by

  • Garapen Ekonomiko, Merkataritza eta Enplegu Saileko zinegotzia den Xabier Ochandiano eta Herritarren Arretako eta Partaidetzako Saileko zinegotzia den Oihane Agirregoitia gaur goizean egon dira ekimenaren laugarren edizioko azken ekitaldian. Programaren bitartez, hain zuzen ere, kultura ekintzailea sustatu nahi izan dute hiriko gazteen artean.

  • Ekitaldia Zabalguneko eraikinean antolatu da, eta ikasleek taldeka lan egin dute Bilboko balioen gutuna gazteei hurbiltzeko eta ezagutzera emateko erronkarako irtenbideak diseinatzen.

  • Azken hilabeteetan “Sortzearen Abentura”ekimenaren 2020/ 2021eko edizioa Bilboko zortzi ikastetxetan garatu da ekintzailetzaren, sormenaren eta taldean lan egitearen balioa sustatzeko, beste gaitasun batzuen artean

Zabalguneko eraikinak gazteen artean kultura ekintzailea sustatzeko “Sortzearen Abentura” programaren laugarren edizioaren azken saioa hartu du gaur goizean.

Bilboko Udalak bultzatu du programa Bilbao Ekintza udal-sozietatearen bitartez. Amaiera-ekitaldi horretan bildu dira ekimenean parte hartu duten ikastetxeetako ikasleak eta Garapen Ekonomiko, Merkataritza eta Enplegu Saileko zinegotzia den Xabier Ochandiano zein Herritarren Arretako eta Partaidetzako Saileko zinegotzia den Oihane Agirregoitia.

Proiektua pandemiak ekarri digun gaur egungo egoerara egokitzeko asmoz, aurtengo edizioa aurrekoak baino digitalagoa izan da, eta online plataformak eta tresnak erabiltzeko metodologia egokitu da. Azken ekitaldi horretan, ikasleek formatu mistoak aurkeztu dituzten irtenbidea. Hori horrela, ikastetxeetako ordezkari batzuek aurrez aurre parte hartu duten arren, gainerako ikasleek streaming bitartez ikusi dute ekitaldia

EKINTZAILETZA GAZTEEN ARTEAN BULTZATZEA

“Sortzearen Abentura” ekimenaren xede nagusia espiritu ekintzailea sustatzea da, baina 14 eta 16 urte bitarteko gazteen artean esperientzia praktikoa oinarri artuta. Gazteek ekintzailetzari lotutako oinarrizko kontzeptu eta balioak barneratzea lortu nahi da, besteak beste, sormena, taldean lan egitea, arazoak konpontzea, komunikazioa, benetako inguru batean inplikatzea, garapen pertsonala eta autoezagutza, sormen-gaitasuna eta jarrera ekintzailea.

Horretarako, benetako erronka zehatzei erantzuteko irtenbideak diseinatzeko proposamena egin die ekimeneko ikasle parte-hartzaileei. Hauxe izan da aurtengo edizioko erronka: Bilboko balioen agiria gazteei hurbiltzea eta ezagutzera ematea, gutuna zabaltzen lagunduko duen eta jendea ekimenarekin bat egitera animatuko duen estrategia baten bitartez.

“Sortzearen Abentura” bi fasetan gauzatu da. Lehenengoa, hain zuzen ere, ikastetxeetan bertan landu da azken hilabeteetan , irakasleen inplikazioarekin. Haiek ere prestakuntza-prozesu bat bete behar izan dute aldez aurretik. Bigarren fasea azken fase honen bitartez gauzatu da, hau da, emandako irtenbideak aurkeztu eta irabazlea hautatu da.

ZORTZI IKASTETXEK PARTE HARTU DUTE LAUGARREN EDIZIOAN

Aurtengo ikasturtean, hiriko zortzi ikastetxe hauetan ari dira “Sortzearen Abentura” ekimenaren laugarren edizioa lantzen: La Salle, Escolapios, Harrobia Ikastola, Trueba ikastetxea, San Pedro Apostol ikastetxea, Kirikiño Ikastola, Jesús y María ikastetxea, Hijas de la Caridad / Nuestra Señora de Begoña ikastetxea.

Ekintzailetza eta berrikuntzaren gainean sentsibilizatzeko helburua duen proiektu hau eskola-orduetan gauzatu da, eta funtsean praktikoa izan da. Ekimenaren bitartez, udalak irakasle eta ikasleak beren inguruarekin inplikatzea eta tokiko enpresa, elkarte nahiz eragileekin harremanetan jartzea lortu nahi du.

by

  • Azterketa testuinguru zehatz batean egin da; izan ere, hiribildua buru-belarri ari da lanean unibertsitateari lotutako hiri bat izateko, eta gizarte berriak gehien eskatzen dituen profilak betetzeko aurrerapausoak ematen jarraitzen du, batik bat, Zorrotzaurren, dagoeneko talentuaren eta jakintzaren uharte gisa ezagutzen dena.

  • STEM lanbideei eta gaiei buruz 14 eta 16 urte arteko gazte bilbotarren artean lortutako ondorioek argi uzten dute neskek bokazio zientifiko-teknologiko txikiagoa dutela mutilekin alderatuta.

  • Diagnostikoaren emaitzak aurkeztu ondoren, Parekoen Topaketa ekimena antolatu da, non BIZILABE-BILBAO zentroko gazteek parte hartu duten. STEAM alorretako aisialdirako eta ikerketarako Euskadiko lehenengo zentroa da. Ikertzaile eta profesionalekin bildu dira ekimenean.

Bilboko Udalak eta Elhuyarek Bilboko gazteen STEAM azterketaren (zientzia, teknologia, ingeniaritza, artea eta matematika) emaitzak aurkeztu dituzte gaur. Bestalde, Bizilabe Bilbao proiektuaren Parekoen Topaketa ekimena egin da.

Bilboko Udaleko Ekonomia Garapena, Merkataritza eta Enplegua Saileko zinegotzia den Xabier Ochandianok eta Elhuyarreko Zientzia Unitateko koordinatzailea den Garazi Andonegi Beristainek aurkeztu dute txostena.

Bi erakundeek indarrak batu dituzte hiriak laster behar izango dituen premia profesionalei aurrea hartzeko. Europa da gure ispilua. Epe laburrera, gainera, zientzia eta teknologian lan egiteko prest dauden pertsona gehiago eskatuko dituen lan-merkatu bat du. Aurreikuspenen arabera, ez dira premia horiei erantzuteko profesional kualifikatu nahiko egongo.

Xabier Ochandianok hauxe nabarmendu du: «Bilbon Talentuaren eta Ezagutzaren Zorrotzaurreko uhartea eraikitzen ari garen unean, unibertsitate-hiri bat izan nahi dugun honetan, ezinbestekoa da gizarte berri honek eskatzen dizkigun profilak lortzeko pausoak ematea. Zehazki, etorkizuneko enpleguen % 80an STEM gaitasunak ezinbestekoak izango dira mundu jasangarri bat lortzeko ditugun erronkei aurre egiteko. STEM profesionalak sektore ekonomiko guztietan izango dira beharrezkoak».

Hala eta guztiz ere, gazteen gaur egungo asmo profesionalen proiekzioak ez datoz premiekin bat, eta nesken kasuan egoera bereziki larria da. Nazioarteko askotariko azterlanetan jaso da, zientziarekiko eta teknologiarekiko nolabaiteko jarrera positiboa eta interesa erakusten badute ere, gutxi batzuek baino ez dutela alor horietako graduak ikasteko erabakia hartzen. Txostenen arabera, zientzietako graduetan matrikulazioen kopurua baxua izateko arrazoietako bat herritarrek zientzia ulertzeko duten modua da. Alde batetik, ulertzeko zaila dela jotzen dute, eta, beste alde batetik, irtenbide bakarra ikerketa eta irakaskuntza direla uste dute.

Bilbon ez da egoera aldatzen. Horren jakitun, Udalak eta Elhuyarek diagnostiko hau prestatu dute 14 eta 16 urte arteko gazteek STEM gaien eta lanbideen inguruan duten pertzepzioaren berri izateko, bai eta asmoen joera aldarazteko ere, batik bat, nesken kasuan. Izan ere, argi dute bokazioak oso goiz zehazten direla eta eskolaz gain asmo horiek definitzeko orduan eragina duten beste aldagai asko ere badaudela, hala nola familia, eremu pertsonala, soziala, hezkuntza edo testuinguru ekonomikoa…

ZER GERTATZEN ARI DA BILBON?

Anbizio handiko txostena da, eta ikasleek zientzia eta teknologiagatik zein STEM lanbideengatik eta gaiengatik duten bokazioaren interesa jaso da bertan. Hain zuzen ere, hiribilduko 14 ikastetxetako DBHko 3. eta 4. mailetako 1.029 gazteren emaitzak jaso dira. Parte-hartzaileen % 47,9 neskak izan dira, % 48,4 mutilak eta % 3,7 ez binarioak.

Elhuyarreko Zientzia Unitateko Garazi Andonegi Beristain koordinatzaileak erantzunen bidez lortutako ondorio nagusiak aurkeztu ditu:

  • Betiko genero-estereotipoek eragina dute gazteek gai horretan duten interesa zehazteko orduan. Oro har, neskek interes handiagoa dute askotariko gaiengatik, eta mutilak, ordea, gai zehatz batzuetan ardazten dira, askoz gehiago egin ere. Zientziak eta teknologiak espazio mugatua dute neskei interesatzen zaizkien askotariko gai guztien artean. Mutilen interesei dagokienez, aldiz, ugarienak dira.
  • Genero-estereotipoek, halaber, eragina dute etorkizuneko lanbideak hautatzeko orduan. Neskek, batik bat, irakaskuntzarekin eta osasun-zientziekin zerikusia duten lanbideak hautatu dituzte, eta, mutilek, berriz, teknologiarekin zerikusia duten gaiak aukeratu dituzte.
  • Ikasgaiekiko interes-maila, oro har, baxua da. Neskek artearekiko eta biologiarekiko interes handiagoa erakutsi dute, eta mutilek informatikarekiko zein teknologiarekiko interesa.
  • Gazten arabera, STEM profesionalak pertsona langileak, azkarrak, buru-jantziak eta pazientzia handikoak dira eta ikusmina dute. Kalifikatzaile horietako batzuk oso ohikoak dira ikasle onak deskribatzeko orduan. Gazte askoren iritziz, lanpostu horietan lan egiteko, ikasketa-prozesu luze, zorrotz eta zail bat bete beharra dago. Ondorioz, gora egiten du beste mota batzuetako ikasketak aukeratzeko probabilitateak.
  • Etorkizunean STEM alorrean lan egiteari dagokionez, neskek eta mutilek gaitasun-maila ezberdina aitortzen diote beren buruei: mutilen % 46,9k uste du sektore horretan lan egingo duela, bai eta nesken % 29k eta ez binarioen % 26,3k ere.
  • Neskek eta mutilek oso ikuspegi ezberdina dute STEM profesionalen bizitzeko moduari dagokionez: mutilek modu altuagoan baloratzen dute (6,7) eta interes handiagoa dute etorkizunean STEM alorrean lan egiteko. Mutilen % 43,1ek eta nesken % 24,6k STEM alorrean lan egiteko interesa erakutsi dute.
  • Orokorrean, gazteen aburuz, zientzia eta teknologian ari diren emakumeen eta gizonen lan-baldintzak ezberdinak dira, baina ikuspegi positiboagoa dute Bilbori dagokionez, ezberdintasun horiek leundu baitituzte.
  • Gazteen erdiak (% 46,5), gutxi gorabehera, ez du Bilboko industriaren berri, eta ez zaie bereziki erakargarria iruditzen eskualdeko industrian lan egitea. Hala eta guztiz ere, gazte batzuek, neskak zein mutilak, alderdi positiboekin lotu dituzte eskualdeko industria eta lana.

Oro har, azterlanaren emaitzen arabera, Bilbon STEM jardueraren inguruko ezagutza baxua da, eta neskek bokazio zientifiko-tekniko txikiagoa dute mutilekin alderatuta. Galdetegiaren emaitzak ikus-entzunezko ekoizpen batean laburbildu dira: Bilboko STEAM Diagnostikoa.

IKASTETXE HAUEK PARTE HARTU DUTE azterlanean: Artxandape Ikastola, Berrio-Otxoa ikastetxea, Jesuitas-Indautxu ikastetxea, Ignacio Ellacuria-Zurbaran BHI, Kirikiño Ikastola, El Ave María ikastetxea, Eskurtze BHI, Ibaizabal BHI, San Adrian BHI, San Inazio BHI, Sagrado Corazón ikastetxea, Esclavas SC – Fátima ikastetxea, San Pedro Apóstol ikastetxea eta Deustuko Salesianos ikastetxea.

BILBOKO UDALAK ETA ELHUYARREK BAT EGIN DUTE: BIZILABE BILBAO – PAREKOEN TOPAKETA

Bilboko Udalak eta Elhuyarrek aspaldi batu zituzten indarrak. Izan ere, 2017. urtean BIZILABE BILBAO jarri zen martxan, gazteentzako STEAM arloetako ikerketarako eta aisialdirako Euskadiko lehenengo zentroa. Horrela, Bilboko gazteek zientziarekiko eta teknologiarekiko zuten interesa eta motibazioa sustatu nahi ziren, bai eta gazte-gazteei inguruko lan-jarduera erakutsi ere.

Bizilabe Bilbao zentroa Bidarte eraikinean dago, eta zientziari zein teknologiari lotutako jarduerak eskaintzen ditu (tailerrak, proiektuak, bisitak enpresetara eta abar), bai eta 10 eta 17 urte arteko gazteentzako eskolaz kanpoko jarduerak ere.

Gaur bertan, ikertzaile profesionalekin egoteko aukera izan dute Parekoen Topaketan parte hartu duten gazteek. Andonegik azaldu duenaren arabera, azterlanetan argi geratu da gazteek benetako erreferentziak behar dituztela. Horrez gain, Elhuyarren garrantzia nabarmendu du, gazteak zientziaren eta teknologiaren benetako mundura hurbiltzeko bitarteko eragile aditu gisa. Horri dagokionez, ekimenean gaur parte hartu duten ikerketako enpresa eta entitateei asko eskertzen die emandako laguntza: Joana Hevia Anbiolabekoa (Aclima Clustereko kidea), Lore Zumerta BCAMekoa, Sandra Ahedo González-Zabaleta Eusko Trenbide Sarekoa, Ainhoa Ye Xu Formula Student eta Maite García Garay Bisky Team UPV/EHUkoak, Felipe Colsa Gestionetekoa, Jaione Lanborena Ihobekoa eta Maitane Alonso Monasterio, IAMekoa, Innovating Alimentary Machines.

Parekoen Topaketan, ikasturtean zehar gazteek Bilboko enpresetako eta ikerketaren munduko STEM profesionalekin partekatu dituzte beren zientzia eta teknologiako proiektuak, eta profesionalek, aldi berean, zein proiektutan lan egiten duten erakutsi diete. Hobetu daitezkeen alderdien inguruko oharrak eta iruzkinak partekatu dituzte. Hauexek izan dira gazteek AURKEZTU DITUZTEN PROIEKTUETAKO batzuk:

  • Programazioa: kutxa gotor bat eraikitzea eta programatzea, ping-pong pilotak botatzen dituen pistola bat programatzea eta bideo-joko bat programatzea.
  • Mikrobiologia: askotariko desinfektatzaileen eraginkortasun-analisia.
  • Energia: eguzki-energia bidezko kargagailu mugikor bat eraikitzea.
  • Mikroplastikoak: hondartzan dauden mikroplastikoak zenbatzea eta ezaugarriak zehaztea.
  • Tropismoa: pizgarri batekin landareek mugitzeko duten gaitasuna aztertzea.

Irekita dago Bizilabe Bilbao 2021-2022 ikasturtean izena emateko epea

Gaur bertan ireki dute Bizilabe Bilbao 2021-2022 ikasturtean izena emateko epea. Bizilabe Bilbao zentroaren webgunean adierazi dira izen-emateari buruzko xehetasun guztiak, eta hor bertan bete behar dira datuak. Ekainaren 10ean, izena eman dutenen gazteen artean esleituko dira plazak, eta, hala ere, plazak bete gabe geratzen badira, nahi dutenek udan eman ahal izango dute izena.

Bizilabe Bilbao proiektuak Eusko Jaurlaritzaren eta Bizkaiko Foru Aldundiaren laguntza ere badu.

by

  • Udala, Bilbao Ekintza udal-sozietatearen bitartez, HIRIKO ETE, EKINTZAILE ETA SALTOKIEI LAGUNTZEKO ETA DIRULAGUNTZAK EMATEKO zerbitzu guztiak areagotzen ari da koronabirusaren pandemiak mundu osoan sortutako krisiari lehenago aurre egin ahal izateko.

  • 2020. urtean, COVID-19aren urtean, 2.700 enpresa baino gehiagok jaso zituzten laguntza eta aholkularitza, eta Bilbon 112 negozio baino gehiago sortzeko laguntza eman zen. Kopuru horiek gora egitea lortu nahi da.

  • Zerbitzuak doan eskaintzen dira, eta alor-sorta handi bat barne hartzen dituzte bi esparrutan bereizita: 1.- ETE ETA SALTOKIEI laguntza ematea, hobekuntza operatibora eta enpresa-lehiakortasuna handitzera zuzendutako programa eta baliabideekin, antolaketari lotutako laguntza estrategikoa, enpresa-berrikuntza, digitalizazioa edo nazioarteko merkatuetara sartzea. 2.- BIG Bilbao Ekintzailetza Zentroaren bitartez START-UP ETA NEGOZIO BERRIAK SORTZEKO laguntza.

  • Jarduketa-lerro berriei ere ekin zaie, besteak beste, WEBGUNE berri bat martxan jartzea (www.bilbaoekintza.eus), Ekintzailetza Zentroa Zabalguneko eraikinera aldatzea, hazteko eta ekimenak ugaritzeko asmoz, eta pandemiari aurre egiteko erakundeen arteko laguntzak ugaritzea, honako hauek gehitu dira eta: zergei, ekonomiari eta lanari buruzko kontsulta espezifikoak, osasun-protokolo berrietara egokitzeko laguntza zuzenak, negozio-lokalak alokatzeko bitartekaritza-zerbitzu berria…

 

 

Bilboko Udala, Bilbao Ekintza udal-sozietatearen bitartez, Bilbon dauden ETE ETA SALTOKIEN LEHIAKORTASUNA HANDITZEKO ETA START-UP ZEIN NEGOZIO BERRIAK SORTZEKO bideratutako zerbitzuen sorta garrantzitsua sendotzen ari da.

Doako zerbitzu integral bat da, eta start-up eta negozio berriak martxan jarri nahi dituzten ekintzaileen premiei erantzuteko abiarazi da, bai eta lehiakortasuna merkatuan bultzatu, eguneratu, digitalizatu eta handitu nahi duten saltoki eta hiriko enpresa txiki eta ertainen premiei ere.

Zerbitzuei dagokienez, besteak beste, aholkularitza pertsonalizatua eskaintzen zaie ETE eta SALTOKIEI, operatiboki hobetzeko, enpresa-lehiakortasuna handitzeko eta laguntza estrategikoa zein antolakuntza-estrategikoa eskaintzeko, bai eta enpresa-berrikuntzarako, digitalizaziorako edo nazioarteko merkatuetara iristeko ere.

START-UP EDO ENPRESA BERRI BAT MARTXAN JARRI nahi duten EKINTZAILEEI DAGOKIENEZ, kudeaketa hobetzeko prestakuntza jasoko dute eta aholkularitza pertsonalizatua izapide burokratikoak egiteko, negozio-plan bat prestatzeko eta enpresa berria kokatzeko leku egokia hautatzeko, bai eta finantzaketa-lerroak eskuratzeko ere, besteak beste.

Aldi berean, Covid-19aren pandemiak eragindako agertoki honetan, jarduketa-lerroa zabaldu da testuinguru honetan sortu diren premiei aurre egin ahal izateko. Horri dagokionez, zergen, ekonomiaren eta lanaren alorreko kontsulta espezifikoei erantzuteko asmoz, osasun-protokolo berriak betetzeko dirulaguntza zuzenak eman dira, eta lokalen errentamenduari lotutako bitartekaritza-zerbitzua abiarazi da.

Bestalde, sendotzeko beste ekintza batzuk aplikatuko dira, esaterako, baliabide guztiak eskuragarri dituen webgune berri eta modernoagoa bat martxan jartzea (www.bilbaoekintza.eus), “BIG BILBAO” Ekintzailetza Zentroa beste toki handiago batera lekualdatzea, Zabalguneko eraikinera, handitu eta zabaltzen jarraitzeko. Gainera, komunikazio-kanpaina bat aktibatuko da.

Ekintza guzti hauek 2 milioi eurotik gorako aurrekontua izan dute.

ETE, SALTOKI ETA NEGOZIO BERRIENTZAKO LAGUNTZA ZENBAKIETAN

Bilboko ETE eta SALTOKIEI laguntzeko zerbitzuak alor hauek barne hartzen ditu: operatiboki hobetzea, laguntza estrategikoa, enpresa-berrikuntza produktuan, zerbitzuan eta prozesuan, antolaketarako laguntza estrategikoa, digitalizazioa edo kanpoko merkatuetara sartzeko laguntza.

Datu garrantzitsu gisa, nabarmendu beharra dago 2020. urtean, COVID-19aren urtean, udalak, Bilbao Ekintza udal-sozietatearen bitartez, hiriko 2.700 enpresa eta saltoki baino gehiagori eskaini dizkiela laguntza, aholkularitza eta informazioa aipatutako alor guztietan.

Hauexek dira hiribilduko saltoki eta ETE-en zalantzarik ohikoenak edo aholkularitza-alor orokorrenak: ekonomiari (% 23,8), zergei (% 21,1) eta lanari (% 11,9) buruzko zalantzak edo laguntza eta laguntza-lerroak (% 43,1).

Sektoreka sailkatuta, ehungintza, zapatagintza eta osagarrien sektorea (% 15,94), osasun eta estetikaren sektorea (% 15,35) eta ostalaritza eta jatetxeen sektorea (% 13,93) dira aholkularitza eta laguntza gehien eskatu ohi dituzten sektoreak.

ETE edo saltokiaren tamainari dagokionez, % 72,26k hiru langile baino gutxiago ditu, % 12,99k bost baino gutxiago, % 8,74k hamar baino gutxiago eta % 5,31k berrogeita hamar langile baino gutxiago.

EKINTZAILETZA-zerbitzuak iaz, guztira, 1.272 ekintzaileri eman zien arreta. Guztira, 332 enpresa-ekimen jaso ziren, eta 421 proiektuk laguntza eta aholkularitza jaso zituzten (421 proiektu horietatik, 246 proiektu 2020. urteko proiektu berriak izan ziren).

COVID-19aren urte latz horretan elkarrekin egindako lan horri esker, 112 enpresa berri sortu ziren, eta 137 lanpostu berri sortu zituzten Bilbon. Hain zuzen ere, horiexek dira Bilboko Udalak duela gutxi omendu dituenak.

Azpimarratu beharra dago Bilbao Ekintzaren babesarekin martxan jarritako enpresa berrien % 70k, gutxi gorabehera, martxan jarraitzen du jardueraren lehenengo hiru urteak igaro ondoren. Datu horrekin agerian geratzen da zein garrantzitsua den Ekintzailetza Zentroak eskaintzen duen zerbitzua; izan ere, start-up eta enpresa berriei merkatura sartzen laguntzen die, baina egoerarik onenean egin dezaten eta ahalik eta arriskurik txikienarekin.

1.- HIRIKO ETE ETA SALTOKIEI ZUZENDUTAKO ZERBITZUAK

1.- INFORMAZIOA ETA LAGUNTZA

Udalerriko mikroenpresa, ETE, saltoki eta autonomoen premiei egokitutako zerbitzu, programak eta proiektuak, enpresentzako interesgarria den informazio guztia zentralizatuta

* PANDEMIA-EGOERARI AURRE EGITEKO AHOLKULARITZA INTEGRALEKO ZERBITZUA

Covid-19a dela eta, aholkularitza- eta laguntza-zerbitzu integral bat gehitu da. Doakoa da, eta, bertan, COVID-19ak sortutako egoerari aurre egiteko erabil ditzaketen neurri aringarrien inguruko informazioa ematen zaie saltoki, ETE eta autonomoei.

Zerbitzua Bilbao Ekintza udal-sozietatearen bitartez eskaintza da, eta esteka honen bitartez egin dezakezu eskaera.

Jasotako galdera guztiak erantzuten dituzte Bilbao Ekintzako profesionalek, eta negozioen arabera egokitutako aholkularitza pertsonalizatua eskaintzen dute lanari, zergei eta finantzaketari lotutako gaien inguruan, bai eta administrazio zein erakunde publikoek eskainitako laguntza-neurrien inguruan ere.

2.- GAIKUNTZA, KUDEAKETAREN BIKAINTASUNA ETA LEHIAKORTASUNAREN GARAPENA

Urte osoan eskaintzen den zerbitzu pertsonalizatua da, eta jarduera duela urtebete baino gehiago hasi zuten ETE eta saltokiei dago zuzenduta. Profesional adituek ematen dute. Negozio bakoitzaren premia zehatzak identifikatzea eta hobetu daitezkeen esparruak banan-banan babestea da xedea, bai eta digitalizazioan, merkataritza-marketinean, ekonomia- eta finantza-alorrean eta giza baliabideen esparruan hobetzeko proiektuak babestea ere, besteak beste.

3.- BERRIKUNTZA

Produktuan, zerbitzuan eta prozesuan berritzaileak izateko sormen-teknikak eta -tresnak ematen dira negozio-ereduari dagokionez eta erabiltzailearen esperientzia hobetzeko, aholkularitza eskatzen duten ETE eta saltokien emaitzak hobetzeko eta lehiakortasunak gora egiteko.

4.- ESTRATEGIA: MENTORING BILBAO PROGRAMA

Programa estrategiko bat da, eta, bertan, askotariko topaketak eta bilerak egingo dira mentoring-programako hartzaileekin. Programak zortzi hilabete iraungo du, eta ibilbide profesional sendoa duten enpresaburuekin antolatuko da (mentoreak). Topaketetan babes estrategikoa eskainiko dute, eta haien ezagutza eta esperientzia partekatuko dituzte. Ikasteko eta hazteko gune bat sortuko dute, programan parte hartuko duten enpresen epe luzerako ikuspegia hobetu ahal izateko eta erabakiak hartzea errazteko.

“Mentoring Bilbao” programa 2008. urtean abiarazi zenetik, guztira, 127 saltokik eta ETE-ek lehiakortasuna hobetu dute parte hartu duten 84 mentoreen laguntzari esker.

5.- NAZIOARTEKO MERKATUETAN SARTZEA

“Balebila” programaren bidez, nazioartean ezagutzera eman nahi diren negozioei komunikazioko eta harreman publikoko estrategia praktikoak eta tresnak eman nahi zaizkie. Bertan parte hartu ahal izateko, ingelesa ondo jakin beharra dago; izan ere, ingelesez eskainiko dira jarduera guztiak.

6.- ZERBITZUEN DIGITALIZAZIOA

ETE eta saltokiei eskainitako zerbitzuen digitalizaziorako proiektu bat garatzea, aurrez aurreko zerbitzuak indartzeko eta osatzeko asmoz.

7.- ENPRESA-KOMUNITATEA ETA PRESTAKUNTZA

Lankidetzarako espazioak sortzea, networking ekitaldiak eta tailerrak antolatuta, bai eta gure enpresa-ehunerako interesgarriak diren gaurkotasuneko gaien inguruko jardunaldiak ere.

2.- EKINTZAIEEI LAGUNTZEKO ZERBITZUAK- START-UP ETA NEGOZIO BERRIAK SORTZEA – BIG BILBAO

Bilbao Ekintza udal-sozietateak Big Bilbao izeneko Ekintzailetza Zentro bat du, eta, lehen esan dugun bezala, oraintsu, Zalbalguneko eraikinean dauden instalazio handiago batzuetara lekualdatu dituzte zerbitzuak, hazten jarraitzeko eta ekimen ekintzaile gehiago barne hartu ahal izateko.

Espazio berritzaile eta irisgarri bat da, eta, bertan, Bilbon start-up edo negozio-ideia bat egia bihurtzeko beharrezkoak dituen baliabide eta informazio guztia helaraziko zaio ekintzaileari. Herritar ekintzaileentzat irekita dagoen espazio bat da, berrikuntzara eta sormenera bideratuta, zerbitzuen katalogo integral batekin eta ekintzaile, start-up eta enpresen arteko topaketetarako, elkarri eragiteko eta networkingerako espazio batekin. Erabilera askoko gune bat izango da, premietara egokituta, eta Bizkaiko beste ekintzailetza-baliabide batzuen osagarri, horiekin koordinatuta, bai eta lurraldeko enpresa-ehunari lotuta ere.

Horretarako, ekintzaileen askotariko profilen arabera diseinatutako eta pertsonalizatutako ibilbideen arabera egiten da lan, profila edozein izanda ere: start-up edo ekintzaile digitala, retail sektoreko ekintzailea, ekonomia sozial eta solidarioaren sektoreko ekintzailea, autoenplegua…

Zerbitzu hauek eskaintzen dira:

1.- INFORMAZIOA ETA LAGUNTZA

Start-up eta ekintzaileen askotariko premietara egokitutako zerbitzuak, programak eta proiektuak, ekimen ekintzaileetarako interesgarria den informazio guztia espazio bakarren zentralizatuta.

2.- IDEIA

Proiektua hasiera-hasierako fasean aztertzen dugu eta ekintzailetzaren munduari buruzko zure lehenengo zalantzak argitzen ditugu, bai eta emango duzun aurrerapauso handiak izango dituen ondorioak ere.

3.- BUSINESS PLANA

Negozio-alor bakoitzeko adituek banakako aholkularitza eskainiko dute: negozio-eredua, ideia egiaztatzea eta baliozkotzea, marketin digitala, merkatu-azterketa, salmenten kanala, ekonomia- eta finantza-azterketa, kostuen egitura, lantaldea, akzioen egitura, alderdi juridikoak, bazkideen ituna, hitzarmenak, business plan integrala…

4. SOFT SKILLS ETA KUDEAKETARAKO GAITASUNAK

Ekintzaileei start-up eta enpresak kudeatzen ikasteko beharrezkoak diren tresnak emateko prestakuntza eta aholkularitza. Enpresa-arrakasta lortzeko beharrezkoak diren gaitasun nagusiak entrenatzea.

5.- ABIAN JARTZEA ETA KALERATZEA

Enpresak Sortzeko Sarea eta Informazio Zentroaren bitartez egiteko izapidetze telematikoko zerbitzua, martxan jartzeko izapideak egiteko. Negozioaren lehenengo urtean laguntza ematea, gero, ETE eta Merkataritza Zerbitzura joan aurretik.

6.- . FINANTZAKETA

Hitzarmenak finantza-entitateekin, start-up eta enpresa-proiektuak babesteko eta finantzatzeko.

7.- ESPEZIALIZAZIO ADIMENDUNA

Bilboko espezializazio adimendunaren estrategiarekin bat datozen programa espezifikoak. Start-upei eta profil teknologikoak duten proiektuei zuzendutako Ekintzailetza DIGITALeko programa nabarmentzen da, bai eta RETAIL Ekintzailtza delakoa ere, merkataritzaren sektoreko proiektuetarako.

8. EKONOMIA SOZIALA ETA SOLIDARIOA / EKONOPOLO

Ekonomia Sozial eta Solidarioaren sektoreko proiektuetara bideratutako laguntza-programak. Harrobi plazan dagoen inkubazio-espazio fisikoa. BIG Bilbao zentroak egoteko espazio bat eskaintzen die sektoreko enpresei. Espazioa Harrobi plazan dago, eta EKONOPOLO du izena.

9.- KOMUNITATE EKINTZAILEA

Ekintzaile, start-up, enpresa eta ekosistema ekintzaileko eragileen artean loturak sortzeko eta harremanak ezartzeko lankidetzarako espazioak sortzea. Networking-ekitaldiak, tailerrak eta jardunaldiak, komunitate ekintzailearentzat interesgarriak eta gaur egungo gaiei buruzkoak.

10. AUZOFACTORY ZENTROEN SAREA

Start-up edo negozio berriak jartzeko espazio fisikoak eskaintzen dira. Bertan, lan egiteko modu berriak ikasiko dituzte, harremanetarako sareak sortu eta enpresei hazten eta finkatzen lagunduko dieten konexioak ezarri.

11. ZERBITZUEN DIGITALIZAZIOA

Start-up eta ekintzaileei eskaintzen zaizkien zerbitzuen digitalizazio-proiektua, aurrez aurreko zerbitzuak indartzeko eta osatzeko asmoz.

INFORMAZIO GEHIAGO eta Bilbao Ekintza udal-sozietatearekin harremanetan jartzea:

  • www.bilbaoekintza.eus
  • BIG BILBAO Ekintzailetza Zentroa, Zabalguneko plaza, 1. Telefonoa: 94 420 53 60.
  • ETEak eta SALTOKIAK hobetzea eta laguntzea: Terminus eraikina (Navarra kalea, 5). Telefonoa: 94 420 53 30.

by

Bilbao Ekintzak, Bilboko Udalaren udal sozietateak, maiatzaren 19an antolatuko duen online Enpresa Jardunaldira gonbidatzen zaitu. Bertan, BATUZ sistema berria aurkeztuko da, hau da, 2022ko urtarrilaren 1ean Bizkaian indarrean sartuko den estrategia fiskala.

Zubizarreta Consulting eta Bizkaiko Foru Aldundiko Ogasun saileko eta IZENPE-ko (EAEko Administrazioak elektronikoki identifikatzeko plataforma) arduradunekin lankidetzan, sistemaren berritasun nagusiak eta TicketBAI eta sistemaren barruan erabil daitezkeen ziurtagiri elektronikoak aztertuko dira.

Bat egin gurekin!

Hizlariak:

  • Antonio Pérez Delgado, Bizkaiko Foru Ogasuneko Ikuskaritzako zuzendariordea.
  • Iñigo Egia Ossorio, Bizkaiko Foru Aldundiko Iruzurraren aurkako Borrokaren Arriskuen Analisirako eta Koordinaziorako zerbitzuburua.
  • Raquel Garay, Proiektu Saileko arduraduna IZENPEn (EAEko administrazioen identifikazio elektronikorako plataforma).
  • Asier Etxeita, Zubizarreta Consulting-ko bazkidea.

 

PROGRAMA

9:00- Aurkezpena (Bilbao Ekintzako zuzendari nagusiaren, Javier Garcinuño Zabala, eskutik)

9:10- 11 Bizkaiko Foru Ogasuneko eta IZENPEko arduradunen hitzaldiak:

  • Antonio Pérez Delgado, Bizkaiko Foru Ogasuneko Ikuskaritzako zuzendariordea.
  • Iñigo Egia Ossorio, Bizkaiko Foru Aldundiko Iruzurraren aurkako Borrokaren Arriskuen Analisirako eta Koordinaziorako zerbitzuburua.
  • Raquel Garay, Proiektu Saileko arduraduna IZENPEn (EAEko administrazioen identifikazio elektronikorako plataforma).
  • Asier Etxeita, Zubizarreta Consulting-ko bazkidea.

Hitzaldien edukiak honako gai hauek biltzen ditu: proiektuaren egungo egoera eta ezarpen-egutegia. Bereziki, arau-berritasunak. Fakturak eta eragiketen gainerako egiaztagiriak (TicketBAI proiektua) egitean bete behar diren zehaztapen teknikoak, baldintza tekniko batzuk betetzen dituen fakturazio-softwarea erabiliz.

Sinadura-ziurtagiriak: hautaketa egokia egiteko kontuan hartu beharreko baldintzatzaileak, aukerak eta faktoreak. (Raquel Garay de Izenpe).

Jarduera ekonomikoak egiten dituzten pertsonek eta erakundeek sortutako informazioa bidaltzea, eragiketa ekonomikoen erregistro-liburuak Bizkaiko Foru Aldundiaren egoitza elektronikoan kudeatuz.

Zergadunei laguntzea, zerga-aitorpenen zirriborroak eginez. Zehapen-araubidea. Zerga-pizgarriak.

11:00-11:15 h.: Hitzaldia, Asier Etxeita- Zubizarreta Consulting-eko bazkidea: Batuz, nire negozioan erabiltzen ditudan kudeaketa-tresnei balioa emateko aukera gisa.

11:15-11:30 h.: Galderak

by

  • Asteazkeneko, maiatzak 5, 10:00etatik aurrera sektore hauei pandemiari aurre egiten laguntzeko Bilboko Udalaren LAGUNTZA ZUZENAK eskatu ahal izango dira: turismoaren sektorea, eta arropa, zapata eta larruzko artikuluen txikizkako merkataritza telematikoki eskuratu ahal izango dira, esteka honen bidez: https://www.bilbaoaurrera.eus.

  • Guztira, 1,1 milioi euro baino gehiago emango dira, eta horietatik 877.000 euro merkataritzarako dira eta 268.000 euro turismorako.

Asteazkeneko, maiatzak 5, 10:00etatik aurrera, aktibatuta egongo da Bilboko Udalaren www.bilbaoaurrera.eus webgunean, eta TURISMOAREN sektoreari zuzendutako laguntza zuzenak eskatu ahal izango dira bertan, bai eta ehungintzako eta zapatagintzako MERKATARITZARI dagozkionak ere. Aparteko neurriak dira biak, eta pandemiari aurre egiteko Bilbao Aurrera 2021 Planean jasotako ekintza eta aurrekontura gehituko dira. Plana udal-ordezkaritza duten talde politiko guztiekin adostu da, eta, guztira, 15 milioi euro baino zertxobait gehiagoko inbertsioa egingo da. Era berean, Bilbao Ekintza udal-sozietatea arduratuko da izapide guztiak egiteaz, aipatutako webgunearen bidez. Eskabideak aurkezteko epea datozen 15 egun baliodunetan egongo da irekita, hau da, maiatzaren 20era arte.

Hiriko txikizkako MERKATARITZARI eta, zehazki, arropa, zapata eta larruzko artikuluen sektoreei zuzendutako laguntza zuzenen poltsaren kasuan, udalak 877.000 euro bideratuko ditu, eta, horrela, Eusko Jaurlaritzak ematen dituenak osatuko dira. Udalak bideratuko dituen laguntzen kopurua 1.000 eurokoa izango da 1 eta 9 enplegu arteko plantilla duten saltokientzat eta 1.500 eurokoa 10 langile baino gehiago dituztenentzat.

  • 1 eta 9 langile artean: Bilboko Udalaren 1.000 euro (+ Eusko Jaurlaritzaren 4.000 € ) = 5.000 €, GUZTIRA.
  • 10 langile edo gehiago: Bilboko Udalaren 1.500 euro (+ Eusko Jaurlaritzaren 4.500€ ) = 6.000 €, GUZTIRA.

Gaur egun, laguntza-sorta jaso ahal izango duten tipologia horretako 861 establezimendu daude Bilbon, gutxi gorabehera (EJSNren arabera).

Hauxe da aurrekontu-irismenaren kalkulua:

  • 1-9 langile dituzten establezimenduak: 829 saltoki X 1.000 € bakoitzak = 829.000 €, guztira.
  • 10 langile edo gehiago dituzten establezimenduak: 32 saltoki X 1.500 € bakoitzak = 48.000 €, guztira.

TURISMOAri zuzendutako laguntza zuzenen kasuan, udalak, guztira, 268.000 euro bideratuko ditu, eta Bilboko udalerriko turismo-sektoreko pertsona fisiko (autonomoak edo profesionalak, ondasun-erkidegoen bazkideak eta nortasun juridikorik gabeko sozietate zibilak) edo juridikoek, mikroenpresa edo ETE guztiek parte hartu ahal izango dute: turismo-garraioko enpresak, turismo aktiboko enpresak, kongresuak antolatzen dituzten enpresa profesionalak, turismo-gidariak eta bitartekaritzako turismo-enpresak.

Zenbatekoak langileen kopuruaren arabera emango dira, eta 1.000 euro, 1.250 euro edo 1.500 eurokoak izango dira. Beste mota batzuetako dirulaguntzen osagarriak izango dira.

  • 1-9 langile dituzten establezimenduak: MILA EURO (1.000,00 €).
  • 9 langile baino gehiago dituzten establezimenduak: MILA BERREHUN ETA BERROGEITA HAMAR EURO (1.250,00 €).
  • Bitartekaritzako turismo-enpresak: MILA ETA BOSTEHUN EURO (1.500,00 €).

Era berean, eskabide bat aurkeztu ahal izango da lantoki edo establezimendu bakoitzeko, enpresa bakarrak bat baino gehiago izan arren. Enpresek establezimendu edo lantoki bakoitzerako eskatu ahal izango dituzte laguntzak, bakoitzari dagokion eskabidea aurkeztuta. Bitartekaritzako turismo-enpresak (bidaia-agentziak) salbuespena izango dira; izan ere, eskaera bakarra egin beharko dute enpresa osatzen duten lantoki, sukurtsal eta salmenta-toki guztietarako.

Laguntzen bi lerroak telematikoki eskatu ahal izango dira, esteka honen bidez: https://www.bilbaoaurrera.eus. Horrez gain, kontsultak egiteko eta informazioa eskatzeko telefono-zenbaki hau erabili daiteke: 94.420.53.57. Edo, bestela, helbide elektroniko honetara idatzi: bilbaoaurrera@bilbaoekintza.bilbao.eus.

by

  • Bilbao Basket Kirol Elkartearen eta INNOLAB Bilbaoren arteko lankidetza-hitzarmena sinatu dute, aplikazio teknologikoko proiektu bat garatzeko, taldearen kirol-kudeaketa digitalizatzen laguntzeko.

  • INNOLAB Bilbao irabazi-asmorik gabeko elkartea da, Bilboko Udalak bultzatutako lankidetza publiko-pribatu baten emaitza, eta hainbat eremutako bazkideak batu zaizkio, hala nola BBK, IBM, Iberdrola, Mondragon Korporazioa, IMQ Taldea, Deustuko Unibertsitatea, BCAM (Basque Center for Applied Mathematics)…

Bilbao Basket Kirol Elkartearen eta INNOLAB Bilbaoren arteko lankidetza-hitzarmena sinatu dute, aplikazio teknologikoko proiektu bat garatzeko, taldearen kirol-kudeaketa digitalizatzen laguntzea helburu duena, ondoren azterketa estatistiko aurreratua egiteko.

Honako hauek sinatu dute akordioa: Isabel Iturbe, Bilbao Basket Kirol Klubeko presidentea, eta Gorka Martínez Salcedo, INNOLAB Bilboko presidentea. Bertan izan da, halaber, Javier Garcinuño Bilbao, Ekintza udal-sozietateko zuzendaria, zeinak proiektua prestatzeko lanetan parte hartu duen.

Hitzarmen horri esker, saskibaloi-klubak hainbat talde eta lehiaketetako jokalari propioak edo aurkariak ebaluatu ahal izango ditu, talentua detektatu eta plantilla konfiguratu ahal izango du bere tresnak erabiliz. Prototipatu teknologikoko proiektu hori INNOLAB Bilbaoko bazkide den BCAMek (Basque Center for Applied Mathematics) garatuko du.

Lankidetza horren bidez, Bilbao Basket Klubak bere digitalizazio-planaren ardatz nagusietako bat garatuko du, jokalarien errendimenduaren kudeaketa eta ebaluazioa indartuz, baita haien errendimendua monitorizatuz ere, faktore hori erabakigarria baita plantillak konfiguratzeko orduan.

Isabel Iturbe Bilbao Basket Kirol Klubeko presidentearen aburuz, “Bilbao Basketetik berrikuntzaren aldeko apustua egiten dugu. Klubeko hainbat arlo digitalizatzeko lanean ari gara eta proiektu hau, INNOLABen eskutik, prozesu horretan aurrerapauso handia izango dela uste dugu”. Bestalde, Gorka Martinezek adierazi duenez, “Digitalizazioa jada ez da aukera bat. Hori dela eta, INNOLAB Bilbaorentzat, atsegina da gure hiriko erreferentziako klub bati, Bilbao Basketi, teknologia erabiltzeko bidean laguntzea erronka berriei aurre egiteko, kirol-kudeaketa modu lehiakorrean eta eraginkorrean aldatuz”. Bilbao Ekintza udal-sozietateko arduraduna den Javier Garcinuñoren esanetan, “oso garrantzitsua da mota honetako proiektuak sortzea, bai eta elkarrekin lan egiten jarraitzea ere. Horrela, sektore guztietara eramango dugu hain beharrezkoa den digitalizazioa, kirolaren mundura ere bai”.

INNOLAB Bilbao

INNOLAB Bilbao berrikuntza irekiko plataforma bat da. Bertan, talentuak, teknologiak eta industriak bat egiten dute enpresa-erronkei irtenbide digital berriak emateko, euskal gizartean berrikuntza teknologikoa bultzatuz eta enpresak eta industria digitalizatzeko jarduerak bultzatuz.

2016an sortu zen eta irabazi-asmorik gabeko elkartea da, Bilboko Udalak bultzatutako lankidetza publiko-pribatu baten emaitza, eta hainbat eremutako bazkideak batu zaizkio, hala nola BBK, IBM, Iberdrola, Mondragon Korporazioa, IMQ Taldea, Deustuko Unibertsitatea, BCAM (Basque Center for Applied Mathematics) eta El Correo.

by

  • Apirilaren 22an, osteguna, 09:30ean eta online antolatuko da “Digitalizazioa ostatuetan. Contactless irtenbide teknologikoak: check in, check out” jardunaldia.

  • Topaketa horren bitartez, digitalizazioa eta kontakturik gabeko irtenbideak bultzatu nahi dira, segurtasun-protokoloa bermatzeko eta bertaratzen direnei esperientzian hobekuntzak eskaintzeko.

Bilboko Udalak, Bilbao Ekintza udal-sozietatearen bitartez eta Innolab-en lankidetzarekin, “Turistech Bilbao” topaketak antolatu ditu. Jardunaldietan, hain zuzen ere, teknologiak turismo-enpresei eskaini diezazkiekeen aukerak aztertuko dira.

Hori horrela, “Digitalizazioa ostatuetan. Contactless irtenbide teknologikoak: check in, check out” jardunaldia egingo da apirilaren 22an, osteguna, formatu digitalean. Hotelen sektorea kontzientziatu nahi da, kontakturik gabeko, contactless, irtenbideak eta digitalizazioa zein garrantzitsuak diren jakin dezaten, batik bat, enpresan segurtasun-protokolo bat bermatzeko eta bertaratzen direnei esperientzia hobeagoa eskaintzeko.

Gai hauek landuko dira jardunaldian: turismo-ostatuetan teknologia berriak ezartzearen inguruko joera digitalen berri emango da, smart ostatua izateko teknologiak duen potentziala azalduko da eta kontakturik gabeko sarbideetan berritzaileak izateko abangoardiako proposamen berriak deskubrituko dira. Álvaro Carrillo de Albornoz (ITH, Instituto Tecnológico Hotelero) arduratuko da hitzaldi nagusia emateaz, eta Smart Hotel proiektuari buruzkoa izango da. Garatzeko, Amadeus-ekin aritu da lankidetzan, ostatuen segmentuaren lehiakortasuna hobetzeko asmoz, establezimenduei negozioaren eraldaketa digitalerako eta jasangarrirako beharrezkoak diren zerbitzuak eta tresnak errazteko. Innovahotel, Hoomvip, Onity eta STAYmyway enpresak arduratuko dira teknologia-irtenbideak aurkezteaz.

Apirilaren 22ko 09:30ean egingo den jardunaldian parte hartu nahi baduzu, esteka honetan eman dezakezu izena.

by

  • Gaur goizean egin da ATELIER proiektuaren aurkezpen ofiziala, eta honako hauek bildu dira lan-saioan: Asier Abaunza, Bilboko Udaleko Obrak, Hiri Plangintza eta Proiektu Estrategikoen zinegotzia; Alfonso Gil, Bilboko Udaleko Mugikortasuna eta Jasangarritasun zinegotzia; Javier Marqués, EEEko zuzendari teknikoa; Iñaki San Sebastián, Tecnaliako zuzendari nagusia, eta Frans Verspeek, Europako proiektuaren koordinatzaile nagusia.
  • Ekimenaren xedea da kontsumitzen dutena baino energia gehiago sortzen duten eremuak eratzea eta errepikatzea, bai eta hiriaren energia-ikuspegi bat sortzea ere, 2050era begira.
  • ATELIER proiektuaren esparruan, Bilbo eta Amsterdam izan dira energia sortzeko irtenbide berritzaileak bilatzeko eta proposatzeko hautatu dituzten hiriak, eta, gero, Europako beste sei hiritan errepikatuko dira lorpenak.

ATELIER proiektuaren aurkezpena gaur goizean egin da Bilbon. Ekimenaren esparruan, Bilbo eta Amsterdam izan dira energia sortzeko irtenbide berritzaileak ekartzeko hautatu diren hiriak, eta gero beste sei hiritan errepikatuko dira emaitzak.

Bilboren kasuan, Zorrotzaurre izango da proiekturako espazio esperimentala. Esperientzia horiek abiapuntutzat hartuko dira, hiriek gero hiriaren 2050eko Energia Ikuspegia garatzeko.

Bilboko Udaletxean egin da ATELIER proiektuaren aurkezpena, eta honako hauek bildu dira lan-saioan: zuzendari-lanetan Asier Abaunza, Bilboko Udaleko Obrak, Hiri Plangintza eta Proiektu Estrategikoen zinegotzia, eta parte-hartzaile gisa Alfonso Gil, Bilboko Udaleko Mugikortasuna eta Jasangarritasun zinegotzia; Javier Marqués, EEEko zuzendari teknikoa; Iñaki San Sebastián, Tecnaliako zuzendari nagusia, eta Frans Verspeek, Europako proiektuaren koordinatzaile nagusia.

Lehenengo aurkezpen-saio honen ostean, Bilboren energia-trantsiziorako diagnostiko-tailer bat garatu da, non proiektuko bazkide diren beste entitate batzuek eta askotariko gizarte-eragileek parte hartu duten. DAFO Bilbao diagnostiko-tailerra lankidetzarako prozesu bat da, eta energia-trantsizioan murgilduta dauden askotariko eragileek beren ezagutza eta zalantzak helarazi ahal izango dituzte bertan.

ATELIER (hemendik sortu dira siglak: AmsTErdam and BiLbao cItizen drivEn smaRt cities) Europako Smart Cities and Communities Lighthouse proiektuaren barruan dago, zeinak kontsumitzen dutena baino energia gehiago sortzeko eremuak sortu eta errepikatu nahi dituen Europako zortzi hiritan. Proiektuan, halaber, 2050erako Energia Ikuspegi bat prestatuko da bertan parte hartuko duten hirietarako. Hiriaren ikuspegi horren elementuek hirien epe ertaineko eta luzeko helburuak finkatuko dituzte, bai eta hiriaren energia-sistema modu eraginkor eta osoan deskarbonizatzeko trantsizio-agertokiak ere.

ATELIER proiektuan, irtenbide berritzaileak bilatuko dira bi hirietan —Amsterdam eta Bilbo–, eta proiektuko beste sei kideek —Bratislava, Budapest, Kopenhage, Krakovia, Matosinhos eta Riga— eskaintzen dizkieten esperientziak errepikatuko dituzte.

ATELIER proiektu europarrean 30 bazkidek parte hartuko dute. Bestalde, hiri adimendunen garapena du xede, eta deskarbonizazioa zein energia-trantsizioak aldaketarako bektoreak izango dira parte hartzen duten Europako zortzi hirietarako. ATELIER proiektuaren bitartez, teknologia berriak, finantzaketa-eredu berriak eta negozio-ereduak probatu nahi dira, energiaren alorreko proiektu berritzaileak bultzatzen laguntzeko.

BILBOKO ESPERIMENTAZIO-POLOAK ETA AURREKONTUA

ATELIER proiektuak 5 urte iraungo du, eta 22 milioi euro inguruko aurrekontua izango du. Horietatik, 20 milioi euroko ekarpena egingo du Europako Batzordeak.

Zenbateko horri dagokionez, 8 milioi Bilbori dagozkio, Bilboko Udalak osatuko duen lantaldearekin. Horrez gain, honako hauen arteko koordinazio-lanez arduratuko da: tokiko erakunde osoa, Zorrotzaurre Kudeaketa Batzordea, Tecnalia, Iberdrola, EEE, TELUR, Deustuko Unibertsitatea, Zabala Innovation Consulting, Cartif eta Energia Klusterra. Zenbateko horri dagokionez, Udalak 1,8 milioi euro kudeatuko ditu zuzenean.

by

Bilbao Ekintzak, Bilboko udalaren udal sozietatea, Innolabekin lankidetzan, “Turistehc Bilbao: Digitalizazio ostatuak. Contacles interbide teknologikoak: check in, check out” online jardunaldia ospatuko du apirilaren 22an.

COVID-19ren osasun-krisiak markatutako testuinguruan, ekitaldi honek ostatu-sektoreen negozioak digitalizatzearen eta “contactless” irtenbiden garrantziaz kontzientziatzea helburu du, enpresa barruan segurtasun-protokolo bat bermatzeko eta erabiltzaileei esperientzia hobego bat eskaintzeko.

Teknologia berriei esker, bidaiariek edozein gailu elektronikotatik kudeatu dezakete check-in eta check-out prozesua, modu azkar, erraz eta seguruan. Aldi berean, ETEek beren ahalmen guztia baliatzen dute bezeroari esperientzia hobea eskaintzeko.

Horretarako, sektoreko adituek eta erreferenteek honako gai hauek landuko dituzte:

  • Joera digital berriak: ostatu turistikoen inguruko berrikuntza teknologikoak aurkitzea.
  • “Smart” ostatua: negozioak inguru adimendun bihurtzeko teknologien potentziala aprobetxatzeak duen garrantzia ulertzea.
  • “Contactless” irteenbideak: “Kontaktu gabeko” teknologia nagusiak eta horien abantailak ezagutzea eta aztertzea.

Eman izena!

 

PROGRAMA – Online

09:30   Saioaren hasiera: Bilbao Ekintza – INNOLAB Bilbao

09:35   ITH Hitzaldia . Alvaro Carrillo de Albornoz. Proyecto Smart Hotel

09:50   Irtenbide Teknologikoak

  • 09:50: Innovahotel
  • 10:05: Hoomvip
  • 10:20: Onity
  • 10:35: STAYmyway

10:50  Galderak

11:00  Bukaera

by

  • Kultur eta sorkuntza proiektuetarako deialdiak 59 proposamen diruztatuko ditu, guztira 500.698 euroko aurrekontuarekin, eta proposamenok Uriaren programazioan txertatuko dira aurtengo urtean zehar.

  • Bilbon ikus-entzunezkoak sustatzeko “Proiektuen poltsa” delakoa ikus-entzunezkoen eta zinemagintzaren sektorerako da, eta gehienez ere 3 lan hautatuko dira, 14.000 eurorekin diruztatuko delarik bakoitza.

  • Bilbok, aurrerantzean ere, jarrera errimea izango du kulturaren sektorearen alde eta COVID-19ak eragindako krisi sanitarioaren ondorioak arintzearren, eta, ostera ere, neurri berriak ezarri ditu Urian kultur jarduera berpizteko.

Bilboko Udalak, aurrerantzean ere, jarrera errimea izango du kultur sektorearen lanaren alde eta COVID-19 gaitzak eragindako krisi sanitarioaren ondorioak arintzearren.

Hala, Udalak, ostera ere, neurri berriak ipiniko ditu pandemiaren ondorioak leuntzeko, eta, aldi berean, Urian kultur jarduera bizkortzeko, eta bi deialdi berri prestatu ditu horretarako. Alde batetik, kultur eta sorkuntza proiektuen hautapen bat, eta, bestetik, proiektuen poltsa bat Bilbon ikus-entzunezkoak sustatzeko; biak ere Bilbao Aurrera 2021 Plan Berezian Bizkaiko hiriburuan gizarte-kohesioaren alde, ekonomia eta enplegua suspertzeko eta kultura bizkortzeko jasotako neurrien artean.

KULTUR ETA SORKUNTZA PROIEKTUAK HAUTATZEKO DEIALDIAN, Bilboko kulturaren eta sorkuntzaren sektoreko profesionalen eta entitateen proposamenak sartzen dira. Ekimen horiek Uriko kultur jardueren programazioan sartuko dira, eta 2021ean zehar egikaritu beharko dira.

Ahalik eta eragile gehienengana iristearren eta ahalik eta jarduerarik gehien eragitearren, guztira 59 proiektu hautatuko dira, eta 500.698 euroko aurrekontuarekin diruztatuko dira; lau kategoria ezarri dira, balorazio ekonomikoaren arabera: 2.000 euro, 5.000 euro, 10.000 euro eta 14.900 euro.

Deialdia honako kultur eta sorkuntza sektore hauetako proiektuetarako da: arkitektura; arte eszenikoak; ikusizko arteak; artisautza; ikus-entzunezkoak; eduki digitalak; diseinua; edizioa; hizkuntzaren arloko industriak; moda; musika; ondarea; publizitatea eta marketina; antolakuntza zerbitzuak (hezkuntza artistikoa, bitartekaritza, ekitaldiak antolatzea eta produzitzea, kultur aholkularitza eta kudeaketa,…); bideo-jokoak; eta zeharkako kultur jarduerak.

Kultur proposamen guztiek unean uneko osasun-egoerara egokituta egon behar dute, indarrean dagoen araudia betetzen dela bermatuz eta, zehazki, Covid-19ari aurre egiteko beharrezkoak diren segurtasun-neurri guztiak (edukiera, pertsonen arteko distantzia, pertsonak elkartzeko mugak, ordutegiak, etab.).

Proiektuak euskarazkoak nahiz gaztelaniazkoak izan daitezke, eta 2021eko maiatzaren 7ra arte aurkeztu ahal izango dira, posta elektronikoaren bidez, helbide honetan: cultura@bilbao.eus.

Deialdiaren oinarriak esteka honetan ikus daitezke.

2021erako, bestalde, Udalak ostera ere jarri du abian deialdi hau, bigarren aldiz: “BILBO IKUS-ENTZUNEZKOEN BIDEZ SUSTATZEKO PROIEKTUEN POLTSA, URIKO IKUS-ENTZUNEZKOEN ETA ZINEMAGINTZAREN SEKTORERAKO”

Bilboko Udalak Bilbo Aurrera 2021 Plana delakoren bidez onartutako neurrien artean, urian ikus-entzunezkoen produkzioa sustatu eta laguntzearren, deialdi bat egin zaie aurten ostera ere, Arriaga Antzokiak eta ZINEBI jaialdiaren bidez, ikus-entzunezkoen eta zinemagintzaren sektorearekin zerikusia duten Bilboko enpresei, parte har dezaten ikus-entzunezkoen funts bat sortzen, Bizkaiko hiriburua sustatzearren.

2020an bezala, deialdi honek helburu bikoitza du: alde batetik, Bilboko ikus-entzunezkoen eta zinemagintzaren sektorea babestu, lagundu eta sustatu nahi du; eta, bestetik, Bilbo sustatzen duen ikus-entzunezkoen funtsa eguneratu, aberastu eta osatu nahi du, abiapuntutzat hartuz, esate baterako, Bilboko ondarezko eraikinak, Uriak hirigintzaren aldetik izan duen eraldakuntza, Bilboko auzo bereziak, uriaren jarduera etengabea, kultur eskaintza, saltokiak eta elkarteak, jaiak, bizilagunak, ohiturak, eskaintza turistikoa.

Proposamen honen bidez, gonbidapena egiten zaie Uriko sortzaileei pentsa eta birpentsa dezaten uriaren oraina eta etorkizuna. Proposamen berri eta ezezagunak bildu nahi dira, luzeenez ere 45 minutukoak, sormenezkoak eta askotarikoak, uria sustatzen lagunduko dutenak, baina uriari buruzko gogoeta ere eragingo dutenak: “Nola aldatu da Bilbo azken urteotan? Nola egiten dio aurre uriak normaltasun berriari, nola zerbitzuek edo nola kultur eta/edo turismo eskaintzak? Zer erakargarri eskaintzen ditu uriak ondarearen, kulturaren, jaien eta besteren aldetik? Zer kultur sare osatzen du uriak, eta zer erronka ditu? edo, zer uri mota, askotarikoa, inklusiboa eta berdinzalea, eraiki beharko genuke kulturaren bidez?

“Proiektuen Poltsaren” aurrekontua, guztira, 50.820 euro da, eta gehienez ere 3 proiektu hautatuko dira, eta 14.000 eurorekin diruztatuko da bakoitza.

Ikus-entzunezkoak 2021eko abuztuaren 30a baino lehen aurkeztu behar dira posta elektroniko bidez, helbide honetan: zinebi@zinebi.eus

Deialdi honen oinarriak esteka honetan ikus daitezke.

BILBAO AURRERA PLANA

Bilbao Aurrera 2021 Plana delakoa iaz lehenengoz abiarazi zen “Bilbao Aurrera 2020 Plana” zenaren jarraipena da, orduan sortu baitzen pandemia mundu osoan, COVID-19 gaitzaren krisi sanitarioak uriko pertsonen eta enpresen artera ekarritako ondorioak arintzeko eta haietatik oneratzeko eta suspertzeko.

Iazko maiatzean udal-ordezkaritza zuten alderdi politiko guztiek adostutako #BilbaoAurrera2020 Planak izandako harrera onaren ondoren, Bilboko Udalak ezohiko plan berri bat jarri du abian, #BilbaoAurrera2021 izenekoa. Plan horrek jarraipena ematen dio azken hilabeteetan egindako lanari, eta 15,1 milioi euroko aurrekontua jartzen du mahai gainean, gizarte-kohesioaren, kulturaren eta ekonomiaren eta enpleguaren arloko 43 neurri zehatz aurrera ateratzeko.

SARE SOZIALAK:

www.bilbaokultura.eus