko bazter enblematikoenetatik, 12:00etan egunero eskainiko dituen saioetan.

Herri dantzak bere esparru naturala berreskuratuko du Plaza Barrian, erromeriak jende guztia dantzatzera gonbidatuko baitu bertan. Patxi eta Konpainaren “Dantza Piko” metodoarekin, eszenatokiaren eta plazaren arteko barrerak apurtuko dira, eta Aiko Taldeak gizarte-gozamenean oinarritutako erromeria espontaneo bat proposatuko du.

Arriaga Plazan, berriz, “Urbasa” ikuskizunak esperientzia sentsorial zirraragarri bat eskainiko du: zirkoaren eta txalapartaren arteko fusio bat, Hutsun eta Ortzik sortua, gizakiaren eta naturaren arteko orekaz hausnartzen duena. Gune berean, ‘Txalaparta hutsa’ kontzertu didaktikoa egingo da, eta baita perkusio tailer batzuk ere.

Beste alde batetik, Guggenheim Bilbao Museoko zabalguneak Ondalan konpartsaren erraldoien handitasuna hartuko du -Txakolinaria edo Sirgaria moduko irudiekin-, eta baita Bizkaiko Dantzarien Biltzarrak koordinatutako euskal dantza tradizionalak ere.

Txikienek Gargantua pertsonaia ikonikoaren barneko txirristaz gozatu ahal izango dute, Euskal Kulturaren Plazan, Areatzako Kaian; bertan, haien zain egongo da, mahai-tresnak prest eta ahoa ondo irekita.

Gainera, hiriko museoen sareak bat egingo du goi mailako proposamenekin: Bilboko Arte Ederren Museoak bere euskal artearen bilduma osoa erakutsiko du (Oteiza, Chillida eta Zuloagaren obrekin, beste askoren artean); Guggenheim Bilbao Museoak, berriz, “Lurraren Arteak” erakusketa aurkeztuko du, Agustin Ibarrola, Mar de Dios eta Asier Mendizabal euskal artisten parte-hartzearekin -beste batzuen artean-; eta Itsasmuseum-ek euskal industrializazioaren aztarnak omenduko ditu ‘Ars ex industria’ erakusketarekin; horiez gain, Rekalde Aretoa, Eleiz Museoa, Arkeologi Museoa, Athleticen Museoa eta Euskararen Etxeak ere euren proposamenak aurkeztuko dituzte.

HERRI KIROLAK: INDARRA, TREBETASUNA ETA TRADIZIOA

Sport izeneko blokea jaialdiaren nortasun-ikur nagusietako bat izango da, zeren herri kirolak ekarriko baititu udalerrietako herri jaietatik Bilboko erdiguneraino. Areatzako Kaia Herri Kirolen erakusleiho handia izango da, zeren eta, bertan, aizkolaritza, harri-jasoketa eta trontza -beste batzuen artean- adrenalina hutseko ikuskizun bezala aurkeztuko baitira.

Edizio honetako kirol ekitaldi garrantzitsuena “I. Bilbao Basque FEST Saria” izango da, apirilaren 4an, larunbata, 18:30ean. Pentatloi mistoko lehiaketa ofizial bat da, non gizonen eta emakumeen bikoteek aurre egingo baitiete elkarri, aurreneko aldiz, zenbait modalitate uztartzen dituen proba zorrotz batean, jaialdiaren lehenengo saria lortzen saiatzeko.

Herri Kirolen programazioak honako hau sartzen du barne:

• Desafioak eta erakustaldiak: sokatira, orga jokoa, harri-jasoketa, zura altueran moztea eta harri-zulatzaileen erronkak, publikoaren parte-hartzeari irekitako uneekin.
• Emakumezkoen boterea: Fardelak altxatzeko eta jaurtitzeko desafio espezifiko bat, aizkolaritza erakustaldiekin batera, emakumeek protagonizatuta.
• Familia-jarduerak: Goizez eta arratsaldez, Areatzako Kaiko Euskal Kulturaren Plazak herri kirolen eta joko tradizionalen tailerrak hartuko ditu; familientzat diseinatuta egongo dira, diziplina horien oinarrizko teknikak modu ludikoan ikasi ditzaten.

Asfaltorik kanpo, jarduera itsasadarrera mugituko da. Pio Barojako pantalanean, jaialdiak arraunlari bihurtzera gonbidatzen ditu bisitariak, batel-arraunketarekin. Jarraibide teknikoak jaso ondoren, familiek entrenamenduak egin ahal izango dituzte, eta horren ostean amaierako estropada liluragarrietan arituko dira, kirola eta uretako kultura esperientzia berdingabe batean batuz.

MARKET: BENETAKOTASUNA EROSTEAREN PLAZERA

Euskal funtsaren puska bat eraman nahi dutenentzat, Market sailak kalitate paregabeko erakusleiho bat zabalduko du, bertokoaren balioa ezagutzera gonbidatuz. Hiriko azoka tradizionalak, horien artean Erriberako Azoka, Gure Lurreko Merkatuari atxikiko zaizkio, baserritarren Km0-ko produkturik onenak aurkezteko, eta baita “Eskuartie” Artisautza Azokari ere, honek eskuz egindako zeramika, larru eta zurezko pieza bereziak eskainiko baititu.

‘GAUA’, ZINEMA SAILAREN IZARRA

Paul Urkijoren “Gaua” film luzearen proiekzioa -bere hirugarren film luzea da- Zinema sailaren protagonista izango da BKK Salan. Euskara hutsez filmatuta eta XVII. mendean girotua, filmak sorgin-ehizaren eta antzinako kontakizunen giro limurtzaile batean murgiltzen ditu ikusleak. Urkijoren obra hau -bera Irati filmaren zuzendaria ere bada-, 2025ean estreinatua, tradizioa, mitologia eta izua uztartzen dituen esperientzia liluragarri bat izango da, nonbait.

Programazio guztia eskuragarri dago hemen:  https://basquefest.bilbao.eus/

SARE SOZIALAK:

• BILBOKO UDALA: YOUTUBE | FACEBOOK | TWITTER | INSTAGRAM
• BILBAO EKINTZA: YOUTUBE I FACEBOOK | X | INSTAGRAM
• BILBAO TURISMO: YOUTUBE | FACEBOOK | TWITTER | INSTAGRAM

• Westside Cowboy, Vampirina Club by Metrika & D.Basto, Hotcore Party: Taichu and Friends, La Paloma eta BARRRK gehitu zaizkio jaialdiko kartelari.

• Jaialdiaren 20. urteurrena ospatzeko edizio historikoa izango da aurten, 2026ko uztailaren 9an, 10ean eta 11n, ohiko kokalekuan: Kobetamendi.

• Bonuak salgai daude oraindik jaialdiaren webgunean

Bilbao BBK Live jaialdian arituko diren artista gehiago ezagutarazten ari dira, 2026ko uztailaren 9an, 10ean eta 11n Kobetamendin izango den 20. urteurreneko ediziorako. Lehendik iragarrita zeuden artistei gehitu zaizkie orain Calvin Harris, Dellafuente, hemlocke springs, Westside Cowboy, La Paloma eta BARRRK, baita bi proposamen berezi ere, hala nola Vampirina Club by Metrika & D.Basto eta Hotcore Party: Taichu and Friends; horiei esker, jaialdiaren esperientzia klub-giroaren lurraldera eta ospakizun kolektibora zabalduko da. Iragarritako azken artista horiek ikusita, argi dago jaialdiaren hogeigarren urteurrenaren ezaugarrietako bat irekitasuna izango dela, berriro ere: kartelean biltzen dira, alde batetik, nazioarteko izen handiak, hala nola Robbie Williams, Lily Allen, Charlotte de Witte, David Byrne, IDLES, Alabama Shakes edo Interpol, eta, bestetik, kultur fenomeno garaikideak eta egungo eszenako ahots berrienak; zalantzarik gabe, musika-aniztasuna da Bilbao BBK Live jaialdiaren bereizgarri.

Iragarritako azken artistetako bat Calvin Harris da, azken bi hamarkadetan musika elektronikoan eragin handienetakoa izan duen ekoizle eta DJ. Mundu osoan arrakasta lortu duten ekoizpenez gain, pop garaikidearen soinua definitu duten kolaborazioak ere egin ditu eskoziarrak, eta klubaren energia jaialdi handien eskalarekin konektatzen duen errepertorioarekin etorriko zaigu Kobetamendira.

Dellafuente artista ere gehitu zaio zerrendari, Estatuko egungo musikan eragin oso handia duen figura berezi-berezia. Granadako artistak uda honetarako bereziki sortutako showa aurkeztuko du Bilbao BBK Live jaialdian, ikuspegi organikoago batekin eta bere azken lanaren soinu-unibertsoa izanik ardatz. Musika Folkloriko Atenporalaren sortzaile, Dellafuentek bere ibilbide propioa eratu du genero urbanoak eta tradizioa ikuspegi biziki pertsonal batetik uztartuta. Hamarkada bat baino gehiagoko ibilbidean Torii Yama proiektu esanguratsua, besteak beste, merkaturatu ostean, artistak kulturaren arloan duen eragina musikaz haratago doa; azkenaldian, Madrilgo Riyadh Air Metropolitano Estadioan kontzertu historikoak eman ditu, eta DELLAFUENTE – RIP DREAMS erakusketa aurkeztu du, Espainiako musika garaikidearen ikono kultural handienetako bat dela argi ikusarazten duen sormen-ziklo bat ixteko.

Jaialdiko programazioan badute tartea pop eta rock alternatiboaren orainaldia definitzen ari diren nazioarteko ahots berriek ere. Azken urtean ezagutzera eman den artista garrantzitsuenetako bat hemlocke springs izan da, denboraldiko disko handienetako batekin, eta Estatuan ez ezik, Europan ere lehen aldiz arituko da zuzenean Bilbao BBK Live jaialdian. Westside Cowboy britainiar taldea ere izango dugu oholtza gainean; zirkuitu independenteetan asko aipatzen den taldea da, indie rock musikaren barruan belaunaldi berriak erakartzea lortu baitu.

Jaialdiak, gainera, bi proposamen berezi izango ditu, zuzenekoaren esperientzia klub-giroaren lurraldera zabaltzeko pentsatuak. Vampirina Club by Metrika & D.Basto proposamenean, Castelloko artistak agertokia komunitate-espazio bihurtuko du bere crew eta bere DJrekin batera, Metrika eszena berriko fenomeno berezienetako bat bihurtu duen unibertso estetikoa eta soinu-unibertsoa anplifikatuta. Bestalde, Hotcore Party: Taichu and Friends festa bat izango da, artista argentinarra izanik buru; jaialdiko agertokietako bat ixteaz arduratuko da bere soinuzko imajinario performatiboaren ildoari jarraituko dion saio esklusibo batekin.

Beste bi artista aipatu behar ditugu azken sorta hau osatzeko,  jaialdiak talentu hasiberrien eta bertako ahots berrien alde egiten duen apustuaren adierazgarri: La Paloma eta BARRRK; lehenak bere ibilbidea zabaltzen jarraitzen du bere bigarren albumaren aurkezpenarekin, eta bigarrena, berriz, euskal eszenan azkenaldiko sentsazioetako bat da.

Osasun mentaleko arazoengatik, Carpetmanek ezin izango du azkenik Bilbao BBK Liven jo, eta denboraldi batez agertokietatik aldenduko dela iragarri du.

Hogei edizio musikaren eta lurraldearen zerbitzura

Kobetamendiko ingurune naturalean kokatuta eta Bilbo bere oinetan duela, Bilbao BBK Live jaialdiaren 20. edizioa 2026ko uztailaren 9an, 10ean eta 11n izango da, musikaz haratago doan jaialdiaren ikuspegia sendotuta. Bi hamarkadatan, belaunaldi, estilo eta eszenen topagune izan da mendia, edizio bakoitzean paisaiaren, kulturaren eta komunitatearen arteko elkarreragina areagotuta.

Bilbao BBK Live jaialdiaren antolatzaileok gure esker ona adierazi nahi diegu, bereziki, Bilboko Udalari, BBK banku Fundazioari eta Repsol eta San Miguel etxeei, ekitaldi hauek gauzatzeko ezinbestekoa baita haien guztien laguntza, gainerako babesle eta laguntzaileekin batera.

Jaialdirako bonuak salgai daude oraindik jaialdiaren webgunean, prezio berezian martxoaren 17ko (asteartea) 11:00ak arte.

•  Bonuen eskaintza: 160 € +gastuak, martxoaren 17ko (asteartea) 11:00ak arte.
•  Bonua + kanpina (4 gau): 198 € +gastuak, martxoaren 17ko (asteartea) 11:00ak arte.
•  Kuadrilla Bonua (5 bonu erosiz gero, 6. bonua opari): 133 € +gastuak, martxoaren 17ko (asteartea) 11:00ak arte.
• Kanpina 4 gau: 38 € + gastuak
• 11 urtetik beherakoek sarrera doan (formulario bat bete behar da aldez aurretik)

Salmenta hemen: bilbaobbklive.com eta Fever Up

#bilbaoBBKlive #bilbaoBBKlive2026

bilbaobbklive.com

BILBAO BBK LIVE – 20. urteurrena

2026ko uztailak 9, 10, 11

Kobetamendi, Bilbo

ARTISTAK ALFABETIKOKI ORDENATUTA

AIMARZ

ALABAMA SHAKES

AMORE

APPARAT

BARRRK

BB TRICKZ

BELÉN AGUILERA

BELLE AND SEBASTIAN

CALVIN HARRIS

CERVATANA

CHARLOTTE DE WITTE

CMAT

DANI FERNÁNDEZ

DAVID BYRNE

DELLAFUENTE

DEPRESIÓN SONORA

DON WEST

FATOUMATA DIAWARA

FOLK BITCH TRIO

GAR

HEMLOCKE SPRINGS

HORSEGIIRL

HOONINE

HOTCORE PARTY: TAICHU AND FRIENDS

IDLES

INTERPOL

JUICY BAE

LA M.O.D.A

LA PALOMA

LAS PETUNIAS

LILY ALLEN

MARTE LASARTE

MIETZE CONTE

MIND ENTERPRISES

NU GENEA LIVE

PARIS PALOMA

QUERALT LAHOZ

RALPHIE CHOO

RICHIE HAWTIN DEX EFX X0X

ROBBIE WILLIAMS

SARA ZOZAYA

SOULWAX

SUAVE

THEE SACRED SOULS

TOMORA

VAMPIRINA CLUB BY METRIKA & D.BASTO

WESTSIDE COWBOY

XOEL LÓPEZ

YERAI CORTÉS

ZAZ

…

• Edizio honetarako sortutako Bilbao All Star Blues Band taldeak blues estatubatuarreko benetako pisu astunak bilduko ditu, hala nola Willie Buck edo Bob Stroger mitikoa, azken honek jaialdiaren sari berezia jaso zuen 2022an.  The Cherry Boppers taldeak Patricia Reckless, Judith Hill, Ivan Singh eta Mark Hummel artistekin batera Areatzako agertoki nagusian joko du. Blues Train, Ian Siegal eta Skyler Saufley Areatzako Kioskoan egingo diren kontzertuen protagonistak izango dira.

• Guggenheim Bilbao Museoak ‘Pioneras feministas por la abolición de la esclavitud’ hitzaldia hartuko du, TopArte programaren barruan.

• Bilboko Udalak sustatutako nazioarteko erreferentziazko ekitaldi hau uztailaren 24, 25 eta 26an egingo da, sarrera guztiz doakoa izango delarik

Bilbao Blues Festival jaialdiaren bosgarren edizioarekin, bluesaren doinuek berriro ere beteko dute Areatza uztailaren 24, 25 eta 26an. Bilboko Udalak sustatutako doako hitzordu honek generoaren izen handiak, nazioarteko erreferenteak eta tokiko talentua bilduko ditu bere agertoki nagusian. Kartelaren buru Bilbao All Star Blues Band izango da, jaialdirako bereziki sortutako taldea eta honako artistek osatzen dute: Bob Stroger baxu-jotzaile eta abeslari mitikoa (Bilbao Blues Festival saria 2022an), Willie Buck (ahotsa), Teeny Tucker (ahotsa), Jimi Primetime Smith (gitarra), Anthony Geraci (pianoa), Wes Starr (bateria) eta Bob Corritore (harmonika).

The Cherry Boppers talde bilbotarrak hasiera emango dio bosgarren edizio honetako programazioari, uztailaren 24an, Patricia Reckless abeslariarekin batera, zuzeneko indartsu eta bizia eskainiko dute. Judith Hill, Ivan Singh eta Mark Hummel ere ariko dira Areatzan kokatutako Keler agertokian. Artista bikain hauei Travellin’ Brothers taldea gehituko zaie, ibilbide luze eta arrakastatsuagatik jaialdiaren saria jasoko baitu.

Jaialdiaren bigarren gunea, Areatzako Kioskoa, intentsitatez beteko da Blues Train, Ian Siegal eta Skyler Saufley artisten emanaldiekin. Kontzertu hauek blues garaikidearen adierazpide desberdinak publikoarengana hurbilduko dituzte.

EGITARAUA

THE CHERRY BOOPERS ETA PATRICIA RECKLESS- UZTAILAK 24, OSTIRALA 19:00 (KELER AGERTOKIA)

Duela 20 urte baino gehiago sortua (2004an), rhythm & blues, funk, soul edo jazz musikaren banderapean, The Cherry Boppers bilbotar konboak irekiko du Bilbao Blues Festival jaialdia. Talde instrumental beteranoaren eta Patricia Reckless abeslariaren arteko elkarlanetik sortu da “The Cherry Boppers meet Patricia Reckless” proiektua. 2024an grabatutako azken lanean soul-funk erritmo indartsuetara hurbiltzen dira, eta dantzarako gonbita egiten duen zuzeneko energetikoarekin nabarmentzen dira.

MARK HUMMEL- UZTAILAK 24, 20:45 (KELER AGERTOKIA)

Mark Hummel (1955, New Haven, Connecticut) harmonika-jotzaile eta abeslaria historiako harmonika-interpretatzaile onenetakotzat jotzen da. Hummel, Bilbao Blues Festivalera bere talde bikainarekin iritsiko da, Anson Funderburgh (gitarra), Bob Hall (pianoa), Ted Bukowski (baxua) eta Wes Starr (bateria) osatua. Guztiek generoko kondairekin grabatu eta eszenatokia partekatu dute, horregatik, benetako blues “all star” taldea osatzen dute.

JUDITH HILL- UZTAILAK 24, 22:30 (KELER AGERTOKIA)

Abeslari aparta izateaz gain, Judith Hill (1984, Los Angeles) konpositore, moldatzaile eta multiinstrumentista bikaina da. Artista handienekin korista gisa aritu da, hala nola Michael Jackson, Carole King, Prince, George Benson edo Elton John artistekin, eta Eric Clapton, Stevie Wonder, Johnny Mathis edo Gregg Allman bezalako musikariekin ere kolaboratu du. Judith, Grammy sariaren irabazlea, ahots indartsua du, eta estilo askotara moldatzeko gaitasun handia erakusten du: rhythm & blues, funk, jazz edo rock, blues eta gospel eragin nabarmenekin.

IAN SIEGAL ELECTRIC BAND- UZTAILAK 25, LARUNBATA, 12:30 (VOLOTEA GUNEA (AREATZAKO KIOSKOA)

Ian Siegal (1971, Portsmouth, Erresuma Batua) blues abeslari, konpositore eta gitarrista britainiarrak ikuskizun ikusgarria agintzen du Bilbao Blues Festivaleko agertokian bere ‘Electric Band’ taldearekin. Bere indargune nagusia, zalantzarik gabe, zuzenekoa da, agertokian erakusten duen presentziak pasioa, indarra eta energia handia transmititzen ditu.

Ian Siegal bluesetik abiatzen da batez ere, baina trebezia handiz mugitzen da rock, country edo folk estiloko lurraldeetara ere. “MOJO” aldizkari entzutetsuak “Erresuma Batuko blues konpositorerik adimentsuena eta interprete magnetikoena” dela esan du. Bere ibilbidean jasotako aitortzen artean daude bi UK Blues Awards, zortzi British Blues Awards, lau European Blues Awards eta hiru izendapen USA Blues Music Awards sarietan.

BLUES TRAIN- UZTAILAK 25, LARUNBATA, 14:00 (VOLOTEA GUNEA – AREATZAKO KIOSKOA)

Blues Train blueseko backing band indartsua da, musikari finkatuek osatua, bakarlari handiei laguntzen die proiektu ibiltari batean, 50 eta 60ko blues elektrikoko klasikoen errepertorioarekin, kalitate, erritmo eta ikuskizun handiko showak eskainiz. Txako Jones (ahotsa), Alex Caporuscio (gitarra), Mingo Balaguer (harmonika eta ahotsa), Paul San Martin (pianoa), Jorge Otero “Jafo” (baxua eta kontrabaxua) eta Adrián Carrera (bateria) osatzen dute taldea.

IVAN SINGH- UZTAILAK 25, LARUNBATA, 19:00 (KELER AGERTOKIA)

Córdobatik (Argentina) Chicagora. Hori da Ivan Singh gitarra-jotzaile eta abeslari gazteak egin duen bluesaren bidea, bere belaunaldiko musikaririk ezagunenetako bat bihurtzeraino. Bere gaitasun handiak bluesaren hiriburua (Chicago, Illinois) konkistatzera eraman du, Adela izeneko lau sokako slide gitarra bereziarekin lagunduta, “lata de batata” izenez ezagutzen denarekin. Gaztea izan arren, jada Buddy Guy eta Christone “Kingfish” Ingram bezalako musikariekin partekatu du agertokia, eta Amerikako, Asiako eta Europako hainbat herrialdetan jo du. Rolling Stone aldizkariak honela deskribatu du: “bluesa bizirik mantentzen duen artista, estilo fresko eta pertsonalarekin”.

BILBAO ALL STAR BLUES BAND- UZTAILAK 25, LARUNBATA, 20:45 (KELER AGERTOKIA) ETA UZTAILAK 26, IGANDEA, 14:00 (VOLOTEA GUNEA – AREATZAKO KIOSKOA)

Bilbao Blues Festivalerako bereziki diseinatutako banda estelar hau blues estatubatuarreko benetako pisu astunek osatzen dute. Taldea honako hauek osatzen dute: Willie Buck (ahotsa), Bob Stroger (baxua), Teeny Tucker (ahotsa), Jimi Primetime Smith (gitarra), Anthony Geraci (pianoa), Wes Starr (bateria) eta Bob Corritore (harmonika). Instrumentista eta abeslari talde handi honek beraien artean dagoen kimika natural paregabea eta estiloaren garbitasuna erakusten dituzte, bluesa maila apartara eramanez. Taldeko kideen artean Bob Stroger dago, 95 urtekoa, jaialdiaren lehen edizioan, 2022an, Bilbao Blues Festival saria jaso zuena.

TRAVELLIN’ BROTHERS- LARUNBATA, UZTAILAK 25, 22:30 (KELER AGERTOKIA)

Travellin’ Brothers taldeak 1.300 kontzertu baino gehiago eta 11 disko ditu bere ibilbidean. Europa osoko klub eta aretoetan jo dute, eta AEBetan egindako biretan euren musika New Orleanseko Frenchmen Street kaleko areto mitikoetara eraman dute, hala nola BMC edo Bluenile aretoetara, baita Memphisko Beale Street ospetsuko BB King Club, 152 Club edo New Daisy Theatre aretoetara ere, edo Memphisko Orpheum Theatre handira. Halaber, Clarksdale (Mississippi) hiriko Reds Juke Joint aretoan jo dute, eta Texasko hainbat klub eta aretotan ere aritu dira, besteak beste Continental Club Houston, Red Brick Tavern Conroe edo Green Oaks Tavern Humble aretoetan.

SKYLER SAUFLEY- UZTAILAK 26, IGANDEA, 12:30 (VOLOTEA GUNEA – AREATZAKO KIOSKOA)

Multiinstrumentista autodidakta gisa eta Alabama Blues Hall of Fame aretoko kide berria izanik, Skyler Saufley (1995, Virginia) ez da blues artista tipikoa, eta bere ibilbidea berezia dela esan daiteke. Jump, swing eta mendebaldeko kostako blues estiloko musikan espezializatua, Saufleyk agertokian presentzia bikaina erakusten du eta bere emanaldietan energia kutsatzeko gaitasun harrigarria du. Bere zuzeneko kontzertuetan blues elektrizatzailearen eta boogie-woogiearen nahasketa nabarmena da. Saufleyren talentuak bluesaren kondaira handien espiritua gogorarazten du, hala nola T- Bone Walker edo Pee Wee Crayton.

PIONERA FEMINISTAK ETA ESKLABOTZAREN ABOLIZIOA BURUZKO HITZALDIA- UZTAILAK 25, LARUNBATA, 11:00 (GUGGENHEIM BILBAO MUSEOA)

Héctor Martínezek emango duen hitzaldi honek, Guggenheim Bilbao Museoaren TopArte programaren barruan antolatuta, “emakumeek esklabotzaren aurkako borrokan izan zuten protagonismoaz kontzientziatzea du helburu, bai mugimendu abolizionisten bultzatzaile gisa, bai Underground Railroad izeneko sarean parte hartzaile gisa”. Termino honek XIX. mendean AEBetan aktibo egon zen ibilbide sekretuen eta babes-etxeen sare klandestinoa izendatzen du. Ekitaldian Mayka Edjole (ahotsa) eta Alex Caporuscio (gitarra) ere arituko dira.

BOOGIE WOOGIE DANTZA-ESKOLAK KIOSKOAN- UZTAILAK 26, IGANDEA  (VOLOTEA GUNEA – AREATZAKO KIOSKOA)

Ohikoa den bezala, Bilbao Blues Festival jaialdiaren azken eguneko goiza Boogie Woogie dantza-eskola herrikoiei eskainiko zaie; hitzordu honetako ohiko jarduera bihurtu dira jada. Swing Portugalete dantza eskolako Carlos Etxebarriak emango ditu, 11:30ean hasita, eta herritar guztiei irekita egongo dira.

NAZIOARTEKO AITORPENA DUEN ANTOLAKETA

Jaialdiaren sustatzailea den Crazy Blues erakundeak nazioarteko sari garrantzitsuenak jaso ditu musika genero honen sustapenean egindako lanagatik: Sustatzaile onenaren BBSA saria (Blues Behind the Scenes Award), European Blues Unionek Azoresen 2019an emandakoa, eta K.B.A. saria nazioarteko jaialdi baten antolakuntzarik onenari (Keeping the Blues Alive) 2015ean, mundu mailako onespen handiena, Memphisko Blues Foundationek emandakoa.

Bost edizio ospatu ondoren, Bilbao Blues Festival jaialdiak Europako blues zirkuituan erreferentziazko hitzordu gisa sendotzen jarraitzen du, tradizioa, nazioarteko proiekzioa eta kulturarako sarbide doakoa uztartuz hiriaren bihotzean.

• Nazioartean bi hamarkada baino gehiagoko ibilbide arrakastatsua eta 11 disko kaleratu ondoren, txapela jasoko dute jaialdiaren V. urteurrenea

• Areatzako Kioskoak III. Volotea Blues Challengea hartuko du, non egungo lau talde onenak lehiatuko dira European Blues Challengean plaza bat lortzeko

• Jaialdiaren irudiak hiriko memoria industriala eta bluesaren jatorria uztartzen ditu

• Bilboko Udalak sustatutako ekitaldiak doako hamar kontzertu baino gehiago programatuko ditu, Areatza agertokia nagusi bezala

Bilbao Blues Festival Hiribildura itzuliko da uztailaren 24tik 26ra, doako programazioarekin. Bere bosgarren urteurrenean, jaialdiak Travellin’ Brothers talde bizkaitarraren ibilbidea aitortuko du, Bruselan 2015eko European Blues Challengeko irabazleak (Europako talde onena) eta Memphisen 2015eko International Blues Challengeko finalistak (munduko 8 onenak). Bira eta kontzertu berezietan “backing band” izan da Ian Siegal, Sugaray Rayford, Andy J. Forest, Earl Thomas, Raphael Wresnig, J.T. Lauritsen, Antonio Serrano, Julian Maeso, Alex Schultz, Henry Grey, Ina Forsman, Diego Galaz… mailako artistentzat.

“Euskal Herrian generoan aitzindaria izan zen taldea da, eta gainera ez du inoiz formazio-aldaketarik izan. Orain, lehen euskal taldea bihurtu da ‘txapela’ eskuratzen. Bereziki ilusioa egiten dit sari hau jasotzeak, gure ibilbideek paraleloan egin baitute aurrera; elkarrekin hazi gara pertsonalki zein profesionalki”, azpimarratu du Carlos Malles jaialdiko zuzendariak.

Areatzak jaialdiaren agertoki nagusi izaten jarraituko du, non aurten formatu handiko kontzertuak ostiralerako eta larunbaterako erreserbatuko dira. Ohikoa denez, Kioskoak goizeko hainbat emanaldi hartuko ditu. Uztailaren 26an, Estatuko Volotea Blues Challengearen III. edizioa egingo da, egungo panoramako lau talde onenek European Blues Challenge lehiaketan parte hartzeko plaza lortzeko lehian jardungo dute, bluesaren nazioarteko hitzordu garrantzitsuenetako batean.

Kontxi Claver, Bilboko Udaleko Garapen Ekonomiko, Merkataritza, Enplegu eta Turismoko zinegotziak, adierazi duenez, ”Bluesaren esparruan nazioarteko erreferente bihurtu gaituen jaialdi garrantzitsu honen edizio berri bat hartuko dugu aurten ere. Oraingoan, gainera, Travellin’ Brothers taldeari egindako aitortza bereziarekin, guztiz merezitako bereizketa da, eta Bilbao Blues Festivalen maila bikaina are gehiago goratzen du”

BIRAK EUROPAN ETA AEBETAN

Travellin’ Brothersek 1.300 kontzertu baino gehiago eta 11 disko baino gehiago ditu atzean, Europa osoko klub eta aretoetan jo du, eta AEBetan egin dituen biretan BMC-n, Bluenile New Orleanseko Frenchmen Streeten, BB King Club-en, 152 Club-en, New Daisy Theatre-n Memphis-eko Beale Street mitikoan, Memphis-eko Orpheum Theatre edo Clarcksdale Mississippi-ko Reds Juke Joint, bezalako lokal mitikoetara eraman du bere musika. Baita Texaseko klub eta aretoetan ere, hala nola Continental Houston klubean, Red brick Tavern Conroe-n Humble edo Green Oaks Tavern Humble.

ONTZIOLETZAK OMENTZEN DITUEN BLUESMAN BAT

V. Bilbao Blues Festivaleko kartelak “Bilboren eta bilbotarren eraldaketa irudikatu nahi du. Atzeko planoan, Karola Garabiaren memoria industriala gaur egungo zerbitzu eta kultur hiriko ikonoekin kontrajartzen da: Iberdrola Dorrea eta Euskalduna Jauregia”, azaldu du Sergio Pérez Berasategi egileak. Lehen planoan, aho-soinua jotzen duen bluesman batek “ontzioletei eta hiriaren iragan langileari omenaldia egiten dio. Irudi honek blues generoaren sorreran izan zen ahalegin fisikoa eta gaur egungo hiria eraikitzeko lan egin zutenen lana lotzen ditu”, gaineratu du.

Beste edizioetako ildo grafiko retroari eutsiz, diseinu honek ohiko kolore-paleta mantentzen du “jaialdiaren irudiari jarraipena emateko”. “Testuren eta tipografia higatuen erabilerak nortasun bisual propio eta, gure ustez, dagoeneko sendotua indartzen du”, nabarmendu du Pérez Berasategik.

NAZIOARTEKO AITORPENA DUEN ANTOLAKUNTZA

Jaialdiaren erakunde sustatzaileak, Crazy Bluesek, blues generoa bultzatzeko nazioarteko sari gorenenak jaso ditu: BBSA saria sustatzaile onenaren atalean (Blues Behind the Scenes Award), European Blues Unionek Azoresen 2019an emandakoa, eta K.B.A. saria nazioarteko jaialdi baten antolakuntzarik onenari (Keeping the Blues Alive), mundu mailako onespenik handiena 2015ean Blues Foundationek Memphisen emandakoa.

• Gabonetako Azokak, eta Casilda Iturrizar Parkearen inguruan antolatutako doako programazio osoak, argi- eta soinu-tunelarekin batera, publiko ugari bildu du, eta ekimen horiek Bilboko Gabonetako gune nagusietako bat bihurtu dute eremua. Horiez gain, izotz-pista eta -txirrista, Areatzako kaian eta Erripako kaian jarritakoak, izan dira beste behin erakargune nagusiak eta 52.500 lagunek baino gehiagok hartu dute parte. 

Bilboko Udalak antolatutako #BilbaoGabonak ekimenak, berriro ere, martxan jarritako proposamen eta jarduera guztien harrera ona berretsi du, eta Gabon-egunetan hiria merkataritza, aisialdi eta kulturaren erreferentziazko toki bihurtu da, bai bilbotarrentzat, bai bisitarientzat. Adin guztietarako kultura eta aisialdi arloko ekimen ugariek merkataritza-eskaintzak Bilbo Gabonez gozatzeko toki erakasgarri gisa sendotu dute.

Aurten Gabonetako Azokaren inguruan berrikuntza ugari txertatu dira. Azokak abenduaren 5ean ireki zituen ateak, 35 posturekin, aurreko edizioan baino 9 gehiagorekin, eta kokaleku berriarekin: Casilda Iturrizar Parkean izan baita. Gune hori hiriko erakargarri nagusietako bat bihurtu da, eta bertan publiko ugari bildu da. Parkea Baso Magiko bihurtuta, eremu hori #BilbaoGabonak udal-proiektuaren gune erakargarrienetako bat izan da, merkataritza-eskaintzaren bidez Gabonetako salmentak sustatuz.

Hauek izan dira 2025/2026ko Bilboko Gabonetako Azokan parte hartu duten saltokiak: Basalar, Princess Courts, Enara Artesanía, Kiliken, Insphyria, Bilbo Dulce Salado, Kaoticat, Mendimarket Gourmet, Accesorios Oli, La Tallerteka, Vintique, Kai denda, Delitxia, Bindi Bisutería, El Gallo de Oro, Cookies & Bites, Bazar Rif, Nahiarte, Arce Bilbao, Lakarola Kintana, Fefa, Karola Kosmetika Naturala, Flores para Venus, Txikito, Ker Fatou, Polvorones Solokoetxe, Castroflor, Bella de Triana, Alimentación Iraiza Productos Delicatessen, Tu Bola de Navidad, Pabús Bijoux, Nyumbani World, Ositos con Alcohol, Andrea Nieto Jewels, N de Noa eta Ibilaldia 2026ko etxola. Halaber, azpimarratzekoa da Gabonetako Azokaren eta iturri zibernetikoaren inguruan txertatutako food truck-en arrakasta ere (Food Truck Kmzero Basque Truck eta Zutarri etxola).

Gainera, Casilda Iturrizar Parkeko Baso Magikoan antolatutako doako jarduera guztiek, batez ere haurrei eta familiei zuzendutakoek, pertsona ugari erakarri dituzte: Desioen Postontzia, Gabonetako Arcade-jokoak, parkeko pergolaren ondoan eskainitako zuzeneko musika —musika-ikasleek eta talentu gazte ez-profesionalek eskainia—, bai eta iturri zibernetikoko argi-ikuskizuna, “El secreto de la Navidad / Gabonetako sekretua” antzezlanaren emanaldiak eta Aitor Álava dantzariaren eskutik eskainitako euskal dantzen erakustaldiak ere; jarduera horiei esker, Casilda Iturrizarreko eremua publiko guztientzako Bilboko Gabonetako erreferentzia-gune nabarmenetako bat bihurtu da.

Horri guztiari hiriko argiek eskainitako xarma gehitu behar diogu: argi eta soinuaren tunela eta arratsaldetan eskainitako emanaldi musikalak, Moyuako zuhaitz handia, Areatzako zuhaitz urreztatuak….

Beste behin ere, izotz sintetikozko pista eta txirrista (berriro ere Erripako Kaian eta Areatzako kaian jarri dira), izan dira erakargarritasun maiteenetako batzuk eta 52.500 pertsona inguru bildu dira horietan. Berritasun gisa, premia bereziak dituztenentzako paseak eta patinaje-pistan gaueko paseak aktibatu dira, publiko gazteagoari zuzenduta.

SARE SOZIALAK: #BilbaoGabonak #MePidoBilbao

• BILBOKO UDALA: YOUTUBE | FACEBOOK | X | INSTAGRAM | TIK TOK
• BILBAO EKINTZA: YOUTUBE I FACEBOOK | X | INSTAGRAM
• BILBAO KULTURA: YOUTUBE | FACEBOOK | X | INSTAGRAM | TIK TOK
• BILBOKO JAIAK:  FACEBOOK | X | INSTAGRAM
• BILBO TURISMOA: FACEBOOK I X I INSTAGRAM

• Alabama Shakes, Dani Fernández, Belén Aguilera, CMAT, Belle and Sebastian, La M.O.D.A., Paris Paloma, Ralphie Choo, Tomora, ZAZ, Soulwax, Nu Genea live, Fatoumata Diawara, Yerai Cortés eta ezinbesteko izen gehiagok osatzen dute kartelaren lehen aurrerapena.
• Jaialdiak bete dituen bi hamarkadak ospatuko ditu edizio historiko batekin, 2026ko uztailaren 9an, 10ean eta 11n, ohiko lekuan: Kobetamendi.
• Aurre-salmenta esklusiboa eskuragarri dago beste edizio batzuetan izan direnentzat; Fan salmenta, izen-ematea eskuragarri jaialdiaren webgunean, abenduaren 15etik aurrera, eta salmenta orokorra abenduaren 17ko 10:00etatik.
  

Bilbao BBK Livek bere bi hamarkadatako historia ospatuko du oroitzapenezko edizio batekin, zeinak nazioarteko, Estatuko eta tokiko musikaren izen handiak bilduko baititu 2026ko uztailaren 9, 10 eta 11n, bere ohiko kokagunean, sortu zenetik jaialdiaren nortasuna definitu duen espazio natural ikonikoan: Kobetamendi. Lehen iragarki honetan, artisten hautaketa zaindu bat aurkeztu du jaialdiak bereziki esanguratsua izango den edizio baten abiapuntua markatzeko. Eta esanguratsua izango da jaialdiaren ibilbidea posible egin dutenen omenaldi gisa pentsatu delako: publiko zintzoa, eszenatokietan arrastoa utzi duten taldeak, eta duela hogei urtetik musika esperientzia partekatu gisa bizi duen komunitatea.

Bilbao BBK Livek belaunaldiak markatu dituzten eta jaialdiaren aniztasun estilistikoa islatzen duten izenekin jarri du martxan edizio berezi hau. Robbie Williams pop britainiarraren ikonoak lehen aldiz ekarriko du Kobetamendira Long 90’s Tour lana: bere ibilbidea markatu zuen hamarkadari buruzko begirada nostalgikoa, Britpop album berriaren kaleratzearekin bat eginez. David Byrne, musika garaikidearen ezinbesteko figura eta Talking Heads taldearen atzean dagoen buru sortzailea bueltan da jaialdian, ohi duen bezala, moldeak apurtzeko eta arrastoa uzteko promesarekin. Rockaren erraietako pultsu bizienetik, IDLES berriz izango da jaialdiaren urteurrenean bere energia kontrolaezinarekin egungo banda indartsuenetako bat dela erakusteko. Lily Allenek West End Girl aurkeztuko du, bere album konfesionala, disko osoa eskainiko duen zuzeneko esklusibo batekin. Pop britainiarraren ahots ikonikoenetako bat dena jaialdiaren urteurrenerako unerik onenean itzuliko da. Alabama Shakes kartelari batu zaizkio, beren soul rock iraultzailearekin eta Brittany Howard-en ahots nahasezinarekin; Charlotte de Wittek, elektronikaren garaikideko figura garrantzitsuenetakoak, aitzindaritza, indarra eta kabinan duen presentzia harrigarria batzen dituen zuzenekoa eskainiko du. Haiekin batera, Interpolek, azken hamarkadetako eragin handieneko indie-rock taldeak, osatuko du jaialdiaren 20. urteurrenari forma emango dioten ezinbesteko izenen blokea.

Jaialdiaren bi hamarkadak emozioa narratiba bihurtzen duten artistekin ere ospatuko dira. Belle and Sebastianen iruditeria nostalgikotik hasi eta CMATren “euro-country”aren lotsagabekeria eszenikora eta Paris Palomaren pop-folkaren introspekziora, talde horien proposamenek sentsibilitate bera partekatzen dute: musika generoak eta belaunaldiak zeharkatzeko gai den adierazpide pertsonal eta kolektibo gisa ulertzen dutenena.

Elektronikak distira egiten du lehen aurrerapen honetatik, funtsezko lau proposamenekin. Richie Hawtinek DEF EFX XOX aurkeztuko du, inprobisazioaren eta teknologiaren arteko lurralde berriak esploratzen dituen murgiltze-ikuskizuna. Harekin batera, Tomora, Tom Rowlandsek (The Chemical Brothers) eta AURORAk osatutako supertaldea, elektronikaren eta pop alternatiboaren arteko aliantza ezezagun batean; Soulwax, Europako elektronikaren bilakaeran funtsezko taldea, eta bere zuzenekoa genero guztiak gainditzen dituen esperientzia paregabe bihurtu da; eta Apparat, soinu-abangoardia emozionalaren erreferentea.

Bilbao BBK Livek berretsi egin du Estatuko talentuarekiko duen konpromisoa, eta, berriz ere, kartelaren goialdean jarri du, eszenaren egungo pultsua islatzen duten artistekin: Dani Fernández, Estatuko pop berriaren erreferentea; Belén Aguilera, intimoaren eta belaunaldikoaren artean naturaltasunez mugitzen den konpositorea; La M.O.D.A., zuzeneko kolektibo eta energikoarekin leku propioa irabazi duen ezinbesteko taldea; eta Xoel López, funtsezko figura gaztelaniazko pop independentearen bilakaeran. Horiei batzen zaizkie panorama hainbat ikuspegitatik berritzen ari diren izenak: Ralphie Choo, Bb trickz, Juicy BAE eta AMORE, traparen eta pop esperimentalaren artean mugitzen diren proposamenekin. Eta gainera, Yerai Cortés eta Queralt Lahoz, flamenkoaren forma berriak arakatuz; Depresión Sonoraren eta Las Petuniasen post-punkaren eta rock alternatiboaren indarra; eta Cervatana, Derby Motoreta’s Burrito Kachimbako kideek sortutako proiektu berria, krautaren eta elektronikaren arteko proposamen bizi eta zirraragarria.

Bilbao BBK Live da, halaber, zure banda berri gogokoena aurkitzeko lekua, estiloak, azentuak eta belaunaldiak zuzeneko musikaren etorkizunari forma emateko gurutzatzen diren agertokia. Edizio honetan, Nu Genea liveren funk, elektronika eta soinu mediterraneoen gurutzaketa finak zuzenean eramango gaitu Italiara, gainezka egiten duen ZAZ pop frantsesaren ikonoaren bizitasunetik eta banbaran abesten duen Fatoumata Diawara Maliko artistaren ahots boteretsutik igarota, erroa eta modernitatea besarkatzen dituen musika-bidaia batean. Eta horiez gain, hantxe izango dira Thee Sacred Soulsen soul dotorea eta horsegiirLen elektronika berriaren ikuspegi azeleratu eta probokatzailea. Italiatik, Idol hit biralaren egile diren Mind Enterprisesek beren proposamen hedonista eta dantzagarria gehituko diote blokeari, zeinetan nazioarteko izen berriak ere nabarmentzen baitira, hala nola Carpetman, Folk Bitch Trio, Hoonine, Don West eta Mietze Conte, etiketei aurre egiten dieten eta jaialdiaren soinu-imajinarioa zabaltzen duten proiektuekin. Beti bezala, Eusko Labela duten apustuek leku berezi bat dute jaialdian, eta besteak beste Sara Zozaya, Aimarz, Marte Lasarte, GAR eta Suave izango dira bertan.

Hogei edizio musikaren eta lurraldearen zerbitzura

Kobetamendiko ingurune naturalean kokatuta eta Bilbo oinetan duela, Bilbao BBK Livek 20. edizioa egingo du 2026an, jaialdi berezi bihurtu duen hori berretsiz: musika gainditzen duen esperientzia bat, paisaia, kultura eta komunitatea konektatzeko. Hiru egunez, mendia kontzertu, xehetasun eta topaketa bakoitza irauteko diseinatuta dauden leku bihurtuko da berriro.

Urteurren honen buru, otsoa —jaialdiaren sinbolo eta lekuko, hasi zenetik— da kartelaren irudi nagusia eta historia partekatu horren ikurra. Irudi berri horren parte gisa, Sumendi sortu da, euskal errotulazioan oinarritutako tipografia esklusiboa, lurraldearen identitateari omenaldia egiteko. Grafika berritu horrekin eta jada itxura hartzen hasi den kartel batekin abiatuko da komunitatean eginiko bi hamarkadako musika ospatuko duen oroitzapenezko edizio bat.

Bilbao BBK Liven antolatzaileek bereziki eskertu dute Bilboko Udalak eta BBK Banku Fundazioak babesleekin eta gainerako erakunde laguntzaileekin batera emandako babesa, ekitaldia posible egiten baitute.

Eskuragarri dago aurre-salmenta esklusiboa aurreko edizioetan izan direnentzat, abenduaren 17ra arte, asteazkena, 10:00etan. Zaleentzako (fans) salmenta berezia abenduaren 15eko (astelehena) 12:00etatik abenduaren 17ko (asteazkena) 10:00etara izango da eskuragarri; horretarako, ezinbestekoa da jaialdiaren webgunean gaitutako itxaron-zerrendan izena ematea. Salmenta orokorra abenduaren 17an (asteazkena) hasiko da, goizeko 10:00etan.

Bertaratuentzako aurre-salmenta bonu esklusiboa: 145 €+ gastuak

Fan bonua: 149 €+ gastuak

Salmenta orokorreko bonua: 160 €+ gastuak

Kuadrilla bonua: 133 €+ gastuak (5 bonu erosteagatik, 6 jasoko dira)

Gaztea bonua: 120 €+ gastuak (24 urtetik beherakoentzat, ezinbestekoa da jaialdiaren sarreran NANa aurkeztea)

4 gaueko kanpina: 38 €+ gastuak

11 urtetik beherakoek sarrera doan (formulario bat bete behar da aldez aurretik)

Salmenta hemen: https://bilbaobbklive.com/eu/ eta Fever Up

#bilbaoBBKlive #bilbaoBBKlive2026

https://bilbaobbklive.com/eu/

BILBAO BBK LIVE – 20. urteurrena

2026ko uztailaren 9a, 10a eta 11

Kobetamendi, Bilbo

ARTISTAK ORDENA ALFABETIKOAN

AIMARZ

ALABAMA SHAKES

AMORE

APPARAT

BB TRICKZ

BELÉN AGUILERA

BELLE AND SEBASTIAN

CARPETMAN

CERVATANA

CHARLOTTE DE WITTE

CMAT

DANI FERNÁNDEZ

DAVID BYRNE

DEPRESIÓN SONORA

DON WEST

FATOUMATA DIAWARA

FOLK BITCH TRIO

GAR

HORSEGIIRL

HOONINE

IDLES

INTERPOL

JUICY BAE

LA M.O.D.A

LAS PETUNIAS

LILY ALLEN

MARTE LASARTE

MIETZE CONTE

MIND ENTERPRISES

NU GENEA LIVE

PARIS PALOMA

QUERALT LAHOZ

RALPHIE CHOO

RICHIE HAWTIN DEX EFX X0X

ROBBIE WILLIAMS

SARA ZOZAYA

SOULWAX

SUAVE

THEE SACRED SOULS

TOMORA

XOEL LÓPEZ

YERAI CORTÉS

ZAZ

…

• Dotoretasuna, matxinada eta rockarekiko pasioa batuko dira Bilbao Arenan ekainaren 26an eta 27an. Rage Against the Machine eta Audioslave taldeen sortzailekide den Morellok Estatuan emango duen kontzertu bakarra eskainiko du Bilbon, BBK Legends Bilbaon, 2026ko ekainaren 27an.
  

BBK Legends Bilbao, BBK Banku Fundazioaren eta Bilboko Udalaren babesarekin eta Dekker Eventsek antolatuta, 2026ko ekainaren 26an eta 27an egingo da Bilbao Arenan, lehen edizioa ospatu zenetik hamar urte beteko direnean.

Ostiraleko, ekainaren 26ko, jardunaldian, Chris Isaak izango da BBK Legends Bilbaoren lehen egunean buru, bere estilo paregabearekin: dotorezia retroa, surf kutsuko soinua eta Amerikako tradiziotik edaten duen sentsibilitatea uztartzen dituena. Kultuzko artista eta rock estatubatuarraren erreferente nagusietako bat den Isaak berriro itzuliko da Bilbora, 2023an Legendseko bere aurreko bisitan sarrera guztiak agortu ondoren. Bere abestirik ikonikoena, Wicked Game, belaunaldi oso bati markatua geratu zaio, eta gaur egun ere pop-rock modernoaren kanturik ezagunenetako bat da. Estatu Batuetako abeslari eta aktorea bere betiko bandarekin, Silvertonekin, igoko da eszenatokira, 70. urtebetetze-egunean bertan. Bere ibilbide musikal eta zinematografikoak honako hauek biltzen ditu: kritikak txalotutako estudioko hamahiru album, El silencio de los corderos eta The Wonders bezalako film nabarmenetan arrakasta eta parte-hartze zerrenden buru izan ziren hamabi single. Halaber, film ikonikoen soinu-banden musika konposatu du, besteak beste Eyes Wide Shut, True Romance, Wild at Heart eta Blue Velvet lanetarako. Duela gutxi, Ibilbide Artistikoaren Saria jaso du Americana Honors sarietan.

Jardunaldia osatzeko, Cracker izango da eszenatokian, AEBetako rock alternatiboko banda enblematikoa. Azken aldian Sala BBK zikloan eskainitako kontzertuan hiru hilabetetik gorako aurrerapenarekin sarrera guztiak agortu ondoren, taldea Bilbora itzuliko da, Low eta Teen Angst bezalako belaunaldiko klasikoek markatutako ibilbidearekin. Rocka, country-rocka, folka eta punka zeharkatzen dituen soinu anitzari esker, kultuzko banda bihurtu da. Halaber, egun berean Dea Matrona arituko da, rock eszenaren berritasuna indarrez, freskotasunez eta magnetismoz berritzen ari den Irlandako bikote gaztea. Fleetwood Mac eta Led Zeppelin bezalako legendetan du inspirazioa, eta Glastonbury jaialdian egindako agerraldia bezalako mugarri garrantzitsuek babesten dute bere ibilbidea.

Larunbatean, ekainaren 27an, berriz, Tom Morello izango da protagonista. Rage Against the Machine eta Audioslave taldeen sortzailekide izateaz gain, azken hamarkadetako rockaren figura iraultzaile eta aktibista nabarmenetako bat da. Euskadin emango duen lehen kontzertua izango da, eta Bilbon izango duen data bakarra Estatu osoan; hortaz, oso hitzordu berezia izango da jarraitzaileentzat. Rock’n’rollaren indar eraldatzailearen adibide bizia den Morello gitarra-soinu berritzaileengatik eta riff boteretsuengatik da ezaguna; musika garaikidea irauli du, bai bakarkako ibilbidean, bai banda mitikoetako sortzailekide gisa egindako lanarekin. Rolling Stone aldizkariak “Denboraldi guztietako 100 gitarjole onenen” zerrendan 18. postuan kokatu zuen, eta Rock & Roll Hall of Fame eta Heavy Metal Hall of Fame ospe-aretoetan ere sartu dute. Prophets of Rage eta Street Sweeper Social Club bezalako supertaldeetako kide izan da, eta sei urtez ibili da biran Bruce Springsteen & The E Street Band taldearekin. Gitarra protesta eta emozioaren adierazpen bihurtzeko duen gaitasunagatik da txalotua. Estilo bakarra eta energia ikaragarria uztartuta, Morello Bilbora iritsiko da kontzertu esklusibo bat eskaintzera.

Larunbat gau berean BEAT ere arituko da, King Crimson taldeko legenda izandako bi kidek, Adrian Belew eta Tony Levin musikariek, osatutako supertaldea; haiekin batera ariko dira Steve Vai gitarra birtuosoa eta Tool taldeko bateria indartsua, Danny Carey. Taldea King Crimsonen 1980ko hamarkadako garaiko hiru disko giltzarriren interpretazio sortzaile eta zehatzari heltzeko jaio da: Discipline, Beat eta Three of a Perfect Pair. Performing the Music of 80s King Crimson kontzeptuaren pean, proiektuak garai hartako errepertorioaren zehaztasun erritmikoa eta egitura-konplexutasuna uztartzen ditu rockaren historian eragin ukaezina izan duten lau musikariren nortasun teknikoarekin. Emaitza proposamen bakarra da, eskakizun musikal handikoa, funtsezko ondare bat berreskuratzen duena, bere garaian eraikitzen parte hartu zutenen begiradatik, orain energia berrituarekin berrinterpretatua.

Larunbateko eguna osatzeko, Graveyard taldearen emanaldia izango da Bilbao Arenan. 2006an sortu zen, Göteborg hirian, eta gaur egun Europako rock eszenako proposamen sendoenetako bat da. 70eko hamarkadako hard rocka, psikodelia eta blues gordina uztartzen dituen soinu bereizgarriari esker, Joakim Nilsson buru duen taldeak ibilbide sendoa eraiki du, Hisingen Blues bezalako disko funtsezkoekin eta zuzeneko intentsu, girotsu eta hipnotikoekin.

Musika-egutegiko ezinbesteko hitzordu gisa finkatu ondoren, BBK Legends Bilbao ekitaldia Bilbao Arenara itzuliko da, rockaren eta bluesaren mito handien, haiekin hazi ziren belaunaldien eta haien ondarea aurkitu duten belaunaldi berrien arteko topagune bihurtzeko.

Ekitaldiak izaera irekia eta zeharkakoa berresten du, muzikazale gazteetatik hasi eta familia osoetaraino (sarrera doan 14 urtera arte).

IRAUNKORTASUNAREKIKO KONPROMISOA

BBK Legends Bilbaok aktiboki jarraitzen du bere ingurumen-inpaktua murrizteko lanean, Erronka Garbia – Ekitaldi Jasangarria metodologian oinarritutako neurriak ezarriz. Karbono-aztarna gutxitzetik eta material birziklagarrien erabileratik garraio publikoa sustatzera arte, egitasmo bakoitzak hirian eta ingurunean eragin positibo eta ukigarria sortzea du helburu.

SARREREN SALMENTA ETA EMANALDIEN ORDUTEGIAK

Eguneko sarrerak eta bi eguneko bonuak gaurtik aurrera daude salgai, eta www.musiclegendsfestival.com webgune ofizialaren bidez erosi ahal izango dira.
Azken lau edizioetako gutxienez batean BBK Legends Bilbaon izan direnek posta elektronikoz jasoko dute kode bat; horri esker, prezio berezian erosi ahal izango dituzte sarrerak, denbora-tarte mugatu batean (abenduaren 25era arte).

Aurten, graderietako eserlekuak zenbakituta egongo dira, eta, horri esker, ikusle bakoitzak aldez aurretik aukeratu ahal izango du bere tokia. Emanaldien ordutegiak aurrerago kontsultatu ahal izango dira BBK Legends Bilbaoren webgune ofizialean.

• Bilboko Alkateak, Juan Mari Aburtok, Casilda Iturrizar parkeko argi eta soinu tunelaren inguruan dagoen Gabonetako Azoka inauguratuko du gaur arratsaldean. Azokan guztira 35 etxola daude, aurreko edizioan baino 9 gehiago.

• Aurten, berrikuntza gisa, Bilboko Gabonetako Azokak, toki berrian kokatuta egoteaz gain, doako jarduera osagarriak izango ditu, Casilda Iturrizar parkea ‘Baso Magiko’ bilakatuko dutenak. Pertsonaia mitologikoak, antzerkia edo musikaz aparte, iturri zibernetikoaren bi aldeetan eskaintza gastronomikoa eta mahaien gunea ere izango dira.

• #BilbaoGabonak udal-proiektuaren esparruan Gabonetako Azoka urtarrilaren 5era arte egongo da zabalik, herritarrek eta Bilbo bisitatzen dutenek parkearen inguruan gaur arratsaldean aktibatuko diren etxolaz eta programazioaz gozatzeko aukera izan dezaten.

Bilboko Alkateak, Juan Mari Aburtok, aurten kokapen berria estreinatzen duen hiriko Gabonetako Azoka inauguratuko du gaur, abenduak 5, arratsaldean. 35 etxolak, iaz baino 9 etxola gehiago, Casilda Iturrizar parkeko pergolaren inguruan kokatuta daude, argi eta soinu tunelaren aldean. 19:00etatik aurrera etxoletan zehar egingo duen ibilbidean zehar Bilboko Alkateak Udalbatzako kideak eta merkataritza elkarteetako ordezkariak izango ditu lagun. Bilboko Gabonetako Azoka osatzen duten etxolak bisitatuko dituzte, baita foodtrucken gunea ere, eta bihar Casilda Iturrizar parkeko “Baso Magikoan” hasiko diren jarduerak bisitatuko dituzte. Horrela, gaur arratsaldean hasiera emango zaio Gabonetako Azokari eta Casilda Iturrizar parkeko Baso Magikoaren programazio osoa hasiko da, #BilbaoGabonak udal-proiektu estrategikoaren barruan sartzen diren jarduerak.

Gabonetako Azoka gaur arratsaldean irekiko da, 17:00etan, eta abenduaren 5etik abenduaren 21era astelehenetik ostiralera, egongo da zabalik, 17:00etatik 22:00etara, eta asteburu eta jaiegunetan 11:30etik 14:30era eta 17:00etatik 22:00etara. Abenduaren 22tik aurrera egunero egongo da zabalik, 11:30etik 14:30era eta 17:00etatik 22:00etara, abenduaren 24an eta 31n eta urtarrilaren 5ean izan ezik, horietan ordutegia 11:30etik 14:30era eta 17:00etatik 19:00etara izango baita. Abenduaren 25ean eta urtarrilaren 1ean Azoka itxita egongo da.

Hauek dira aurten gaien arabera atondu diren egurrezko etxoletako bat izango duten dendak: Basalar, Princess Courts, Enara Artesanía, Kiliken, Insphyria, Bilbo Dulce Salado, Kaoticat, Mendimarket Gourmet, Accesorios Oli, La Tallerteka, Vintique, Kai denda, Delitxia, Bindi Bisutería, El Gallo de Oro, Cookies & Bites, Bazar Rif, Nahiarte, Arce Bilbao, Lakarola Kintana, Fefa, Karola Kosmetika Naturala, Flores para Venus, Txikito, Ker Fatou, Polvorones Solokoetxe, Castroflor, Bella de Triana, Alimentación Iraiza Porductos Delicatessen, Tu Bola de Navidad, Pabús Bijoux, Nyumbani World, Ositos con Alcohol, Andrea Nieto Jewels eta N de Noa, 2026ko Ibilaldiaren etxolaz gain.

Gabonetako Azokaren inguruan, berrikuntza gisa, foodtrucken gune bat egongo da, askotariko eskaintza gastronomikoarekin: Food Truck Kmzero (gourmet hanburgesak, askotariko ogitartekoak, enpanadak, kitxeak, tostak, gozokien eskaintza, edariak eta kafe-puntua); Basque Truck, hurbileko produktuekin egindako hanburgesa berezien eskaintzarekin eta freskagarriak edo ardo beroa bezalako edariekin, eta Zutarri txosna (taloak, ogitartekoak eta edariak).

 

Jardueraz betetako “Baso Magikoa”

Berrikuntza gisa aurten Casilda Iturrizar parkeak bizitza hartuko du pertsonaia mitologikoekin, ipurtargiekin eta galtzagorriekin, Gabonetako ilusioa pizteko iritsiko direnak Baso Magiko baten itxura eginez. Bisitariek Gabonetako Azokan dauden saltokietako produktuak eta zerbitzuak ezagutzeko aukera izateaz gain, tradizioa, kultura eta modernitatea uztartzen dituen kontakizunean murgilduko dira.

Horrela, Casilda Iturrizar parkea euskal mitologian inspiratutako argi, soinu eta fantasiaz betetako espazio bihurtuko da. Eguzkiloreek, animaliek eta argiek forma emango diote ibilbide inguratzaile bati eta naturak eta kulturak bat egingo dute esperientzia murgiltzailea sortuz. Baso Magikoa argi eta soinu tunelarekin integratuko da, iaztik Bilboko Gabonetako ikonoetako bat dena.

Doako jarduera iraunkorren artean Desioen Postontzia nabarmentzen da, landarediaren artean ezkutatutako ate bat, non familiek Gabonetako euren nahiak eta asmoak idatzi eta nahiago dutenei bidali ahal izango dieten postontzi handi bat dagoen; adin guztiei irekitako jarduera da.

Gainera Gabonetako Arcadeak izango ditu, erabat pertsonalizatutako bi Arcade makina, Bilboko Gabonetako lau bideojoko eskainiko dituztenak: mini-jokoen bidez bisitariek galtzagorriei hirian zehar opariak banatzen lagundu ahal izango diete, bikote-joko batekin euskal mitologia ezagutu ahal izango dute edo Bilboko Gabonak argiztatzen lagundu ahal izango dute. Jarduera iraunkor hauek guztiak doakoak izango dira eta Gabonetako Azokaren irekiera-ordutegian egingo dira.

Casilda Iturrizar parkeak, halaber, doako programazio berezia hartuko du Gabonetako Azokaren inguruan une paregabeak eskainiz: abenduaren 5, 19, 20 eta 27an, 18:30ean, ipurtargiak eta galtzagorriak parkera iritsiko dira Gabonak pizteko eta espazioa animatzeko, eta bisitariekin egongo dira 19:00ak arte.

Beste jarduera erakargarri bat zuzeneko musika izango da: talentu gazteek, profesionalak ez diren musika ikasleek, euren pasioa Casilda Iturrizar parkeko Pergolaren ondoan partekatuko dute eszenatokian, egun desberdinetan, hala nola abenduaren 5ean eta 12an (19:45 – 20:30), Kodály Musika Eskolako 27 ikaslerekin; abenduaren 6an eta 13an (18:45 -19:30) North Strings harizko laukotearekin; abenduaren 22an (18:45 -19:30) Elaine Ensemble hirukotearekin; abenduaren 23an eta 30ean (18:45 -19:30) Argaluk hirukotearekin, eta abenduaren 29an (18:45 -19:30) Bost Doinu haize boskotearekin.

Horrez gain antzerkiak bere lekua izango du “El secreto de la Navidad/Gabonetako sekretua” antzezlanarekin. Esperientzia murgiltzaile eta sentsoriala izango da, eta abenduaren 5, 19, 20 eta 27an antzeztuko da, 15 minutuko emanaldietan, gehienez 60 lagunentzat saio bakoitzeko, eta lehentasuna izango dute umeek eta senideek. Antzokiko hiru emanaldi (19:00, 20:00 eta 21:00) euskaraz izango dira eta bi (19:30 eta 20:30) gaztelaniaz. Ez da aldez aurretik izena ematerik egongo eta paseak jasotzeko ilara lehen emanaldia baino 30 minutu lehenago irekiko da. Doako jarduera den arren sartzeko tiketak horretarako prestatutako leihatilan jaso behar dira, eta egun horretarako bakarrik balio dute eta ezingo dira egun beste egun batzuetarako gorde edo erreserbatu. Pertsona heldu bakoitzak gehienez 4 txartel jaso ahal izango ditu emanaldi baterako.

Azkenik, tradizioaz gozatu nahi dutenek euskal dantzen erakustaldietan parte hartu ahal izango dute Aitor Álava dantzariarekin; jarduera hau abenduaren 26an (18:00), urtarrilaren 2an (18:00) eta 3an (12:30) izango da Casilda Iturrizar parkeko Pergolan. Adierazi diren jarduera berezi guztiak, baita jarduera iraunkorrak ere, doakoak izango dira.

Kale Nagusitik Casilda Iturrizar parkerako sarrera izango da Baso Magikorako ate sinbolikoa, baso mitologiko batean inspiratutako arku batekin. Gainera parkeko lorategi-inguruneari esker landarediak bizia hartuko du eta argiztapen berezia izango du Pergolako plazan. Berde naturalarekin kontrastea egiten duten koloreek giro magikoa sortuko dute, argi eta soinu tuneleko paseek (18:30, 19:30 eta 20:30) eta iturri zibernetiko argiztatuak indartuta.

REDES SOCIALES:

BILBAO UDALA: YOUTUBE | FACEBOOK | X | INSTAGRAM | TIK TOK
BILBAO EKINTZA: YOUTUBE I FACEBOOK | X | INSTAGRAM
BILBAO TURISMO: FACEBOOK I X I INSTAGRAM

• Elixabete Etxanobe Bizkaiko Ahaldun Nagusiak, Juan Mari Aburto Bilboko Alkateak, eta Ibone Bengoetxea Eusko Jaurlaritzako Lehenengo Lehendakariorde eta Kultura eta Hizkuntza Politika Sailburuak gonbita egin diete herritarrei ekitaldi handi horretan aktiboki parte hartu eta esperientzia bizi dezaten eta gozatzeko sarrerak eros ditzaten.

• Aurkezpenean, San Mamesen jokoan egongo diren garaikurrak egon dira eta ‘Gure arbasoen indarra – La fuerza de nuestras raíces’ sustapen-bideoa aurkeztu dute. Kanpainak errugbiaren balioak eta Euskadiko antzinako espiritua uztartzen ditu.

• Orain arte, asteburu honetan denboraldia hasi baino ordu gutxi lehenago, ia 24.000 sarrera bikoitz saldu dira jada, hau da, bi finaletarako publiko orokorrarentzat salgai jarriko diren sarreren erdia baino gehiago.

Eusko Jaurlaritzak, Bizkaiko Foru Aldundiak eta Bilboko Udalak, 2026ko errugbi-finalak sustatzen dituzten hiru euskal erakundeek, gaur goizean aurkeztu dute ‘Gure arbasoen indarra – La fuerza de nuestras raíces’ kanpaina San Mamesen. Sustapen-bideoaren helburua da herritarrak joatea eta parte hartzea Euskadin bigarren aldiz egingo den erreferentziazko nazioarteko kirol-ekitaldian. EPCR Challenge Cup 2026 eta Investec Champions Cup 2026 txapelketa finalak maiatzaren 22an (ostirala, 21:00etan) eta maiatzaren 23an (larunbata, 15:45ean) jokatuko dituzte, hurrenez hurren, San Mames estadioan. Kluben errugbi-txapelketa ospetsuenetariko bi dira, eta munduko 42 errugbi-klubek parte hartzen dute.

Tokiko sustapen-kanpainak, ‘Gure arbasoen indarra – La fuerza de nuestras raíces’ izenekoak, xede dauka Euskadin errugbiak daukan muina islatzea: bere indarra, erroak eta talde-espiritua, Euskadin barrena ikusizko bidaia eginez, non lurraren antzinako espiritua eta errugbiaren balioak uztartzen diren. Izaera, natura eta erroak islatzen dituzten Euskadiko gertalekuetan grabatu dute ikus-entzunezko lana, hala nola Besaide tontorrean, hiru lurraldeen elkargunean. Itsasoaren indarretik mendien baretasuneraino, bideoko plano bakoitzean nortasuna, zirrara, jatorria, esfortzua eta partekatutako harrotasuna arnasten dira.

Elixabete Etxanobe Bizkaiko Ahaldun Nagusiak honako hau nabarmendu du: “Final hauek lurralde legez jokatuko ditugu, talde legez irabaziko ditugu, eta zale legez ospatuko ditugu. Pase bakoitzak bere balioa dauka; aurrerapen bakoitzak gehitu egiten du, eta ahalegin bakoitza garrantzitsua da. Berriro ere, Bizkaia prest dago ateko marra indartsu, elkartuta eta bere gaitasunaz konbentzituta zeharkatzeko. Horregatik, herritar guztiei dei hau egiten diet: egin dezagun 2018an baino hobeto. Bete ditzagun gure kaleak, gure harmailak. Erakuts dezagun berriro ere Bizkaiak liga handietan jokatzen duela. Guretzat, final hauek nazioartera zabaltzeko, gure ospea eraikitzeko, herrialde-marka bat eraikitzeko bidea dira”.

Bestalde, Juan Mari Aburto Bilboko Alkateak azpimarratu du “hirian eta hiritarrengan mota horretako ekitaldiek daukaten garrantzia. Orokorrean kirola sustatzeaz gain, partiden aurretik eta ondoren errugbian jokatzeak zabaltzen dituen balioak ere sustatzen dira”. Aburtok bere burua “pozik” azaldu du «euskal erakundeek eta federazioek egindako lanagatik, finaletan dena ondo joan dadin» eta EPCRri eskerrak eman dizkio «bigarrenez San Mames estadio ikonikoa aukeratzeagatik Europa kontinenteko talderik onenen nazioarteko jokalekua izan dadin”.

Ibone Bengoetxea Eusko Jaurlaritzako Lehenengo Lehendakariorde eta Kultura eta Hizkuntza Politika Sailburuak honako hau nabarmendu du: “San Mamesen jokatuko diren finalak gure Herri baloreen erakusleihoa izango da. Errugbiak eta gure herriak, Euskadik, hainbat balore partekatzen dituzte, gure arbasoengandik jasotako baloreak: komunitatea, esfortzua, disziplina, errespetua, elkarbizitza, aniztasuna, identitatea… finaletara datozenek zelai bat baino gehiago ikustea nahi dugu: herri bat ikustea nahi dugu, komunitate bat, bizirik dagoen kirol kultura”.

San Mamesen egindako ekitaldietan, European Professional Club Rugbyko (EPCR) zuzendari nagusia (CEO), Jacques Raynaud, ere egon da.

Abenduko lehenengo asteburuan (abenduaren 5, 6, eta 7an) hasiko dira Euskadik maiatzean hartuko dituen finaletara heltzeko txapelketa eta bidea, eta elkarren segidako bi asteburutan talde-fasea izango da. Talde-fasearen hurrengo txandak 2026ko urtarrileko ondoz ondoko bi asteburutan jokatuko dituzte. Kanporaketa-faseak apirilaren 3ko, 4ko eta 5eko asteburuan hasiko dira, final‑zortzirenekin; ostean, apirilaren 10ean, 11n eta 12an final-laurdenak eta maiatzaren 1eko, 2ko eta 3ko asteburuan finalaurrekoak egingo dituzte.

2018an egoitza gisa San Mames hautatzea historikoa izan zen, EPCRren finalen asteburua lehen aldiz errugbiko sei nazio tradizionaletatik kanpo antolatu baitzen. Leinster Rugby taldeak Txapeldunen Kopako titulua eskuratu zuen orduan eta Cardiff Rugby taldeak Challenge Cup txapelketaren garaikurra jaso zuen. Duela zazpi urte baino gehiago, guztira 84.000 zalek errugbi-maila gorenaz gozatu zuten San Mamesen, eta Challenge Cupera inoiz baino ikusle gehiago bertaratu ziren, estadioan 32.000 ikusle egon baitziren. Horregatik, euskal erakundeek errepikatu egin dute asmoa dela datorren urteko maiatzean «beste behin argi uztea zein den gure esentzia, nortasun-kultura, ekitaldi‑mota horrez gozatzeko gogoa eta abegi egiteko modua».

Sarrerak Salgai

Weekend packages asteburuko paketeen bitartez ia 24.000 sarrera saldu dira bi partiduetarako, eta EPCR «oso pozik» azaldu da orain arteko salmenta‑erritmoarekin. 2026ko finaletarako bidea hasteko ordu gutxi geratzen direnean, publiko orokorrarentzat salgai jarriko diren sarreren erdia baino gehiago saldu dira. Sarrerak hiru kategoriatan banatuta daude eta salgai jarraitzen dute EPCRren webgunean.

Orain arte saldutako sarreren artean, %82 Espainiako Estatutik kanpo erosi dira: ia erdia (%49) Frantzian, %16 Britainia Handian, erosketen %9 Irlandan izan dira eta %2 Italian. Gainerako %18tik, %42 Bizkaian eta %5 Gipuzkoan erosi dira.

Eusko Jaurlaritzak, Bizkaiko Foru Aldundiak eta Bilboko Udalak urteak daramatzate elkarrekin kirol-ekitaldi handiak sustatzen. 2024ko UEFA Women’s Champions League finalaren eta, aurten, maiatzeko UEFA Europa League-eko finalaren arrakasta eta gero, 2026ko errugbi-finalak beste pauso bat izango dira Euskadi, Bizkaia eta Bilbo nazioartekotzeko estrategia bateratuaren esparruan. ​

EPCRren webgunean sarrerak erosteko esteka

REDES SOCIALES:

BILBAO UDALA: YOUTUBE | FACEBOOK | X | INSTAGRAM | TIK TOK

BILBAO EKINTZA: YOUTUBE | FACEBOOK | X | INSTAGRAM

BILBAO TURISMO: FACEBOOK | X | INSTAGRAM