by

  • Bizkaiko ahaldun nagusi Elixabete Etxanobek eta Bilboko alkate Juan Mari Aburtok ikus-entzunezkoen industria sustatzeko estrategia eta sektorearen 2025eko jarduerari buruzko datuak aurkeztu dituzte gaur. Zifrak inoizkorik onenak dira: Bilbao Bizkaia Film Commission-ek lagundutako 219 filmaketa, 1.298 grabazio-egun, 9.878 kontratazio eta 138,11 milioi eurotik gorako eragin ekonomikoa izan dute, eta, 2024/2025aldia batuta 267,5 milioi eurotik gorakoa.

Elixabete Etxanobe Bizkaiko ahaldun nagusiak eta Juan Mari Aburto Bilboko alkateak ikus-entzunezko estrategia -lurraldean industria horretako jarduera ekonomikoa eta enplegua sustatzearren- eta 2024ko eta 2025eko jarduerari buruzko datuak – filmaketak, garapen ekonomikoa eta kulturala – aurkeztu dituzte gaur.

Zifra eta emaitza bikainak, sektore horren oinarriak eta garapena ezartzera eta duela hamaika urte Bilbao Bizkaia Film Commission zerbitzu publikoa sortzeko bi erakundeen erabaki estrategikoa berrestera etorri direnak. Tresna horrek, zehaztu duten bezala, “funtsezko zeregina izan du ikus-entzunezkoen sustapena kudeatzen eta bideratzen, ekoizpenak ezartzea erraztu baitu eta sektore horretako destino erakargarri eta lehiakor gisa kokatu baikaitu”.

Horrekin batera, kontuan hartu behar dira beste hainbat ekimen, ikus-entzunezko ekoizpenak sustatzera, filmaketak ekartzera eta ekosistemaren lehiakortasuna indartzera bideratutakoak; horren adibide bat da 2023an onartutako pizgarri fiskalak, ekoizpen enpresei finantzaketa, segurtasun juridiko eta “zero ziurgabetasun” bide berri bat eskaintzen dien tresna.

Jarduera hori guztia eta bi erakundeek Bilbon eta Bizkaian ikus-entzunezkoen industria indartzeko estrategia azaldu dute gaur, topaketa berezi batean. Bertan, sektoreko ordezkariak (ekoizleak…) eta Urduñako alkate Iker Santocildes ere izan dira.

Bizkaiko Ahaldun nagusiak adierazi duenez, “Bizkaia talentua jaio, hazi eta finkatu ahal izateko lekua izatea nahi dugu. Profesionalek beren karrera garatzeko alde egin behar ez duten lurraldea. Zineman eta ikus-entzunezkoetan erreferentziazko lekua izan nahi dugu, ez bakarrik filmatzeko agertoki gisa, baita industria sortzen den espazio gisa ere. Eta industriaz hitz egiten dugunean, enpleguaz ere hitz egiten dugu. Baina ez edozein lanpostu. Pertsonei beren lanetik duintasunez bizitzeko aukera emango dieten aukerak nahi ditugu, ez enplegu prekarioekin. Ikus-entzunezkoa sektore indartsua, profesionalizatua eta egonkortasuna eskaintzeko gai dena izatea ”.

Juan Mari Aburto alkateak aurreratu duenez, “atzera begiratuz gero, egiazta dezakegu denborak arrazoia eman digula industria berri horren aldeko apustuan, posizionamendua eta prestigioa irabazteko ikus-entzunezko ekoizpenaren erreferente gisa. Jakitun ginen lan asko zegoela egiteko, baina anbizioz hasi ginen, gogotsu, eta, batez ere, geure burua entzunarazteko eta aukeratuak izateko bokazioarekin, merkatu konplexu eta gero eta lehiakorrago batean.  Emaitzek ahalegin hori guztia islatzen dute.  Esan dezakegu filmaketa-leku izatetik ikus-entzunezko industria berri baten oinarriak ezartzera igaro garela”.

URTE EZIN HOBEA

2025eko jarduerari buruzko datuak «apartak» dira alkatearen hitzetan. Guztira, Bilbao Bizkaia Film Commission-en laguntzarekin 219 EKOIZPEN filmatu dira, aurreko urtean baino 51 gehiago (orduan 168 izan baitziren), eta 353 proiektu atenditu dira (2024an baino 57 gehiago).

Ekoizpenen zehaztapenak:

23 fikziozko film luze izan dira; 18 film luze dokumental; 13 fikziozko serie; 10 serie dokumental; 42 film labur, 39 telebista-saio; 54 publizitate-iragarki; 12 bideoklip; 6 argazki-saio; eta 2 bideoarte-proiektu.

Lan horiek guztiak egiteko 1.298 FILMAKETA-EGUN behar izan dira; hau da, bost grabazio baino gehiago lanegun bakoitzeko Bizkaiko 79 udalerritan. Alkateak esan duenez, “ikus-entzunezkoen plato handi bat gara, zalantzarik gabe”.

Alde handia dago datu horien eta 2015ean erregistratutakoekin: urte hartan 44 ekoizpen egin eta 87 proiektu atenditu ziren; guztira, 10 urteotan 1.554 filmaketa egin dira (eta beste 2.465 proiektu atenditu).

Bizkaiko ahaldun nagusiak nabarmendu du 2024ko eta 2025eko jarduera-maila handiari esker, guztira, 267,5 milioi euroko eragin ekonomikoa izan dela Bizkaian. Kopuru horretatik, 176,4 milioi zuzeneko eraginari dagozkio, lurraldean egindako ekoizpen-kostuei lotuta; 91,1 milioi, berriz, zeharkako eta eragindako ondorioei dagozkie, ekonomia osoari dagokionez. Urteen arabera, 2014an inpaktua 129,43 milioi eurora iritsi zen, eta % 6,7 hazi zen 2025ean, 138,11 milioi eurora iritsi arte, eta, horrela, ikus-entzunezko sektorearen joera finkatu zen lurraldean.

Ildo beretik, Etxanobek adierazi du ikus-entzunezko ENPRESEN kopuruak % 10,9ko hazkundea izan duela 2025ean Bizkaian (497 enpresa eta 448 enpresa, hurrenez hurren) eta % 18,5ekoa Bilbon (243, 2025ean eta 205, 2024an).Euskadiko ikus-entzunezkoen sektoreko enpresen % 54 Bizkaian daude, eta horietatik % 49 Bizkaiko hiriburuan.

Zifra horiek eragina izan dute laguntza izan duten proiektuetako KONTRATAZIOETAN: 2024-2025 biurtekoan 17.885 pertsona mobilizatu ziren, eta horietatik % 54,35 Bizkaikoak ziren.Horietatik 9.878 2025ean kontratatu ziren, eta 8.007 2024an, hau da, % 23,4 gehiago. Horren barruan, kontratatutako langileen % 74,4 teknikariak dira eta % 25,6 arlo artistikokoak.

Ikus-entzunezkoen arloko ENPLEGUA % 6,1 hazi da Bizkaian (2.268 afiliazio 2025ean), eta Bilbon % 7,1 (1.564 afiliazio).Alde horretatik, Bizkaiko sektore horretako enpleguaren % 69 hiriburuan batzen da, eta Euskadiko % 57, ordea, Bizkaian.

Era berean, fiskalitateak eremu horretan duen eragina azaldu du Diputatu nagusiak. 2020 eta 2024 artean, Bizkaian 98,1 milioi euro sortu dira ikus-entzunezko sektorerako kenkari fiskaletan, eta horietatik 69,2 milioi inbertitzaileei transferitu zaizkie finantzaketa-mekanismoen bidez.

Bultzada handiena 2023an izan zen, zerga-onura berriak indarrean jarri ondoren. Bi urtean soilik bildu da sortutako kenkari guztiaren % 87 eta finantzatutakoaren % 91. Horrela, jarduera nabarmen handitu da, 14 aldiz handiagoa baita: 2022an 4 milioi eurokoa izan zen, eta 2024an 56 milioikoa.

Etxanobek eta Aburtok azpimarratu dutenez, erregistratutako datuek “anbizioz, profesionaltasunez eta lehen mailako proiektuak erakartzeko gaitasunez aurrera egiten duen industriaren jauzi kualitatiboa” berresten dute.

BILBAO BIZKAIA IKUS-ENTZUNEZKOEN ESTRATEGIA

Ikus-entzunezkoen sektoreak azken hamaika urteetan izan duen jarduera positiboa ikusita, Bizkaiko Foru Aldundiak eta Bilboko Udalak Ikus-entzunezkoen Estrategia berria aurkeztu dute, Bilbao Bizkaia Ikus-entzunezko Hub-aren inguruan egituratzen dena. Hub-ak ikus-entzunezko industriaren nazioarteko erreferentzia-polo gisa kokatuko du lurraldea. Helburua da balioa ematea enpresen, profesionalen, azpiegituren, sorkuntzako talentuaren eta tresna publikoen tokiko ekosistemari, eta jarduera ekonomikoaren eta kalitatezko enpleguaren motor bihurtzea.

Hub-ean ikus-entzunezkoen kate osoa integratuko da, edukien sorkuntza eta garapenetik hasi eta ekoizpen, postprodukzio, banaketa eta sormenezko teknologia berrien onarpenera arte. Estrategiak katebegi horietako bakoitza indartzearen aldeko apustua egiten du, lehiakortasunean, berrikuntzan eta espezializazioan oinarritutako balio diferentzialeko proposamen baten bidez.

Hub-ak azpiegiturak, ekipamendu teknikoak, zerbitzu espezializatuak eta zerga-ingurune lehiakorra jarriko ditu sektorearen eskura, eta esparru erakargarria eratuko du inpaktu handiko ikus-entzunezko proiektuak ezartzeko eta bizkortzeko. Horrek guztiak indartu egingo du Bilbok eta Bizkaiak industria dinamikoa eta hedatzen ari dena hartzeko prestatutako lurralde gisa duten posizionamendua.

FILMAKETARAKO FUNTSEZKO ESPAZIOAK: ZORROTZAKO MUTURRA ETA URDUÑA

Ekoizpenak erakartzeko ezinbestekoa da espazio erakargarriak izatea. Ildo horretan, estrategiaren parte da BI ERRODAJE-EGOITZA BERRI sortzea:  Zorrotzako muturra, Bilbon; eta Maria Konpaina ikastetxe zaharra, Urduñan. Aurreikuspenen arabera, 2027an zehar egongo dira martxan.

Aburtok iragarri du “Bilbao Bizkaia ikus-entzunezkoen Hub-aren” egoitza nagusia izatera bideratuko diren Zorrotzako muturreko oraingo instalazioak urbanizatzeko eta birgaitzeko proiektua lizitatuko dela. Lehenengo etapa horretan, esparrua itxiko da, lau pabiloitan eta txalet zaharrean jardungo da, eta zerbitzu-sare osoa hobetu eta eguneratuko da, errodaje-espazio gisa izango duen erabilerara egokitzeko.

4 milioi euroko aurrekontua du eta kontuan hartu da ikus-entzunezkoen sektoreak berak agertu duela interesa hor kokatzeko. Izan ere, nabarmentzekoa da espazio horrek potentzialtasun handia duela filmaketen industriarako. Indarguneen artean, alkateak adierazi duenez, «Bilboko hiri-paisaiaren barruan kokapen pribilegiatua du, itsasadarretik hurbil, eraikinak eta kanpoko eremua moldakorrak dira, eta errepide-sarearekin, aireportuarekin eta garraio publikoarekin lotura onak ditu».

Lehen egoitza hori sektorearentzat eta sektorearen premietarako erreferentzia-espazio izatea nahi dute. Lanak aurtengo udazkenean hasiko dira.

Espazio honen moldakortasuna dela eta, Zorrotzako muturrak dagoeneko 30 ekoizpen baino gehiago hartu ditu 2018az geroztik, eta enklabe hori plato, ekoizpen-bulego, arte-biltegi, backlot… gisa erabili dute. Batzuk aipatzearren, El Hoyo, Interrail, La mala Rodriguez, Intimidad, La vida padre, Una vida no simple, Detective Touré, No puede vivir sin ti, Kill Jackie, Inurri Itsuak, Caballé, El silencio, Olimpia, El niño, Zeru ahoak…

Bestalde, Bizkaiko ahaldun nagusiak Foru Aldundiak Urduñan garatzea aurreikusten duen proiektua aurkeztu du. Maríaren ikastetxe zaharra izango da ekimenaren oinarria; dimentsio handiko espazioa da, 18.000 metro koadroko eraikina eta 10.000 metro koadroko lurzatia dituena. Urduñako Udalak bat egin du apustu estrategiko horrekin, udalerria ikus-entzunezko jarduerarekin lotutako gune gisa hobeto posizionatzeko.

Gaur egun, Karmele, Maspalomas edo Los Muertimer bezalako ekoizpen lokal eta nazionalek dagoeneko erabiltzen dute espazioa filmaketak egiteko, eta horrek sektorearen egokitasuna eta benetako interesa berresten du.  Arlo horretako industriak oso ondo baloratzen du toki hori, moldakorra eta neurrizkoa delako, eta horri esker neurri askotako ekoizpenak hartzeko aukera ematen duelako. Proiektuak 4,6 milioi euroko inbertsioa aurreikusten du eraikinaren gutxieneko egokitzapena egiteko.

Nodo hori Aiaraldeko Eskualdeko Plan Estrategikoaren (IHP) trakzio-proiektuetako bat da, eta horrek eskualdeko dimentsioa eta eskualdean ekonomia- eta enplegu-aukera berriak sortzeko gaitasuna indartzen ditu.

EUSKARAZKO EKOIZPENA HAZI ETA AINTZATESPENAK

Elixabete Etxanobe ahaldun nagusiak eta Juan Mari Aburto alkateak euskarazko ekoizpenen gorakada esanguratsua nabarmendu dute.   Azken urtean, Bilbon/Bizkaian fikziozko hiru film luze filmatu dira euskaraz, lau dokumental luze, bost fikzio-serie, bi serie dokumental eta hamabost film labur, telebista-saio, spot, bideoklip eta argazki-saioez gain.  Ildo horretan, nabarmendu dute «aretoetan gero eta presentzia handiagoa duela aretoetan, aintzatespen eta sari gehiago jaialdietan, eta posizionamendu handiagoa eta hobea telebistetan eta plataformetan».

Aldi berean, Bilbon/Bizkaian errodatu diren lan guztien talentu sortzaile, artistiko eta profesionala azpimarratu dute, eta horietako askok sari garrantzitsuak jaso dituzte.Batzuk aipatzearren:

“Los domingos”, “Maspalomas”, “Jone Batzuetan”, “Querer”, “Decorado”, “Karmele”, “Zeru ahoak”, “Angela” (zazpi aste eman ditu Netflix-eko TOP 10ean), “Pluribus”, (1. lekuan larogei herrialdetan), “La Tregua”, “Inuri Itsuak”, “El niño”, “Kill Jackie” telesaila, Catherine Zeta-Jones protagonista duena, “Ruega por nosotras”, “Caballé”, “Popel”, “The walking dead: Daryl Dixon”; “Sira”, “Gaua”, “Sacamantecas”, “Lapònia”, “La luz”, “Hermanas”, “Esta soledad”, “Argi gorriak”, “Las hijas”. “Becoming Capa”, “Hidden Assets”…

2025ean Bilbon eta Bizkaian filmatu duten ekoizpen-etxeek 5etik 4,69 puntuko nota eman diote Bilbao Bizkaia Film Commission-en paperari.

BILBAO BIZKAIA FILM COMMISSION

Bilboko Udalak eta Bizkaiko Foru Aldundiak Bilbao Bizkaia Film Commision zerbitzu publikoa eta doakoa sortzea sustatu zuten 2015ean, filmaketak artatzeko, kudeatzeko eta erakartzeko.

Bilbao Bizkaia Film Commission-en laguntza egonkor eta pertsonalizatua ekoizpenaren fase guztietan ematen da, lokalizazioetan, zerbitzu profesionaletan, administrazio-izapideetan, ekoizpen-espazioetan, ostatuan eta logistikan, bai eta babes eta konfiantza instituzionalean, segurtasun juridikoan eta pizgarri fiskaletan ere.

Lan hori guztia lankidetza publiko-pribatuari esker egiten da, ekoizleen eta eragile pribatuen eta erakunde publikoen arteko bitartekari gisa jarduten baitu. Bilboko eta Bizkaiko filmaketa-industrian aurrera egiteko beharrezko lankidetza da beraz.

Bilbao Bizkaia Film Commission Spain Film Commission-eko eta European Film Commission Network-eko kidea da. Azken horrek 33 herrialdetako 100 film commission-etik gora ordezkatzen ditu, Europako Batzordearen laguntzarekin.

by

  • CARNE y ARENA»k errealitate birtualeko murgiltze esperientzia bat eskaintzen du, bisitari bakoitza mexikar eta erdialdeko amerikar migratzaile eta errefuxiatuek egindako bidaiaren zati baten erdian kokatzen duena. Bisitariak ez du migrazioa ikusten: zeharkatu egiten du.
  • Errealitate birtualaren instalazioa EITBren Bilboko egoitzako 5. platoan kokatuko da, eta martxoaren 11tik ekainaren 20ra egongo da zabalik. Sarrerak EITBren webgunean erosi ahal izango dira otsailaren 17tik (martitzena) aurrera.
  • Erakusketa Bilboko Udalaren, Bizkaiko Foru Aldundiaren, BBK Fundazioaren eta EITBren eskutik dator, aliantza publiko-pribatu bat egin baita, giza eskubideekiko, kulturarteko bizikidetzarekiko eta gizarte-kohesioarekiko konpromiso instituzionala sendotzen duena.

Alejandro González Iñarritu mexikar zinemagilearen “Carne y Arena” murgiltze-esperientziak Bilbon ekingo dio, martxoaren 11tik ekainaren 20ra bitartean eta EITBren egoitzako 5. platoan, nazioarteko bira berriari.

Esperientzia hori bizi ahal izateko sarrerak EITBren webgune ofizialean egongo dira salgai, otsailaren 17tik (martitzena) aurrera; zehazki, www.eitb.eus/carneyarena

Erakusketa hau erakunde hauen eskutik dator Bilbora: Bilboko Udala, Bizkaiko Foru Aldundiko Enplegua, Gizarte Kohesioa eta Berdintasuna Sustatzeko Saila, BBK Banku-fundazioa eta EITB. Erakusketa egiteko, aliantza publiko-pribatu bat egin da, giza eskubideekiko, kulturarteko bizikidetzarekiko eta gizarte-kohesioarekiko konpromiso instituzionala sendotzen duena.

“CARNE y ARENA” garatzen deneko esparru estrategikoa koherentea da Garapen Jasangarrirako Helburuekin, Bilbo Kulturarteko Hiria III. Planarekin eta Bizkaiko Foru Aldundiaren Aniztasunaren eta Gizarte Kohesioaren II. Planarekin.

EITB-REN BILBOKO EGOITZAN

CARNE y ARENA (Birtualki Presente, Fisikoki Ikusezin) errealitate birtualeko instalazio hori EITBren Bilboko egoitzako 5. platoa espazio berrian egongo da 2026ko martxoaren 11tik ekainaren 20ra arte. Instalazio hori Alejandro G. Iñárritu mexikar zinemagileak sortua da.

Beraz, murgiltze esperientzia honen nazioarteko bira berriaren abiapuntua izango da Bilbo. Legendaryk, Emmerson Collectivek, Fundacione Prada Phi Studiok eta 90_20k ekoitzi dute, eta Industrial Light & Magicekin batera garatutako eguneratze teknologiko bat txertatu zaio, bere potentzia sentsoriala indartzeko eta publikoaren harrera-baldintzak hobetzeko.

Proiektuak, gainera, Alejandro G. Iñarrituren parte-hartze aktiboa izango du, eta herritarrei, unibertsitate-eremuari eta industria zinematografikoari zuzendutako hitzaldi, elkarrizketa publiko eta topaketetan parte hartuko du, migrazioari eta bizikidetzari, eta arteari eta teknologiari buruzko gaiak jorratzeko.

Erakustaldiko hiru hilabeteetan, eztabaidak eta hausnarketarako espazioak programatuko dira, data esanguratsuekin batera, hala nola Arraza-diskriminazio mota guztiak desagerrarazteko Nazioarteko Egunean (martxoaren 21a), Kultura Aniztasunaren Munduko Egunean (maiatzaren 21a) eta Errefuxiatuen Munduko Egunean (ekainaren 20a).

Baieztatutako lankidetzen artean, honako hauek nabarmendu behar dira:

  • Metro Bilbao; erakusketa osagarri bat egingo du martxoan eta apirilean Moyuako eta Santimamiko geltokietan.
  • ZAS! Zurrumurruen Aurkako Sarea (Zurrumurruen aurkako euskal sarea); arrazismoaren eta xenofobiaren kontrako sentsibilizazio- eta prebentzio-jarduerak bultzatuko ditu.
  • Bilbao Bizkaia Film Comission; ikus-entzunezkoen industriarekiko topaketa profesionalak eta jarduerak koordinatuko ditu, sortzaileekiko solasaldiak eta unibertsitateko eskola magistral bat bat barne.

MIGRAZIOARI ETA GIZA IZAERARI BURUZKO MURGILTZE-ESPERIENTZIA

2017an, Cannesko 70. Jaialdian estreinatu zen —lehiaketaren historian, lehenengo proiektua da errealitate birtualean aurkeztu dena—, eta Hollywoodeko Akademiak Oscar® berezia eman zion urte horretan bertan, «esperientzia narratibo aparta» dela iritzita. CARNE y ARENAk murgiltze-zeharkaldi bat proposatzen du, bisitaria mexikar eta erdialdeko amerikar migratzaile eta iheslarien bidaiaren zati baten erdigunean jartzen duena.

Errealitate birtualeko sei minutu eta erdiz —guztira, hamabost minutu inguruko esperientzia batean—, ikuslearen eta historiako protagonistaren arteko mugak deseginez joaten dira. Bisitariak ez du migrazioa ikusten: zeharkatu egiten du. Oinez doa harearen gainean, bertatik bertara entzuten, sentitzen eta esperimentatzen du erbesterako bideari lotzen zaizkion pertsonen hauskortasuna eta duintasuna.

Iñárrituren hitzekin esanik, obra hau “enkoadraketaren diktadura apurtzeko” eta zuzeneko esperientzia bat ahalbidetzeko nahitik sortu zen, “migratzaileen oinekin ibiliz, haien azalaren azpian eta bihotzaren barruan”.

MIGRAZIO-MEMORIA ETA KORRESPONDENTZIA HISTORIKOA

Iñarrituk berak nabarmendu du zein egokia den instalazioa Bilbon jartzea, kontuan izanik “testuinguru globala, zeinean gorrotoaren diskurtsoa eta bestearekiko begiradaren erradikalizazioa areagotzen baitira“, eta, hain zuzen ere, “teknologia eta artea dira, ikuspegi humanista batetik eta esplorazio antropologiko batetik, ulermena sor dezaketenak, hura, azken batean, enpatia esateko beste modu bat baizik ez baita. Politikarik eta ideologiarik gabe, Carne y Arenak are garrantzi handiagoa hartzen du.”

Zuzendariaren ustez, bira Euskadin hastearen dimentsio sinbolikoa ukaezina da: “Euskadiren eta Mexikoren artean partekatutako historia horrek —familia-, kultura- eta politika-loturen bidez ehundu den historia horrek— eremu emankor bat sortzen du, obra honek oihartzuna eta pertenentzia-sentimendua izan dezan“.

Zuzendariak gogoratu du nolako elkartasuna erakutsi zien Mexikoko herriak Espainiako Gerra Zibilaren osteko euskal erbesteratuei, eta nola berak ere familia-loturak dituen Euskadirekin. Horrela, emozio-zubi bat zabaldu zuen komunitate bien artean.

Bizkaia eta Bilboko hiria erreferente dira migrazio-memoria sendoak eta erbestealdiari nahiz harrerari lotutako esperientzia historikoak markatutako gizarteen artean. Memoria partekatu horrek lotura sakona du CARNE y ARENA zeharkatzen duten balioekin: berdintasuna, giza duintasuna eta aniztasunarekiko errespetua. Eta lotura hori nazioarteko testuinguru batean egiten du.

Informazio praktikoa

Egunak: 2026ko martxoaren 11tik ekainaren 20ra arte
Lekua: 5. platoa. EITBren egoitza (Bilbo)
Sarrerak: otsailaren 17tik (martitzena), salgai, EITBren webgunean: www.eitb.eus/carneyarena
Prezioa: 10 € + kudeaketa-kostuak (1,21 €)

SARE SOZIALAK:

BILBOKO UDALA:

BILBO, KULTURARTEKO HIRIA
BIZKAIKO FORU ALDUNDIA
BBK Banku-fundazioa
EITB

LAGUNTZAILEEN Sare Sozialak

ZAS
METRO BILBAO

by

  • Kontxi Claverrek, Bilboko Udaleko Ekonomiaren Garapeneko, Merkataritzako, Turismoko eta Enpleguko Saileko zinegotziak, Bilboko elkartearen egoitza bisitatu dute, arte inklusiboa sustatzeko asmoz antolatzen dituzten tailerrak gertutik ezagutzeko.

  • AmiArte kultur elkarteak jaso zuen Bilbao Basque Fest 2025 jaialdiko Gourmet Txokoan bildutako dirua, 2.719 euro.

Kontxi Claverrek, Ekonomiaren Garapeneko, Merkataritzako, Turismoko eta Enpleguko Saileko zinegotziak, eta Javier Garcinuñok, Bilbao Ekintzako zuzendari nagusiak, AmiArte elkarte bilbotarraren instalazioak bisitatu dituzte. AmiArte elkarteko Bego Intxaustegi presidentearekin batera, lehen eskutik ezagutu dituzte bertan garatzen dituzten proiektuak, non artea hiriko ekonomia eta gizartea garatzeko eta eraldatzeko tresna bihurtzen den.

AmiArte kultur elkarteak jaso zuen Bilbao Basque Fest 2025 jaialdiaren Gourmet Txokoan bildutako dirua, 2.719 euro. AmiArte elkarte kulturala hautatu dute aurten Areatzako Gourmet Txokoaren karpara sartzeko (edukiera mugatuarekin) dohaintza sinboliko gisa ordaindu behar ziren 2 euroko sarrerekin bildutako funtsak jaso ditzan.

“Bilboko Udalak asko baloratzen du Bilboko elkarteek, besteak beste AmiArtek, egiten duten ahalegina eta lana gure hiriko ekonomia sortzailea bultzatzeko, egoera zailean dauden pertsonen, profesionalen eta artisten arteko topaketa eta lankidetza sustatuz”, azpimarratu du Kontxi Claverrek.

AmiArte espazio inklusiboa da, non sormena oztoporik gabe loratzen den. Bertan, pertsona bakoitzak, bere egoera edozein dela ere, lekua du bere burua adierazteko, konektatzeko eta bere potentziala deskubritzeko. AmiArtek espazio seguru eta inklusibo bat eskaintzen du parte hartzaileek beren sormena esplora dezaten eta arteak duen botere eraldatzailea deskubri dezaten.

SARE SOZIALAK:

by

  • INNOLAB Bilbaok, sektore eta teknologia anitzeko berrikuntza plataforma irekiak, teknologia ezartzea eta talentu teknologikoa garatzea sustatzen du, eta seigarrenez egin du apustu ‘LEADERS IN TECH CONFERENCE’ ekimenaren alde. Beste behin, LEADERS IN TECH CONFERENCE teknologiaren eta berrikuntzaren alorreko enpresa handi eta garrantzitsuenen topaketa izango da, seigarren urtez segidan.

  • Hitzaldien, elkarrizketen eta mahai-inguruen bidez, konferentziak punta-puntako teknologien erabilerak ematen dituen aukerak erakutsiko dizkigu, esaterako, adimen artifizialak, zibersegurtasunak edo datu-espazioek enpresa-eremuan ematen dituztenak, baita berrikuntzaren eta transferentzia teknologikoaren alorreko joera berriak ere, besteak beste. Ekitaldia urriaren 10ean egingo da, goizez, Bilboko Iberdrola dorrean, eta doan bertaratu ahalko da, aurrez izena emanda.

  • Bilboko Udalaren laguntzarekin, ekitaldia urriaren 10ean izango da, goizez, Bilboko Iberdrola Dorrean, eta bertaratzea doakoa izango da, aldez aurretik izena emanda. Kontxi Claver, Bilboko Udaleko Ekonomiaren Garapen, Merkataritza, Turismo eta Enplegu Zinegotziak kongresuaren hasiera ekitaldian parte hartuko du.

‘LEADERS IN TECH CONFERENCE’ saioaren seigarren edizioa azken joera teknologikoen eta berrikuntzaren topagune bihurtuko da urriaren 10ean Bilbon. Jardunaldi honek punta-puntako teknologien oraina eta etorkizuna eta horien aplikazioa izango ditu ardatz, hala nola adimen artifiziala, zibersegurtasuna edo datu-espazioak, transferentzia teknologikoaren aldeko apustu sendoa egiteaz gain. Bilboko Udalaren babesa duen ekitaldia izanik, Kontxi Claver, Ekonomiaren Garapen, Merkataritza, Turismo eta Enplegu Zinegotzia izango da irekiera-ekitaldian. Era berean, BBK Fundazioko Gizarte Ekintzako zuzendari Nora Sarasola ere bertan izango da.

Hainbat keynote hitzaldi egongo dira, honako aditu hauek emanak, besteak beste: Rebeca Santamaria-Fernández, AA aurreratuko Gemini ereduaren ikasketa-eredua sortu zuen Google DeepMind enpresako Harreman Estrategikoetako zuzendaria, eta Laura Baus, Vodafone Espainiako Zibersegurtasun zuzendaria (CISO). Gainera, Silicon Valleyko berrikuntzaren oinarriak ezagutzeko aukera ere egongo da, Anna Navarro Schlegel plataforma teknologikoen eta azpiegituren aditu eta exekutiboaren eta Iberdrolako (i-DE, Sare Elektriko Adimendunak) Prozesuen eta Teknologiaren zuzendari Estíbaliz Goñiren arteko elkarrizketan, Annak han eman baitu bere ibilbide profesionalaren zati handi bat, eta esperientzia inpaktu nola bihurtu jakiteko aukeraz ere gozatu ahalko da.

Gainera, jardunaldian hainbat mahai-inguru egingo dira. Horietako bat datu-espazioei buruzkoa izango da, eta Gaia X Espainia elkarteko zuzendari nagusi Francisca Rubiok, IDSAko (International Data Space Association) Datu Espazioen Teknologiako zuzendari Sonia Jiménezek, eta DAMA Espainiako idazkari eta Batzorde Exekutiboko kide Sofía Kosenkok hartuko dute parte, baita Tecnaliako Proiektuen zuzendari Juncal Alonsok ere, moderatzaile-lanetan. Denen artean eztabaidatuko dute zer indargune eta aukera dituen datuak zeregin estrategikoa hartzen duen eta berrikuntza eta lehiakortasuna sustatzeko baliabide partekatu bihurtzen den ingurune kolaboratibo berri horrek. Halaber, hainbat sektoretako erabilera-kasu errealak erakutsiko dira, Inkolan, LKS Next, Ikerlan eta Vicomtechek abian jarritakoak, besteak beste.

Transferentzia teknologikoak ere izango du protagonismoa; izan ere, mahai-inguru bat egingo da Venture Builderren eta DeepTech-en espezializatutako inbertsio-bitarteko espezializatuen adibide aktiboak ezagutzeko, teknologiaren alorreko transferentzia indartzeko. Cristina del Campok aurkeztuko ditu ,inbertsio-bitartekoen institutu teknologikoen REDIT Ventures sarearen parte den AINIA zentro teknologikoko zuzendari nagusiak, inbertsioan, ezagutzaren transferentzian espezializatutako lurraldeko beste eragile batzuekin eta arrakastazko zenbait kasurekin batera.

Jardunaldi honetan, gainera, gure lurraldeko berrikuntza-hub garrantzitsuenetako batzuen xedea eta jarduera ezagutaraziko dira, esaterako, Iberdrolaren Global Smart Grids Innovation Hub, BBK Kuna eta Sidenor 612renak.

LEADERS IN TECH CONFERENCEren aurreko bost edizioek arrakasta handia izan zuten, zientziaren eta teknologiaren alorreko 90 hizlarik baino gehiagok hartu baitzuten parte, baita 95 eragile eta antolakunde publiko-pribatuk ere; horregatik jarraitzen du INNOLAB Bilbaok teknologiaren eta berrikuntzaren alorreko adituen Espainia iparraldeko foro handienetako bat den honen aldeko apustua egiten.

Seigarren edizio honetan egungo eta etorkizuneko joera eta aurrerakuntza teknologikoak ezagutaraziko dira, eta enpresen ekosistemarako haien erabilerarik aurreratuenak bultzatuko eta sustatuko dira. Hori guztia, 360 °ko begirada emango diguten erreferentziazko enpresetako profesional handien eskutik.

Hona hemen egitarau osoa eta izena doan emateko aukera.

Konferentzia honen iturburua LEADERS IN TECH proiektua izan zen, emakumezko adituen eskutik teknologiaren eta berrikuntzaren aukera berriak zabaltzen dituena, beste bi jarduketa ildorekin batera:  LEADERS IN TECH COMMUNITY, 4.0 talentuari buruzko hileko elkarrizketaz osatutako komunitatea, eta LEADERS IN TECH THINK TANKS, teknologien inguruko aldizkako topaketak.

INNOLAB Bilbaori buruz

INNOLAB Bilbao (www.ilb.eus) berrikuntzako plataforma ireki bat da, talentua, teknologia eta industria bateratzen dituena egungo enpresen erronkei irtenbide digital berriak emateko. Hori merkatuan aplikatzeko moduko DeepTech-prototipatzearen bitartez egiten du, joerak eta teknologiak digitalizatu gabeko eremuetan aplikatzeko ematen dituen eskaintzak identifikatuz. 2016an sortu zen, Bilboko Udalaren bultzadari esker, eta bere gaitasunari enpresa pribatuen baliabideak gehitu zizkion: Iberdrola, Mondragon korporazioa, BBK Fundazioa, IMQ Taldea, Deustuko Unibertsitatea, Sidenor, Inkolan BCAM (Basque Center for Applied Mathematics), Tecnalia, Vicomtech eta El Correorenak.

by

  • Belgikako Kortrijk eskualdeko zenbait enpresa, erakunde publiko eta hezkuntza-zentroetako hogeita hamar ordezkarik osatzen dute Bilbo bisitatuko duen delegazioa. Haien helburua: diseinuaren eta berrikuntzaren arloan Bilbo erreferentziazko hiri gisa izendatzea

  • Kortrijk-en antzera, UNESCOren Hiri Sortzaileen Sarearen baitan dago Bilbo, eta garapenaren eragile gisa sormena eta diseinuaren sektorea sustatzeko apustu argia du

Gaur asteazkena eta etzi ostirala bitarte, Bilbok Kortrijk eskualdetik (Belgika) iritsitako delegazio baten bisita jasoko du. Delegazioa enpresetako, start-upetako, hezkuntza- zentroetako, unibertsitateetako eta erakunde publikoetako hogeita hamar ordezkarik osatzen dute. Kortrijk Bilborekin batera UNESCOren Hiri Sortzaileen Sarearen baitan diseinu kategorian dago. Bi hiriek diseinuaren eta sormenaren aldeko apustua egin dute, garapen estrategia baten baitan giro parte-hartzaile eta jasangarri batean bizi-kalitate hobea sustatzeko.

Hiru eguneko bisita horren helburua Belgikako hiri horretako ordezkariak inspiratzea izango da, haien eremu profesionaletan berritzaileagoak eta sortzaileagoak izan daitezen. Era berean, Bilboko sormen-ekosistema ezagutzeko aukera izango dute, bi aldeen artean egon daitezkeen elkarlanerako bideak topatzeko helburuarekin.

Egonaldian zehar, diseinura, sormenera eta berrikuntzara bideratutako zenbait erakunde eta espazio bisitatutako dituzte, besteak beste, IED Kunsthal Bilbao eta AS Fabrik Bilbao. Gainera, kultur jarduerak ere antolatu dituzte, hala nola Azkuna Zentrora asteazken arratsalde honetan egingo duten bisita gidatua.

Kortrijk-ek Bilbo hautatu du diseinuaren sektorearen alde apustua egiten duen ereduzko helmuga gisa, tokiko profesionalei ikusgarritasuna ematen dielako eta nazioarteko proiekzioa duten lankidetza-ekimenen garapena sustatzen duelako. Horren adibide dira, besteak beste, lehenbizikoz If Design Student Awards sariak Alemaniatik kanpo antolatu izana, Bilbao Bizkaia Design Week proiektua edota 5X5 Bilbao programa abian jarri izana, zeinak lehenengo aldiz hiriko euskal enpresak diseinuaren profesionalekin harremanetan jarri dituen, ETEen erronka errealentzako soluzio berritzaileak garatzeko.

Designregio Kortrijk da aipatu dugun 5X5 Bilbao programaren erakunde kolaboratzaile eta sustatzailea. Haien eskutik etorri da baita ere Bilbora antolatutako bidaia. Izan ere, Bilbao Ekintzaren bidez, lankidetza aktiboa daukate Bilboko Udalarekin. Haien xedea honako hau da: Belgikako eskualde horretako sormen-talentua batzea, sarean lan egin eta sormena eta berrikuntza sustatzeko. Zertarako? Eskualde sortzaileago, berritzaileago eta ekintzaileago bat eraikitzeko.

SARE SOZIALAK

by

  • Hiribildua Innpulso Sarean sartu den 22 hirietako bat da, udalerri berritzaileen arteko lankidetza sustatzen duen estatuko plataforma.

Bilbo ofizialki izendatu dute “Zientziaren eta Berrikuntzaren Hiria”.Sari hori Zientzia, Berrikuntza eta Unibertsitate Ministerioak ematen du eta udalerriek azpiegituretan eta I+G+B politiketan inbertitzeko daukaten konpromisoa eta garapen jasangarri eta berritzailearen motor gisa daukaten eginkizuna aitortzen du.

Hiribilduak aintzatespen hori jaso du joan den martxoan Innpulso Sarean sartu diren 22 hirietako bat delako. Sare horrek udalerri berritzaileen arteko lankidetza sustatzen du eta dagoeneko 112 hiri dira, tamaina guztietakoak.

Zehazki, 100.000 biztanletik gorako hirien kategorian, aurten hauei eman zaie sari hau: Alcorcón, Bilbo, Burgos, Getafe, Huelva eta Reus; 20.001 eta 100.000 biztanle bitarteko udalerrien kategorian, Arteixo, Aspe, Castro-Urdiales, Cieza, Granollers, La Rinconada, La Vall d ‘Uixó, Manises, Manresa, Rota eta Sant Joan Despiece; eta 20.000 biztanletik beherako hirien modalitatean, Aller, Castropol, Genalguacil, Mundaka eta Santomera. Sareak udalen arteko lankidetza sustatzen du, kudeaketa-jardunbide egokiak eta proiektuak herritarrei komunikatzeko ekimenak partekatuz.

Ildo horretan eta Innpulso Sarean sartzea eta aintzatespen hori oinarri hartuta, Zientzia eta Berrikuntzako Hirien Biltzarraren zortzigarren edizioa 2026ko otsailaren 4an eta 5ean egingo da Bilboko Euskalduna Jauregian, eta 1.500 batzarkide baino gehiago bertaratzea aurreikusten da.

“Ondo egindakoak definitzen gaitu” lelopean, 2026ko Biltzarra jardunbide egokiak trukatzeko, lurralde-berrikuntza bultzatzeko eta aliantza publiko-pribatuak indartzeko erreferentzia-espazio gisa planteatzen da.

SARE SOZIALAK:

by

  • Hiria destino-pilotu gisa hautatu dute “Bilbao Convention Bureauren bidez jardun jasangarrien arloan izan duen ibilbide eta konpromiso nabarmenagatik”.

  • Kontxi Claverrek, Ekonomiaren Garapeneko, Merkataritzako, Turismoko eta Enpleguko Saileko Zinegotziak, nabarmendu du topaketa honek eta proiektuak ekitaldien ekosistemako eragile guztiak kontzientziatzeko elementu gisa duten balioa. Kontxi Claverrek esan duenez, “bileren, pizgarrien, hitzaldien eta erakusketen MICE turismoaren esparruan hiriak destino jasangarri gisa duen posizio gero eta sendoagoa berresten duen lana da”.

Ostegun honetan Bilbon biltzarrak, konbentzioak eta bestelako ekitaldi korporatiboak egiteko destino jasangarrien eta legatuaren arloko ekintza-, ezarpen- eta prestakuntza-plana aurkezteko prestakuntza-topaketa bat egin da. Plana Spain Convention Bureauk garatu du beste eragile batzuekin lankidetzan, besteak beste Bilboko Udaleko Bilbao Convention Bureau.

Sektorearen erronkak identifikatzeko lehen fasea gauzatu ondoren gaur goizeko topaketa bigarren fasean kokatzen da. Fase honen barruan MICE ekitaldien plangintza estrategikoa hobetzeko funtsezko gaiak jorratzeko saio espezializatuak landu dira, lurraldean duen inpaktua optimizatuz eta destinoaren jasangarritasun-printzipioekin eta berroneratzearekin bat datorrela bermatuz. Gainera mahai-inguru bat egin da, non adituek eta udal-ordezkariek sektorearen bilakaerari buruz eztabaidatu duten, ekitaldien plangintzaren arloko jardunbide egokiak partekatuz.

Aipatutako planaren destino pilotu gisa Bilbo aukeratu izanaren oinarria izan da “jarduketa jasangarrien arloan azken urteotan izan duen ibilbide eta konpromiso nabarmena, bere Biosphere ziurtagiriak berresten duen bezala, eta bereziki, GDS (Global Destination Sustainability) rankingean munduko 14. postua lortu izana”. Indize honek hirietako jarduketa jasangarriak neurtzen ditu ekonomiaren, gizartearen, kulturaren eta ingurumenaren esparruko 75 adierazleren bidez.

Ildo beretik, azpimarratzekoa da Bilbao Convention Bureauk Arima Berdea komunitatea sortu duela, gizarte jasangarriago baten aldeko kezka partekatzen duten hainbat erakunderen plataforma eta eztabaidarako gunea dena. Bilbao Convention Bureau MICE turismoaren (bilerak, pizgarriak, hitzaldiak eta erakusketak) esparruan hiriak destino jasangarri gisa duen posizio gero eta sendoagoa berresten duen beste elementu bat da.

Kontxi Claver, Ekonomiaren Garapeneko, Merkataritzako, Turismoko eta Enpleguko Saileko Zinegotzia, eta Cristina Montalvá, FEMP (Federación Española de Municipios y Provincias – Espainiako Udalerrien eta Probintzien Federazioa) elkarteko Berdintasun eta Toki Politiketako zuzendaria, Bilboko Ercilla hotelean egin den topaketan izan dira, eta  ekitaldien ekosistemako eragile guztiak kontzientziatzeko elementu moduan proiektuak eta jardunaldi honek duten balioaz mintzatu dira.

Zinegotziak aurreratu du, gainera, une honetan “biltzarren sustatzaile batzuen eta elkarte zientifikoen eskutik, epe luzerako legatu-programen sustapenean“ aurrera egiten ari direla, “sustatzaile eta elkarte horiek gure hirian egiten dituzten kongresuetatik abiatuta, eta gure hiritik igarotzen ari diren adituen joan-etorria baino zerbait gehiago izan behar dutela zabaltzean”.

Proiektu honen azken helburua da Spain Convention Bureauri atxikitako destino guztiei ibilbide-orri bat helaraztea, jasangarritasunarekiko sentsibilitatea handitzeko eta ekitaldien inpaktu positiboak indartzeko asmoarekin.

SARE SOZIALAK

by

  • Elementu berriak Moyua plazan eta Casilda Iturrizar parkean jarriko dira, eta datorren astean hasiko dira instalatze-lanak bakoitzerako aukeratu den lekuan, azaroan prest egon daitezen argiak pizteko ekitaldi ofiziala egiteko.

Badira aste batzuk Bilboko Udala lanean hasi dela datozen Gabonetan hiria argiztatuko duten argiak jartzeko. Hala, aurten ere, 1.500.000 led argik baino gehiagok beteko dituzte kolorez gure kale eta plazak.

Beraz, berriro izango ditugu Hiriko Gabonetako estanpa tradizionalak, hala nola Areatzako baso magikoa –ehun urtetik gorako 120 zuhaitz argiztaturik dauzkana–, Udalaren eraikin nagusiaren aurreko bola handia, Arriaga plazako arbolatzarra, Kale Nagusiko argi urdinak, baldosak, Olentzeroren eta Mari Domingiren irudiak edo urrezko balea handia…

Haiez guztiez gainera, aurten beste instalazio ikusgarri berri bi ere izango ditugu Moyua plazan eta Casilda parkean, Udalak erositakoak, 430.000 euroko zenbatekoan. Eta haiek jartzeko lanak datorren astean bertan hasiko dira.

Biek ala biek argia eta soinua uztartuko dituzte, eta hiriko Gabonetako paisaian beste erakargarritasun bat izango dira, ikusgarria eta soinuduna izango dena eta bilbotarren eta egun horietan bisitatuko gaituzten pertsonen flashak eta begiradak berenganatuko dituztenak.

SARE SOZIALAK:

by

  • Edizio horretan, hirian filmatutako filmei buruzko artikuluak daude, baita hiria zinemarekin lotzen duten testuak ere; aldizkariko lantaldeak egin du lan hori, Bilbao Bizkaia Film Commission–en laguntzarekin.

  • Urteetan zehar, bilakaera zinematografikoaren lekuko izan da Bilbo, eta, kasu askotan, hiriaren beraren eraldaketarekin batera gertatu izan da.

‘Versión Original’ zinemari buruzko aldizkari tematikoak 2024ko ale berezia aurkeztu du: ‘Bilbao en el cine’. Bertan, hiriaren eta zinemaren arteko loturari buruzko azterlan bat egin dute, Bilbao Bizkaia Film Commission-en laguntzarekin.

2020an ‘Versión Original’ aldizkariak Madril hiriari eskainitako ale berezi bat argitaratu zuen, eta hainbesteko oihartzuna izan zuen eta hainbeste interes sorrarazi zuen, ezen urtean behin horren antzeko azterlan bati eskaintzen dioten hilean behin plazaratzen duten aldizkaria. Horiek horrela, 2021ean Bartzelona hiria izan zen aldizkariaren agertokia, 2022an Salamanca eta 2023an Sevilla.

2024an, Bilbo izan da hiriaren eta zinemaren arteko loturari buruzko azterlanak hizpide hartu duen hiria. Edizio horretan, hirian filmatutako filmei buruzko artikuluak daude, baita hiria zinemarekin lotzen duten testuak ere; aldizkariko lantaldeak egin du lan hori, Bilbao Bizkaia Film Commission–en laguntzarekin.

Bilbao Bizkaia Film Commission-en helburua da filmaketak hirira eta lurraldera erakartzea; ildo horretatik, 2023an 151 ekoizpen filmatu dira bertan. Hala, ekoizleei eta profesionalei arreta ematen die, beren proiektuetarako agertokirik onenak aurki ditzaten. Bilboko Udalak eta Bizkaiko Foru Aldundiak bultzatutako zerbitzu horrek 58,5 milioi euroko eragin ekonomiko zuzena sortu zuen 2023an, hau da, 2021ean lortutako datuaren laukoitza; horrek erakusten du Bilbao Bizkaia Film Commission-ek lagundutako ikus-entzunezko proiektuek joera ona dutela.

Urteetan zehar, bilakaera zinematografikoaren lekuko izan da Bilbo, eta, kasu askotan, hiriaren beraren eraldaketarekin batera gertatu izan da. 1913ko La inauguración del campo de San Mamés filmetik hasi eta azken ekoizpenetaraino, hala nola Una vida tan simple (2023), zinemagintza gai izan da etengabe aldatzen ari den gizarte baten eguneroko bizitza, pasioak, tentsioak eta gatazkak erakusteko. Bilbok XX. mendearen erdialdean industriagune izatetik XXI. mendeko ikono kultural eta arkitektoniko izatera iristeko izan duen bilakaera zineman ere islatu da, non hiriko iraganaren eta orainaren arteko kontrasteak erakutsi baitira.

‘Versión Original’ aldizkaria 1993an sortu zen, eta gaur egun estatu mailan ibilbide luzeena duen aldizkarietako bat da, eta zinema aldizkari tematiko bakarra. ‘Versión Original’ ez da ohiko kritika zinematografikoak egiten dituen argitalpen bat; aitzitik, aldizkariaren testuetan filmak gomendatzearen xede bakarra honako hau da: gomendatutako zinta ikusteko nahia piztea irakurlearengan; modu horretan, proiektu kultural honetan parte hartzen duten guztiek partekatzen duten zazpigarren artearekiko grina sorraraztea eta sustatzea da bere asmoa. Lan hori ahalik eta kontu eta zorroztasun handienarekin garatzen da edukia idazterakoan, helburu nagusietako bat irakurketak eta idazketak beharrezkoa duten sustapena indartzea baita.

Gainera, aldizkariaren ezaugarri nagusia altruista eta humanitarioa da, bertan lan egiten duten pertsona guztiek eskuzabaltasunez eta elkartasunez lan egiten baitute, eta salmenten bidez lortzen diren irabaziak ReBross Fundazioak laguntzen dituen proiektu humanitarioetara bideratzen dira.

by

  • Best Real Estate Investment Destination kategorian saritu dute Bilbo, Zorrotzaurreko proiektuaren inguruan aurkeztutako hautagaitzari esker, berroneratze eta berrikuntza urbanistikoaren adibidea baita.

  • Higiezinen sektoreko The District ekitaldian izan da Bilboko Udala, eta NEBEXT antolatzaileak aintzatetsi egin du gure hirian aukerak sortzeari eta hiri-plangintzari dagokionez egindako lana.

Higiezinen inbertsiorako helmuga onenaren saria (Best Real Estate Investment Destination) eman diote Bilbori 2024ko World Class District Awards sarietan, Zorrotzaurren hiria berroneratzeko lanaren inguruan aurkeztutako hautagaitzari esker. Higiezinen sektoreari lotuta Bartzelonan egiten den The District ekitaldiaren antolatzaileak, NEBEXTek, urtero banatzen ditu sari horiek; aste honetan ekitaldi horretan izan da Bilboko Udala, Invest in Bilbao-ren bitartez.

Bilbok World Class District Awards sarietan parte hartzen duen bigarren aldia da, 2023an ondo merezitako finalista postua lortu ostean. Aurten, hautagaitza irabazleak hirigintza-berrikuntzaren, jasangarritasunaren eta etxebizitza eskuragarriaren aldeko apustua izan du ardatz, lankidetza publiko-pribatuaren ikuspegitik.

Best Real Estate Investment Destination sariak higiezinen inbertsioa bultzatzeko politika onenak bultzatzen dituzten erakundeak aintzatesten ditu. Ildo horretatik, egindako lana aitortzeaz gain, aukera paregabea da Bilbo hiri dinamiko eta ireki gisa indartzeko, non higiezinen sektoreak funtsezko zeregina baitu.

SARE SOZIALAK: