• Una vida no tan simple, HBO Patria telesailaren zuzendarikide Félix Viscarreten azken filma, filmatzeko zinema-set bat izango da berriro Bilbo

• Bilboko Udalak eta Bizkaiko Foru Aldundiak sustatutako Bilbao Bizkaia Film Commission-en aholkularitza du filmaketa berri honek

Bilbo Felix Viscarret zuzendariaren azken filmaren eszenatoki bihurtu da egun hauetan. Zehazki, Una vida no tan simple lana filmatu da bertan, amatasunari eta aitatasunari buruzko komedia bat, non Miki Esparbék, Alex Garcíak, Olaya Calderak eta Ana Polvorosak parte hartzen duten. Filmaketa berri honek Bilbao Bizkaia Film Commission-en aholkularitza du, Bilboko Udalak eta Bizkaiko Foru Aldundiak sustatutako ikus-entzunezko proiektuen arreta, kudeaketa eta erakarpen zerbitzua.

Viscarret, berriki HBOren Patria telesaileko zuzendarikide-lanetan aritua, Bilboko Udaletxean izan zen atzo, esku artean duen lana filmatzeko. Bertan izan ziren, besteak beste, Miki Esparbé eta Olaya Caldera aktoreak, baita filmaren ekoizle Iker Ganuza ere. Azken horrek Akelarre filma ekoitzi zuen, hain zuzen ere, 2021eko Goya sarietan bost sari eskuratu zituen lana.

Garapen Ekonomiko, Merkataritza eta Enplegu Saileko zinegotzi Xabier Ochandianok harrera egin zien guztiei, eta lan-topaketa bat izan zuten filmaketari buruz eta Bilbok zinemaren munduan dituen aukerei buruz; izan ere, hiriak gero eta eskaera gehiago jasotzen ditu eta gero eta erakargarriagoa bihurtzen ari da.

Duela pare bat hilabete, Félix Viscarret eta bere lantaldea Juan Mari Aburto alkatearekin izan ziren, eta solasaldi horri esker sortu zen Bilboko Udaletxean bertan filmatzeko aukera.

Viscarretek (Iruña, 1975) 2007. urtean debutatu zuen Bajo las estrellas lanarekin. Horren atzetik, Cuatro estaciones en La Habana eta Fernando Aranbururen eleberrian oinarritutako Patria telesaila egin ditu. Orain, No mires a los ojos lana filmatzeko lanak amaitu berri ditu.

Una vida no tan simple bere bosgarren filma izango da eta datorren urtean estreinatuko da. “Lamia” eta “A Contracorriente Films” ekoitzi dute.

UNA VIDA NO TAN SIMPLE

“Horretarako prestatuegi sentitu gabe guraso bihurtu diren eta bizitza profesionala eta bizitza haurrekin uztartzea eskatzen duten etxeko hondamendi txikietan murgiltzen diren pertsonak” dira filmaren argumentua. “Ezin dute ahots hori isildu esaten dienean, dauden lekuan daudela, funtsean dena gaizki egiten ari direla”, dio Felix Viscarretek, gidoia umorez ere idatzi duenak.

“Gau batean sentitu nuen guraso batzuen irudia lotan zeuden seme-alabak garraiatzen, hiriko oinezkoen pasabideak gurutzatzen, ordu horietan hutsik, edozein borroka pertsonal justifikatzeko gai zen irudi indartsu eta hunkigarria izan zitekeela”, gehitu du Viscarretek.

 

• “Mendian Gora” erakusketak euskal mendizaletasunaren historian bizitako mugarri nagusiak dakarzkigu gogora; berariaz prestatutako hogei azalpen-panelek eta balio sinboliko handiko materialek osatzen dute erakusketa, eta Bilboko Alde Zaharreko saltokietako erakusleihoetan egongo da ikusgai 2022ko urtarrilaren 16ra arte.

Gaurko egunean inauguratu da “Mendian Gora” erakusketa, euskal mendizaletasunaren historian bizitako mugarri nagusiak gogora ekartzen dituena eta Bilboko Alde Zaharreko saltokietako erakusleihoetan ikusgai egongo dena. 2022ko urtarrilaren 16ra arte ikusgai egongo den erakusketak Alde Zaharreko kaleak eta bizitza komertziala dinamizatzea izango du helburu, aire zabaleko erakusketa honekin bisitariak erakarri nahi baitira auzora.

“Mendian Gora” erakusketak euskal mendizaletasunaren historian bizitako mugarri nagusiak dakarzkigu gogora. Erakusketa hori berariaz prestatutako hogei azalpen-panelek eta balio sinboliko handiko materialek osatzen dute, mendizale garrantzitsuek edo haien senideek utzitakoak. Erakusketa honen ezaugarri nagusia da benetako material originalak ikusteko aukera egongo dela kasu guztietan. Hala, askotariko materialak jarriko dira ikusgai: 1924an egindako lehenengo eskaladan (Fraideburu) erabilitako iltzea; 1980an Martin Zabaletak Everest mendiaren gailurrean egindako argazkian ageri den ikurrina, edo gaur egun Pou anaiek munduan zehar egiten dituzten eskaladetan erabiltzen duten materiala. Garai guztietako arroparekin jantzitako mendizaleak ikusteko aukera ere izango dugu.

Proiektu honek, gainera, euskal mendizaletasunaren mugarrien ordena kronologikoan antolatutako zirkuitu bat izango du. Erakusleiho bakoitzak aurreko eta ondorengo erakusleihoak non dauden adierazten duten geziak izango ditu, baita erakusgai dauden objektuei buruzko informazioa jasotzen duten QR kodeak ere. Honako erakusleiho hauetan egongo da erakusketa ikusgai: Somera 17, Artekale 18, Belostikale 6, Belostikale 7, Loteria 3, Viktor 4 eta Gurutze11.

“BIZKAITARRAK GOIKO MUGETAN” ERAKUSKETA PARALELOA

Erakusketa honekin batera, “BIZKAITARRAK GOIKO MUGETAN / VIZCAÍNOS EN LAS ALTURAS” izeneko erakusketa egingo da Pangea The Travel Store bidaia-agentzian, Indautxu plazan. Hamalau panel izango ditu, eta horien bidez Bizkaiko mendizaletasunaren memoriak errepasatuko dira, Bilboko Kirol Elkarteak bultzatutako hastapenetatik hasi eta gaur egungo erreferenteetara arte.  Horrez gain, bi hitzaldi eskainiko dira Pangeako auditoriumean: “La saga de los Régil” (Regildarren saga) abenduaren 7an eta “La expedición al Tirich Mir en 1976” (Tirich Mir mendirako espedizioa 1976an), abenduaren 8an.

Ekimena EMMOA Euskal Mendizaletasunaren Museoa Fundazioak antolatu du, Bilboko Udalaren eta Juan Celaya Letamendia Fundazioaren babesarekin, eta BBK Mendi Film Bilbao-Bizkaia Jaialdiarekin, Fotoprixekin, Alde Zaharreko Merkatarien Elkartearekin eta Pangea The Travel Store Bidaia Agentziarekin lankidetzan.

• Azaroaren 18tik 25era bitartean, berrogeita hamar jarduera baino gehiago egin dira, hala nola erakusketak, hitzaldiak, topaketak, bisitak, jaialdiak eta hitzaldiak. Edizio berri honetan formatu presentziala berreskuratu da eta diseinuaren eta sormenaren bidez bizitzeko modu berriak jorratu dira, baita errealitate berrietarako bidean den mundua izatearen ideia ere.

• Bilbao Bizkaia Design Week Bilboko Udalaren eta Bizkaiko Foru Aldundiaren ekimen bat da eta enpresa pribatuekin, unibertsitateekin, klusterrekin eta elkargo profesionalekin lankidetzan antolatzen da. Ekimen horren bitartez, sormen-industriak sustatu nahi dituzte, hiriaren eta lurraldearen ekonomia garatzeko eta nazioartean proiektatzeko faktore gisa.

• Sormen-sektoreak nazioarteko proiekzio- eta hazkunde-potentzial handia dauka; Bilbon eta Bizkaian sektore horretako 5.900 enpresa baino gehiago daude, eta guztira 20.000 pertsonari ematen diete lana.

Bilbao Bizkaia Design Week 2021 (BBDW) diseinuaren asteari amaiera eman diote gaur goizean, eta itxiera ekitaldian izan dira Javier Garcinuño, Bilbao Ekintzako zuzendari nagusia, eta Olatz Goitia, BEAZeko zuzendari nagusia. Jardunaldi horren bidez amaiera eman zaio aurrez aurreko formatua berreskuratu duen programari.

“Bidegurutzeak eta trantsizioak” izenburupean, jarduerez betetako aste honetan errealitate berrietarako trantsizioaren inguruko hausnarketa sustatu da, bizi dugun testuinguru aldakorrari lotutakoa, non aldaketa klimatikoak, osasun-, ekonomia- eta gizarte-krisiak, biztanleriaren zahartzeak, aurrerapen teknologikoek eta eraldaketa digitalak beharrezko egiten duten erronka horiei modu sortzaileagoan eta eraginkorragoan helduko dieten lanbide-diziplinak gurutzatzea eta hibridatzea.

Testuinguru horretan, 61 jarduera egin dira, 176 hizlari eta 6.700 parte hartzaile egon dira eta Interneteko oihartzunari dagokionez, 325.000 interakzio izan dira sare sozialetan, 27.800 sarrera webgunean eta 1.600 aipamen baino gehiago #BBDW21 traolarekin.

Edizio honetan, gainera, Kaunaseko (Lituania) ordezkariek ere parte hartu dute, Bilbao Bizkaia Design Week 2021eko hiri gonbidatua izan baita, 2022ko Europako Kultur Hiriburu gisa, eta, salbuespen gisa, UNESCOren hiri sortzaileetako kideek ere parte hartu dute, Bilbon III. Estatu Topaketa egin baita:, Burgos, Denia, Lliria, Sevilla, Granada, Tarrasa eta Valladolid.

Bilboko Udalak eta Bizkaiko Foru Aldundiak bi helburu nagusi betetzeko antolatu dute Bilbao Bizkaia Design Week (BBDW) ekitaldia: alde batetik, diseinua sustatzea jarduera ekonomikoa nahiz enplegu kualifikatua sortzeko gaitasuna daukan sektore gisa, eta, bestetik, lurraldeko sormen-industriek daukaten balioa agerraraztea. Guztira, 5.943 enpresa inguru dira eta 20.260 profesionali ematen diete lana Bilbon nahiz Bizkaian. Azken hamarkadan etengabe hazi den sektorea da. Sektore honetako enpresen hazkundea azken urtean %0,1ekoa izan da, eta esparru honetan enplegua %1,3 hazi da. Sormen-sektoreko enpresak Bizkaiko enpresa guztien %6,5 dira, eta lurraldeko enpleguaren %4,4 hartzen dute.

Erakundeen arteko proiektu bat da Bilbao Bizkaia Design Week (BBDW), eta hirian zein lurraldean errotuta dago; bidenabar, diseinu eta sormen-industrietako 300 enpresa eta profesional baino gehiagok hartzen dute parte. Ekimen honek, gainera, unibertsitateen eta diseinuko goi-mailako prestakuntza-eskolen laguntza du: Mondragon Unibertsitatea, UPV/EHU, Nafarroako Unibertsitatea, Deustuko Unibertsitatea, IED Kunsthal, IDarte eta Digipen.

KONPROMISOA SEKTOREAREKIN

Lankidetza publiko-pribatuak programatutako ekimenen antolakuntza eta aniztasuna ahalbidetzen ditu. Bilbok eta Bizkaiak bat egiten dute apustu estrategikoan, etorkizunera eta sormen industrietatik eratorritako negozio aukeretara lotutakoa; erronka nagusia enpresa sare indartsu eta lehiakorra garatzea sustatzea da.

Bilbao Bizkaia Design Week egitasmoak konpromiso hori irudikatzen du; ekimenean, gainera, 46 erakunde zein enpresa pribatu, unibertsitate, elkarte nahiz kluster eta elkargo profesional baino gehiago egongo dira, proposamen propioak plazaratuz edo jarduera bateratuak babestuz.

Bilboko Udalak eta Bizkaiko Foru Aldundiak bultzatutako Bilbao Bizkaia Design Council (BiDC) izeneko ekimenak funtsezko egitekoa du diseinuaren ekosistema guztiaren inplikazioan, eta munduko hirurogei hiri baino gehiagotan urtero egiten den Diseinuaren Astearen arrakastaren eragile nagusia da.

• 2021eko edizioak eragin soziala izango duten 300 ekitaldi kultural baino gehiago izango ditu, batez ere Bilbon eta Bizkaian, Eskozian, Lisboan, Huelvan eta lehen aldiz Errioxan.

• Ostiral gauean inaugurazio ekitaldia egingo da, 1.500 artista ingururen partaidetzarekin, Europa mailan kultur ekitaldi parte-hartzailerik garrantzitsuenetako bat izango da.

• Hainbat hiri Bilboko ereduarekiko interesa pizten ari dira 2022rako, pandemiaren eragin sozialek eta bizimoduei eta portaera sozialari buruzko hausnarketa globalaren beharrak bultzatuta.

Fair Saturday, eragin soziala duen mugimendu kulturala, azaroaren 27an, larunbatean, egingo da berriro, Black Friday egunaren ostean. Pandemiak eragindako iazko online ospakizun osoaren ondoren, azaroko azken asteburuan gizartean eragina duten 300 kultur ekitaldi inguru izango dira Bilbon eta Bizkaian, baita nazioarteko beste hiri batzuetan ere.

Aurten ere, Bilbotar ideia hori Black Friday kontsumistaren kontrapuntu kulturala izango da. Fair Saturday fundazioak pentsatzen du “zentzugabeko deriba kontsumistaren eta materialistaren aurkako antidoto eraginkorrenetako bat kultura da, hain zuzen ere; hezkuntzari eta kulturari zenbat eta balio eta espazio handiagoa eman, orduan eta gaitasun handiagoa izango dugu portaerak eta oro har, bizimodu arduratsuagoak eta iraunkorragoak aukeratzeko”.

Horregatik, 2014tik, fundazioa kulturaren eta enpatia sozialaren inguruan egun bat sortzeko lanean ari da. Dinamika sinplea da: jaialdi parte-hartzaile honekin bat egiten duten kultura-erakunde guztiek beren ekitaldiaren bidez beren lana aintzatesteko kausa sozial bat aukeratzen dute, beren mezua proiektatzen lagunduz eta sortutako funtsetatik – badaude – eurek erabakitzen duten zatia bideratuz. Fundazioak azpimarratzen du “kulturak balioa sortzen du eta balio hori gizarteak aitortu behar du sarreren edo dohainen bidez; ondoren, artista eta erakunde bakoitzak bere zati bat gizarte-helburuetarako erabiliko du”.

Zehazki, Bilbon eta Bizkaian, programak 100 ekitaldi baino gehiago izango ditu, hainbat lekutan banatuta. Edizio honetan kontzertu, erakustaldi, antzezlan, performance eta poesiaz gozatu ahal izango da berriro, aldi berean proiektu sozial ezberdinak ezagutu eta laguntzeko aukera izanik.

Aurten berrikuntza batzuk izango dira, esate baterako, “Metro Akustikoa”ren lehen edizioa, non artista ezberdinek kontzertu akustiko txikiak eskainiko dituzten Metro Bilbaoko geltokietan; edo hitzaldi inspiratzaileak ETS edo Mäbu bezalako artista ezagunen eskutik, non gazteekin partekatuko dituzten beren esperientzia pertsonalen bidez mundu artistikoari buruzko gogoetak; edo koral tradizionalak beren komunitateetan kontzertuak interpretatzen.

Nahiz eta nazioartean, pandemiak eragindako zailtasunaz, Fair Saturday ospatuko da ofizialki Huelvan, Lisboan eta Eskozia osoan, St. Andrew ‘s, 2018tik gertatzen ari den bezala. Eta lehen aldiz, autonomia erkidego bat gehituko da, Errioxa kasua, non 30 ekitaldi inguru izango diren, batez ere Logroñon. Nazioartean dagoen ezegonkortasunak eta toki batzuetan dauden zenbait neurri murriztaileek, zenbait hiri parte-hartzailek Fair Saturday 2022ra arte atzeratzea eragin dute.

Etorkizunean, Fair Saturday mugimenduak nazioartean hazten jarraitu nahi du urratsez urrats. Azken hilabeteetan, pandemiaren ondorioek, gure bizimodu eta kontsumoari buruzko hausnarketa globalaren beharrak eta zubiak eraikitzeko beharrak eraginda, hainbat hirik interesa agertu dute bilbotar kontzeptuaren inguruan eta elkarrizketak irekita daude horietako batzuekin. Aldi berean, Bilbo eta Bizkaia osoarekiko konpromisoak hazten jarraituko du urtez urte, kulturaren eta gizarte-proiektuen inguruan egun desberdin bat sortzeko asmoarekin, proiektuarekin bat egin nahi duten beste lurralde batzuekin zubiak eraikiz.

Ekitaldien programazio osoa azaroaren 27an, larunbata, izango da eskuragarri festival.fairsaturday.org webgunean.

“FAIR SATURDAY 2021 INAUGURAZIO EKITALDIA” BUELTAN DA

Halaber, pandemiak 2021ean eragindako hutsunearen ondoren, azaroaren 26an, ostirala, 20:00etan, “Fair Saturday inaugurazio ekitaldia” egingo da Bilbao Arenan. Fair Saturday 2021 inaugurazio ekitaldiak banderakada emango die hurrengo egunean izango diren ekitaldi guztiei. Aurreko edizioetan bezala, Royal Albert Hall- última noche de los proms-en inspiratutako lehen mailako ekoizpen musikal eta ikus-entzunezkoa izango da, musikaren inguruko ospakizun kolektiboa, kulturatik abiatutako topagune bat, Bilboko eta Bizkaia osoko dozenaka erakunde eta ehunka artista bilduko dituen hitzordu bat.

Fair Saturday inaugurazio-ekitaldiaren berezitasun handienetako bat izaera parte-hartzailea eta komunitarioa da. Artista mosaiko handi batek gorputz eszeniko zirraragarria osatuko du Bilboko Orkestra Sinfonikoaren inguruan. Zehazki, 5 agertokiko abesbatza nagusik, Bizkaia osoko 20 abesbatzak, 7 haur-abesbatzak, 4 dantza-taldek, 2 gazte-orkestrak, 5 ikastetxek, bakarlariek eta Mäbu, Idoia edo En Tol Sarmiento artista gonbidatuek osatuko dute. Guztira 1.500 pertsona inguru arituko dira eszenatokian, estilo desberdinetako musika-kantu nabarmenak interpretatzen, modu berezi eta benetan berezian.

Ildo horretan, beharrezkoa da pandemia-garai honetan gogoeta egitea emozioak modu kolektiboan sortu eta partekatzearen garrantziaz, gizarte osasuntsu bat mantentzeko eta horrez gain, osasun aldetik babesteko eta beharrezkoak diren prebentzio-neurri handienak betetzeko. Zalantzarik gabe, oinarrizko kultura-elkarteen ehuna funtsezkoa da animoak berreskuratzeko eta gizarte-harremanak eta beren komunitateen integrazioa sustatzeko. Hori guztiagatik, Fair Saturday inaugurazio-ekitaldiak bere lana nabarmendu nahi du, hazkundeari ekarpena egin eta musikaren bidez topagune izan.

Inaugurazio ekitaldia antolatzeko, Fair Saturday fundazioak urtebeteko lana egin behar du, bai maila artistikoan, bai ikus-entzunezko produkzioan, bai logistikoan. Europako kultura-ekitaldi parte-hartzailerik handienetako eta konplexuenetako bat da. Ekitaldiak 50.000 € inguruko caché sortuko ditu parte hartzen duten kultura-erakunde guztientzat. Gainera, beste urte batzuetan bezala, bertaratuen % 10 kalteberatasun sozialeko egoeran izango da. Eta superabita egonez gero, Barreras Invisibles programari eskainiko zaio; hau da, baztertuta geratzeko arriskuan dauden haurrentzako kultura-mezenasgoaren programari, Bilboko fundazioak sustatua.

2018an sortu zenetik, eta bi ediziotan soilik, Fair Saturday inaugurazio ekitaldia hazi egin da, musikaren inguruko ekitaldi berezi eta topagune gisa kokatuz. Aurtengo inaugurazio ekitaldian Bilboko hainbat tokitako eta Bizkaiko 20 herri baino gehiagotako hainbat erakunde izango dira eszenatokian. lait motiv bezala, emozio positiboak partekatuko dira musikaren bidez etengabeko sorpresekin ikuskizunaren bi ordu baino gehiagoko iraupenean zehar.

Fair Saturday 2021 inaugurazio ekitaldia 20:00etan hasiko da Bilbao Arenan eta 22:30ak arte iraungo du. Sarrerak salgai daude www.eventoinaugural.org webgunean.

• 2021eko CGLUren Munduko Kontseilua azaroaren 16tik 18ra bitartean egingo da Bartzelonan, Smart City Expo World Congress-en barruan, “Hiri eta lurralde adimendunak, agenda komunaren zutabeak” izenburupean.

• Bilboko Udalaren ordezkaria Xabier Ochandiano izango da, Ekonomi Garapen, Merkataritza eta Enpleguko zinegotzia, eta CGLUren Munduko Kontseiluaren eztabaida politikoan eta estatutuen bilkuran parte hartuko du. Bertan, Bilboko Udalak gidatutako Smart Cities Study edizio berriaren argitalpenaren berri emango du ofizialki.

• Gainera, Herritarren Arretako eta Partaidetzako eta Nazioarteko Gaietako zinegotzi Oihane Agirregoitiak parte hartuko du CGLUk antolatutako gai honi buruzko elkarrizketa politikoan: “Hiri eta lurralde adimendunak, agenda komunaren zutabeak”.

Gaur hasita eta datorren azaroaren 18ra arte, CGLUren (Hiri eta Tokiko Gobernu Batuak) Munduko Kontseilua egingo da, eta Bilbok era aktiboan parte hartuko du. Edizio hau Bartzelonako Smart City Expo World Congress-en barruan egingo da, “Hiri eta lurralde adimendunak, agenda komunaren zutabeak” izenburupean.

Bilboko Udalaren ordezkaria Ekonomi Garapen, Merkataritza eta Enpleguko zinegotzi Xabier Ochandiano izango da azaroaren 17an. Hark, ofizialki, CGLUren Munduko Kontseiluko kideei emango die Smart Cities Study 2021en laugarren edizioaren argitalpenaren berri. CGLUren Hiri Digitalen Praktika Komunitateak egin du, Bilbo Hiriaren gidaritzapean.

Smart City Expo World Congressekin lankidetzan CGLU erakundeak antolatutako jardueren barruan, Herritarren Arretako eta Partaidetzako eta Nazioarteko Gaietako zinegotzi Oihane Agirregoitiak parte hartuko du “Hiri eta lurralde adimendunak, agenda komunaren zutabeak” eztabaida politikoan. Eztabaida horretan, hiri-garaian hiri eta lurralde adimendunak garatzeak zer esan nahi duen aztertuko da; horretarako, hiri- eta landa-eremuaren arteko aldea murrizteko beharretik abiatu behar da, teknologia gure herriei mesede egingo dien baliabide baten modura eratuko da, eta horrek Agenda Komuneko erronken pare egoteko aukera emango digu.

SMART CITIES STUDY 2021

Bilboko Udalak gidatu du Smart Cities Study 2021aren laugarren edizioa, eta CGLUren Munduko Kontseilu honetan aurkeztu da. Azterlan honen helburua da hirien pandemiaren aurreko egoeraren berri izatea, digitalizazio-maila eta zituen “Smart” erako baliabideak eta tresnak identifikatuz. Pandemiak tokiko gobernantzaren eremu guztietan izan zuen eragina aztertzen da, bai eta sortu ziren ondorio negatiboei aurre zer “Smart” neurri edo tresna berri erabili ziren ere.

Azkenik, honako hau ere aztertzen da: era honetako jarduketek zenbat balio izan duten hirien erresilientzia areagotzeko, eta etorkizuneko krisiei aurre egiteko neurri eta tresna berrien erabilgarritasunari buruzko balorazioa egiteko. Azterlan honetan parte hartu dute 20 herrialdetako 35 hirik.

Informazio gehiago: http://www.uclg-digitalcities.org/smart-cities-study/edicion-2021/

LOCAL4 ACTION HUB BILBAO: BALIOEN HIRIA, HIRIAK GIDATUTAKO EKIMENA

Bilboko Udalak gidatzen du “Local4Action Hub Bilbao: Balioen Hiria” ekimena, eta haren helburua da balioetan oinarritutako gobernantza-sistema bat sortzea, hiriaren eta bertako herritarren balioen ezagutza sistemikoaren bidez, balio partekatuak kontsultatuz eta kapitalizatuz. Mundu-mailako programekiko loturak indartzeko lana da, 17 baliotan oinarritzen da, eta garapen jasangarriko 17 helburu adierazten dituzte.

Hub hau Bilbok gidatzen du eta munduko beste hiri batzuek ere parte hartzen dute: Valongo (Portugal), Toulouse (Frantzia), Caracas (Venezuela), Glasgow (Eskozia), Lille (Frantzia), Montevideo (Uruguai), Liv (Ukraina), Lusaka (Zambia) eta ICLD (Swedish International Centre of Local Democracy).

“Local4Action HUB” CGLUren ekimen nagusia da, kideen praktika eta esperientzien artean garapen jasangarriari buruzko estrategia sendotzeko. Beste aukera bat ematen du esperientzia baliotsuak konektatzeko eta toki-mailan garatzen diren irtenbideen zabalkunde handiagorako bidea irekitzeko.

Urriaren 19an, Hub-aren lehen lan-saioa izan zen, Balioen Hiria izan zuen ardatz, eta galdera hauen gainean aritu ziren: Balioen Hiria, “zer da?”, “zergatik?” eta “zertarako?”, eta Balioen Hiriaren Manifestuaren oinarria lantzeko baterako gogoeta batekin amaituko da.

Informazio gehiago: https://local4actionhubs.uclg.org/

BILBO, CGLU-N

Bilbo CGLUko kide aktiboa da 2004an sortu zenetik, eta 2013an sartu zen haren Munduko Kontseiluan. Gaur egun, Bilboko alkateak hainbat kargu ditu erakundean:

• CGLUren Munduko Kontseiluko kide da.
• Kontseilari Politikoaren kargua du “Guztiontzako aukerak, Kultura eta Hirien Diplomazia” izeneko kontseilu politikoan
• Kultura Batzordeko presidenteordea da.

Gainera, Bilbo “Hiri Digitalen” Praktika Komunitatearen buru da, Smart Cities Study 2021eko laugarren edizioa prestatu du, eta Local4Action Hub Bilbao Cities of Values ekimenaren bidez, mundu osoan balioen gaineko hausnarketa eta ekintza sustatzea bilatzen du, Bilboko inspirazio-jardueratik abiatuta.

• Bilboko Udalak, Invest in Bilbao atzerriko inbertsio-bulegoaren bidez, Bilbao Business Explorer abiarazi du, atzerriko inbertsioa eta enpresak erakartzea sustatzeko tresna.

• Tresna berria garapen ekonomikoaren arloko online soluzioetan munduko liderra den GIS Planning-ek garatu du, eta atzerriko enpresei eta agente inbertitzaileei erabakiak erraz eta azkar hartzen laguntzen die.

• Zorrotzaurreko uhartea da jada hiriaren inbertsio-gune berria, konexio onei eta enpresak instalatzeko dituen eremu zabalei esker.

Invest in Bilbao, Bilboko Udalaren atzerriko inbertsiorako tokiko bulegoak, Bilbao Business Explorer abiarazi berri du, atzerriko inbertsioa eta enpresak erakartzea sustatzeko tresna.

Aplikazio hori garapen ekonomikoaren arloko online soluzioetan munduko liderra den GIS Planning-ek garatu du. Tresna horrek, klik batean, atzerriko inbertitzaileentzat funtsezkoak diren era guztietako datuak eskaintzen ditu (datu demografikoak, ekonomikoak, enpresa-jarduerari buruzko datuak…).

Bilbo da zerbitzu hori abian jarri duen estatuko lehen hiria, hirian eta inguruetan negozioa garatzeko interesa duten inbertsiogileek erabakiak hartzea errazten duen zerbitzua alegia.

Zerbitzu berri honekin,Invest in Bilbaok abangoardian jarri du Bilboko hiria inbertsio-erakarpenaren esparruan. Era berean, zerbitzu honek Hiribilduaren hiri eta ekonomia eraldaketarako bidea zabaltzen du, azken teknologiari esker eta unean uneko datu eguneratuen eskaintza handiagoari esker.

Horrezaz gainera, Bilbao Business Explorer tresnak atzerriko enpresa eta inbertitzaileei lagundu diezaieke ondo taxuturik dauden erabakiak hartzen eta negozio-aukerak erraz eta azkar aurkitzen; horrela, enpresa horiek denbora eta dirua aurreztu dezakete merkatu-ikerketaren alorrean, eta ingurumenarekiko errespetu handiagoa izan dezakete, orain arte horrelako azterlanak egiteko ezinbestekoak ziren joan-etorriak saihesten baitira.

GIS Planning online GIS datu-softwarearen industriako hornitzaile liderra da inbertsioak erakartzeko. FT Specialist Group-en parte da eta The Financial Times-en zerbitzu bat da; industriaren arloko liderrei eta garapen ekonomikoaren alorreko agentziei nazioarteko inbertsio-fluxuei buruzko informazioa eta analisia ematen espezializaturik dago.

NOLA AURKITU EGUN BAKAR BATEAN ENPRESA BATENTZAKO KOKAGUNERIK ONENA BILBON

Bilbao Business Explorer tresnak, edozein negozio edo partikularrentzako eskuragarri dagoenak, milaka tokiren datuak aztertzen ditu modu zehatz eta eguneratuan, eta horrek Bilboko hiriaren irudi argia izatea ahalbidetzen du. Era berean, interfaze interaktiboa eta infografia errazak eta bistaratzerakoan erakargarriak diren irudiak ditu, eremu bakoitzaren ikuspegi orokorra errazten dutenak; horrezaz gainera, interfazea “rmobile friendly”’ da eta, hainbestez, edozein gailutatik bisitatu eta erabil daiteke.

Erabiltzaile bakoitzak mapa-geruzei buruzko datuak ikus ditzake, eskuratu nahi den informazioaren arabera, eta sailkatu, partekatu eta deskargatu daitezkeen tresna interaktiboak, koadroak, grafikoak, infografiak eta txostenak erabil ditzake. Horri esker, enpresa baten kokagunerik onena, eremu jakin baten garapen-potentziala edo ezaugarri demografikoak hautatzeko datuak erdiets daitezke.

Azken batean, hiriaren aukeren eta Bilbok era guztietako sektoreetako inbertitzaileentzat eskaintzen dituen aukeren irudi zehatza eraikitzen laguntzen du. Horrezaz gainera, gida osorik deskargatzeko aukera ere ematen du, Bilbori buruzko informazio guztia biltzen duena.

GIS Planning tresna The Financial Times Ltd.en atal bat den fDi Intelligence-k garatu duen tresna bat da. fDi Intelligence industriaren arloko liderrei eta garapen ekonomikoaren alorreko agentziei nazioarteko inbertsio-fluxuei buruzko informazioa eta analisia ematen espezializaturik dago.

ZORROTZAURRE, HIRIKO INBERTSIO-GUNE BERRIA

Zorrotzaurreko hiri-uhartea inbertsioak egiteko aukerarik handienak ematen dituen eremuetako bat da, Bilbon abian jarri den hiri-berroneratzeko azken proiektu handia baita. Gune hori ondo konektatuta dago hiriko gainerako tokiekin, eta eremu zabalak ditu, jarduera ez-kutsatzaileak egiten dituzten enpresak instalatzeko; gune ezin hobea da, batez ere, jarduera digitaletarako, hala nola bioteknologiarako, teknologia aurreraturako, sormen-industrietarako eta berrikuntza-industrietarako edota zerbitzu aurreratuetarako; horrezaz gainera, eremu horretan arreta jarri nahi da laneratzeko zailtasun handiagoak dituzten kolektiboei enplegua emate aldera.

Bilboko Udalaren helburua hiriko gune hori ezagutza berriak eta azken teknologiak oinarri hartzen dituen berrikuntza arloan erreferente bilakatzea da.

Horretarako, Zorrotzaurreko uharteak bi berrikuntza-parke izango ditu, prozesu berritzaileetarako 19 eraikinekin: Ipar Punta Hiriko Parke Teknologikoa, 34.000 m2-ko eraikigarritasuna duten bost lurzatirekin hirugarren sektoreko eta merkataritzako erabilerarako, eta Hego Punta Hiriko Parke Teknologikoa, 81.000 m2 inguruko eraikigarritasuna duten beste bost lurzatirekin, hirugarren sektoreko eta merkataritzako erabilerarako.

• Gabonetako jarduera esperoenak jartzen hasi da egunotan Bilboko Udala: azaroaren 24an piztuko diren argiak, izotz ekologikoko pista eta txirrista, Gabonetako azoka eta haurrentzako jardueraz betetako haurren karpa.

Bilbo egunotan hasi da Gabonetako argiztapena eta jarduera esperoenak instalatzen.

Hala, hiribilduak azaroaren 24an piztuko ditu Gabonetako argiak, eta pandemiaren ondorioz urtebetez itxaron ondoren, aurreko urteetako esperientzia arrakastatsua berreskuratuko du: izotz ekologikoko pista eta txirristak, Gabonetako azoka, merkataritza-eskaintza zabala eta haurrentzako karpa, haiei zuzendutako programazioarekin.

Hala, aurten ere, izotz ekologikoaren gaineko patinaje-pistak 800 metro karratu izango ditu (modalitate horretako Estatuko handienetako bat da), eta instalazioaren erdia estalita egongo da, eguraldi txarra egiten duenerako. Pista, ohi bezala, Areatzako kaian kokatuko da. Txirrista handia, berriz, Erripako kaian jarriko da eta sei errei izango ditu irristatzeko.

Bi jarduerak azaroaren 25etik aurrera egongo dira martxan, prezio ezberdinekin. Izotz-pistaren kasuan, 30 minutuko irristaketaren prezioa (patinak barne) 3 eurokoa izango da, eta 2 eurokoa familia ugarientzat; txirrista, berriz, 2 eurokoa izango da pertsonako, eta erreietatik hiru aldiz jaisteko aukera egongo da.

• SARRERAK leihatiletan nahiz online ESKURATU ahalko dira, webgune honetan: www.bilbaopistadehielo.com. Talde-erreserbak (20 pertsona baino gehiago) egiteko, mezu elektroniko bat bidali behar da honako helbide honetara: reservasgabonak@proasur.com edo bezeroaren arretarako telefonora deitu (610 124 552).
• Hauxe izango da bi instalazioen ORDUTEGIA: 11:00etatik 14:00etara eta 16:30etik 20:30era, eta asteburu, jaiegun eta eskolarik gabeko egunetan ordutegia luzatuko da 16:00etatik 21:00etara. Maskara une oro erabili beharko da derrigorrean.

Bi azpiegiturak Xtraice nazioarteko enpresak diseinatu ditu, izotz ekologikoaren fabrikazioan eta banaketan aitzindaria denak. Material berritzaileak, abangoardistak eta jasangarriagoak dira, eta ur-pista izoztu baten patinaje-sentsazioa imitatzen dute. Produktu horrek ingurumena errespetatzen du eta % 100 birziklagarria da. Apustu honekin Bilboko Udalak ur eta elektrizitate asko aurreztea lortuko du eta atmosferara CO2 tonak emititzea saihestuko da.

#BILBAOGABONAK PROIEKTUA

Jarduera horiek guztiak #BilbaoGabonak proiektuaren parte dira. Proiektu horrek Gabonetan garatuko diren eta datozen egunetan iragarriko diren jardueren programa zabala barne hartzen du. #BilbaoGabonak proiektuaren bidez hiribildua erakargune garrantzitsu bihurtzeko eta Gabonetan ere aisialdirako eta kulturarako erreferentzia izateko helburua indartu nahi da.

• Globernance Gobernantza Demokratikoaren Institutua Bilboko Udalarekin lankidetzan aritu da ekitaldia antolatzeko, zeina azaroaren 11n, 18an eta 25ean egingo baita. Ekimen honen helburua da Europako trantsizio digitalaren erronka nagusiak aztertzea
• Lehenengo saioan, ostegun honetan, azaroak 11, Oihane Agirregoitiak, Herritarren Arreta eta Partaidetza eta Nazioarteko gaien zinegotzia, hartuko du parte, Manuela Battaglini pribatutasunean eta datuen etikan espezializatutako abokatu eta ikertzaile independentea eta Daniel Innerarity Filosofia Politikoko katedradunak, Ikerbasque-ko ikertzaileak eta Florentziako Europako Institutuko irakaslearekin batera.

Datorren ostegunean, azaroaren 11n, Bilbao European Encounters delakoaren zortzigarren edizioa abiaraziko da Bilbon (AURREZ AURREKO formatuan), hau da, Globernance Gobernantza Demokratikoaren Institutuak Bilboko Udalaren lankidetzarekin antolatzen duen hitzaldien ziklo bat. Saio honetan Oihane Agirregoitiak, Herritarren Arreta eta Partaidetza eta Nazioarteko gaien zinegotzia, parte hartuko du ekitaldiaren hasieran.

Edizio honetako jardunaldien helburua da azaroaren 11n, 18an eta 25ean, arratsaldeko 19:00etatik 20:30era, herritarrei helaraztea trantsizio digitalaren erronka nagusien analisia, eta, hain zuzen ere, nazioarteko adituen ikuspegiaren bitartez egin nahi da hori.

lldo horretatik, nazioarteko aditu ugari izango dira gurean, hala nola Manuela Battaglini, datuen etikan eta pribatutasunean espezializatutako abokatu eta ikerlari independentea; Annette Zimmermann, Yorkeko Unibertsitateko politikari filosofoa, ikasketa automatikoaren eta adimen artifizialaren etikan aditua dena; Miguel Poiares Maduro, akademiko eta politikari portugaldarra, Portugalgo Eskualde Garapeneko ministro eta Florentziako Unibertsitate Institutuko Gobernantza Transnazionaleko Eskolako zuzendari izandakoa, eta Helga Nowotny, Zientziaren Gizarte Ikasketetako irakasle emeritua (ETH Zurich), zientzia eta teknologiako gizarte-ikasketetan aditua eta European Research Councileko (ERC) zuzendari izandakoa.

Horrez gain, elkarrizketetan honako hauek ere parte hartuko dute: Daniel Innerarity, Filosofia Politikoko katedratikoa, Euskal Herriko Unibertsitateko «Ikerbasque» ikerlaria eta Florentziako Europar Institutuko irakaslea; José Luís Martí, Planetaren Ongizateko komisarioa eta Filosofia Juridiko eta Politikoko irakasle elkartua Pompeu Fabra Unibertsitatean, eta Sara Suarez, adimen artifizialean, big datan, demokrazian eta funtsezko eskubideetan ikerlaria.

AURREZ AURREKO INAUGURAZIO JARDUNALDIA

• Inaugurazio jardunaldia azaroaren 11n egingo da aurrez aurre. “Adimen artifizialaren europar eredua” izenburupean, Manuela Battaglinik eta Daniel Innerarityk Europaren garapenari eragiten dioten prozesuetan adimen artifiziala pixkanaka integratzeak pizten dituen eztabaidagaien inguruan arituko dira. Solasaldia moderatzeko lanak Cristina Astierrek egingo ditu, Pompeu Fabra Unibertsitateko eta Globernanceko ikertzaileak.
• Azaroaren 18ko jardunaldia online egingo da. “Berdintasun algoritmikoa” izenburua oinarri hartuta, Annette Zimmermann, José Luís Martí eta Sara
  • Suarez hizlariek euren ikerketen emaitzen berri emango digute. Ander Errasti arituko da moderatzaile-lanetan, Globernanceko ikertzailea eta Bartzelonako Unibertsitateko Politika Zientzietako Departamentuko irakasle elkartua

  EZTABAIDA FOROA

  Bilbao European Encounters topaketak 2013. urtean sortu ziren Europar Batasunaren etorkizunari buruzko eztabaida aberasteko. Horrela, tokiko, estatuko eta nazioarteko arrakasta duten akademikoak eta adituak biltzeko topagune bihurtu da Bilbo; izan ere, Europaren inguruan hausnartzeko leku bat dute, Europak aurre egiteko dituen desafioak aztertzeko eta eztabaida hori herritarrei helarazteko toki bat. Horregatik, nazioarteko kongresuaren formatu akademikoa eta adituen arteko elkarrizketak tartekatu nahi izan dira BEEren zortzigarren edizio honetan.

  Hasieratik, Bilbao European Encounters ekimenak nazioarteko ikerkuntza-panoramako dozenaka izen entzutetsu ekarri ditu Bilbora (Oxford eta Harvard unibertsitateak, Florentziako Institutu Europarra, Max Planck, London School of Economics edo Edinburgo, besteak beste) Europako integrazioaren etorkizunerako erabakigarriak diren gaiak jorratzeko (hala nola errefuxiatuak, desafekzio demokratikoa, desinformazioa, krisi ekonomikoa edo Covid-19).

  Globernance Gobernantza Demokratikoaren Institutua zentroa maila eta dimentsio guztietan gobernuaren zeregina hobetzeko ezagutzaren gainean hausnartzeko eta horixe ikertzeko zein zabaltzeko entitate bat da. Gobernantza kontzeptuaren zenbait alderdiri buruzko ikerketa jarduerak garatzea du xede, dimentsio globalean, Europakoan, estatu mailan eta toki mailan pentsamendu politikoa berritzeko. Horrez gain, sarean egiten du lan ikerketa sozial eta politikoko munduko erreferentziazko zentro ugarirekin, eta gizarte berrikuntza nahiz gobernantza demokratikoa sustatzeko enpresa eta erakundeekin kolaboratzen du.

  • Egunak: osteguna, azaroak 11 (AURREZ AURRE), osteguna, azaroak 18 (ONLINE) eta osteguna, azaroak 25 (ONLINE)
  • Ordua: 19:00etan
  • Tokia: Azkuna Zentroa – Bilboko Alhondiga (azaroaren 11n, aurrez aurreko saio bakarrean. Azaroaren 18ko eta 25eko saioak online egingo dira)
  • Aldez aurretik eman behar da izena hemen:

  https://bilbaoeuropeanencounters.org/inscripcion-2/

• Bilerak, pizgarri-bidaiak, hitzaldiak eta erakustaldiak egiteko helmuga jasangarrien indizean, nazioarteko 73 hiri sartu dira aurten; Bilbok 42. postua lortu du, eta estatuko lehen hiria da zerrendan.

• Nazioarteko sailkapena osatzen duten hiriek xede bat dute: gizartearekiko, ekonomiarekiko eta ingurumenarekiko jasangarriagoak diren lekuak erdietsi nahi dituzten baterako estrategiak sortzen lagundu.

Bilbok 42. postua lortu du Global Destination Sustainability nazioarteko sailkapenean, hau da, bilerak, pizgarri-bidaiak, hitzaldiak eta erakusketak antolatzeari buruzko sailkapenean. 2021ean nazioarteko 73 hirik egin dute bat sailkapenarekin. Halaber, Bilbok 42. postua erdietsi du, sartutako hiri berrietako laugarren herririk onena eta Estatuko lehenengoa zerrendan.

Global Destination Sustainability sailkapenean Agenda 2030eko Garapen Jasangarriekiko Helburuekin bat egiten duten hiriak baloratzen dira, 71 alderdi kontuan hartuta. Ildo horretatik, hiru oinarri aztertzen dira: hiria bera, Meetings & Events hornitzaileak eta Convention Bureau-aren politika eta praktikak. Bilbok % 60,43ko lorpen-ehunekoa lortu du.

Indize honekiko atxikipenaren bitartez, Bilboko Udalak garapen jasangarria hobetzeko eta tokiko eragileek jasangarritasunaren alorrean egiten duten lana aitortzeko dinamika bat ezarri zuen martxoan, zeinak gure hiribilduari nazioarteko ekitaldiak antolatzeko konfiantza emango dion. Tokiko eragileekin bat eginik, Bilboko Udalak handitu egin nahi du MICE (biltzarrak eta ekitaldiak) sektorean duen lehiakortasun-abantaila. Osasun-krisiaren aurretik, urtean 1.300 bilera egiten ziren hiribilduan, eta 2021eko udazkenean hiria pixkanaka ari da jarduera berreskuratzen.

GLOBAL SUSTAINABILITY DESTINATION

Nazioarteko Kongresuen eta Hitzaldien Elkarteak (IMEX Group, European Cities Marketing – ECM) eta MCI Group delakoak elkarlanean prestatutako Garapen Jasangarriko Helburuen adierazlearen barruan biltzen da helmuga jasangarrien mugimendua, zeinak sektoreko profesionalak elkarrekin lotzen dituen gizartearekiko, ekonomiarekiko eta ingurumenarekiko leku jasangarriagoak izan daitezen lortzeko estrategiak sortzeko. Besteak beste, Göteborg, Kopenhage edo Aarhus hiriak daude zerrendaren goialdean, hau da, MICE jardueran jasangarritasuna aplikatzeko orduan ibilbide luzea eta ospe handia dituzten hiriak.

• Jaialdiak gaur ekingo dio lehiaketako websailen 40 ordu proiektatzeko asteari, dela zuzenean eta dela streaming bidez; horrekin batera, hitzaldiak, mahai inguruak eta jendaurreko hizketaldiak izango dira, baita galak eta kale jarduerak ere; bestalde, sektoreko profesionalak elkarrekin harremanetan jartzeko plataforma bat egongo da.

• Lehiaketako 120 websailetan, nabarmentzekoak dira herrialde hauetako ekoizpenak: AEB, Kanada, Errusia, Australia, Alemania eta Erresuma Batua, baina, era berean, Europako beste leku batzuetako lanak ere ikusi ahalko dira, baita Hego Ameriketakoak eta Ekialde Urrunekoak ere. Ohi bezala, SERIESLANDek arreta berezia jarriko die Euskal Herriko ekoizleei eta enpresa sortzaileei Basqueguna jardunaldian.

• Jarduera guztietan doan sar daiteke, aurretik webgunez (Eventbrite) erreserba eginda, ez dadin jende pilaketarik izan eta segurtasuna errazteko.

SERIESLAND Bilboko Websailen zazpigarren jaialdia gaur arratsaldean abiatuko da Bilborocken, eta helburua da nazioartean sendotzea bere generoko lehiaketarik esanguratsuenetako bat bezala eta Interneteko ikus-entzunezkoen sorkuntzarako topagune bezala. Sei egun bizi-bizi izango dira, eta SERIESLANDek jarduera programa zabala eskainiko du; besteak beste, lehiaketako websailen 40 ordu zuzeneko proiekzioetan streaming bidez, hogei bat hitzaldi, mahai inguru, jendaurreko hizketaldi, gala eta kale jarduera, eta sektoreko harremanetarako plataforma izateko bokazioa.

Lehiaketako 120 websailetan, nabarmentzekoak dira herrialde hauetako ekoizpenak: AEB, Kanada, Errusia, Australia, Alemania eta Erresuma Batua, baina era berean, Europako beste leku batzuetako lanak ere ikusi ahalko dira, baita Hego Ameriketakoak eta Ekialde Urrunekoak ere. Berebat oso ezohikoak diren herrialdeetako lanak ere, hala nola Kazakhstan, Israel, Singapur, Vietnam eta Polinesia Frantsesa.

Ohi bezala, SERIESLANDek arreta berezia jarriko du bertako websailetan. Ez da faltako Basqueguna, programan urterokoa den ekitaldia, herrialdeko ikus-entzunezkoen industriari emana. Egun horren xedea izaten da etxeak eta eduki sortzaileak elkartzea, hau da, profesionalak, enpresak eta asmamena bateratzea.

SERIESLANDen programan datozen jendaurreko jarduera guztietara doan sar daiteke, aurretik webgunez (Eventbritez) erreserba eginda, ez dadin jende pilaketarik izan eta segurtasuna errazteko. 4.000 leku inguru daude hiru aretoak hartuta.

Dena dela, SERIESLANDen eragina ez da publiko aurreko presentzia fisikoan gelditzen, hori baino askoz gehiago da eta. Iaz, lehiaketako websailen 120.000 ikustaldi lortu zituen jaialdiak, eta bere jardueretan zuzeneko 3.000 jarraipen erregistratu zituen sakelakoaren nahiz ordenagailuaren bitartez; horrekin batera, milioi erdi inguru ikustaldi izan zituen webgunean eta sare sozialetan.

SERIESLANDek honako erakunde hauen laguntza eta babesa jaso du: Beaz foru sozietatea, Bilbao Ekintza udal sozietatea, Zineuskadi, Kultur eta Kirol Ministerioa, Eusko Jaurlaritzako Kultura eta Hizkuntza Politika Saila, EIKEN Klusterra, Laboral Kutxa, AC/E eta Ikey Group Comunicación etxea.